Read Khiamniungan Naga Mat 25 Bible Online

Mat 25 - Khiamniungan Naga bible

Mat 25

¹“Nungai aün nokshing nou asangting meso che tson kankü tsamsigoh shantsün tü wao khutsün khekkü noili-e.

²Ngüso ongko mongthat mongsai nou tsüpungkün pungo, naiuso mongthat mongsai pungtsün pungo noiküla.

³Mongthat mongsai tsüpungkünsoüh ngüso tson to kan lüko nungko hakü inkhiam tsükan.

⁴Lüko mongthat mongsai pungtsünsoüh ngüso tson ko hakü ngüso mengai inkhiam kan,

⁵Tsamsigoh shanpaou tsangankü nou shioko ngüso chikü tü nio ngaokü saila-an.

⁶“Lüko ahwem nai wekü jonkü ngiom, ‘Tsamsigoh shanpaou athaplu! Asam apa waoloau ashi!’

⁷Nungai asangting meso che nouso apem momo tson khemloukü tsalo.

⁸Nai mongthat mongsai tsüpungkünsoüh mongthat mongsai pungtsünso tü ngiom, ‘Asam tson ainou inkhiam sam hau intso akiuha, tiautenai sam tson nyattanji.’

⁹Lüko mongthat mongsai pungtsünsoüh thalakü ngiom, ‘Tsüngean,’ ‘sam si asam thaiutha inkhiam nou saiukü tsünoi-e. Ajantsün dongai bao asam lükhu, küta asam thaiutha lütuhlou.’

¹⁰Nungtiphe mongthat mongsai tsüpungkünso atuhao khukü noinai, tsamsigoh shanpaou shisaom. Nungko pungo nouso sauhai khemloukü noiküla, ngüso apako tsamsigoh shantsün sümai nai khu; naiuso kou nou kiappan.

¹¹“Phikü mongthat mongsai tsüpungkün asangting meso nouso shikü ngiom, ‘APAOU! APAOU! sam hao asopkiu-i!’

¹²Lüko tsamsigoh shanpao nou thalakü ngiom, ‘Atsüoting ngü asam tü ngioji, Ngü asam tsünge,”

¹³“Nungtiphe thsümonkü lünoi, tiautenai asamüh ajekhaiu naiuso atao nou tsünge.

¹⁴“Nungai aün nokshing khaiunia tsaküh apa tsamkihoi jonshikü, apa jengtsaiu ngüso hao janekü kiuküta, goumchi laiukü ai khuwantsün khekkü noili-e.

¹⁵Apaüh tsak hao tangka tsop pungo, tsak hao nime, naiuso tsak hao tsak, ta khaiunia pungkü meshen oukong likü kiuküta süme eiuwan.

¹⁶Nungailu tangka tsop pungo loutsün nou khukü nungüh chailekü loüh tangka tsop pungo lesanshi.

¹⁷Nungti tangka tsop nime loutsün nou lüko loüh tangka tsop nime lesanshin.

¹⁸Lüko sauüh tangka tsop tsak loum, apaüh khuküta khan nou thaiukü apa tsampao tangka nungko tsangkü wan.

¹⁹“Atao laiukü noiküta nung tsamkihoi APAOU shin, naiuso ngüso alesan tü velun.

²⁰Nai tangka tsop pungo loutsün nou amao atsop pungo kankü shikü ngiom, ‘APAOU, ni ngü hao atsop pungo kiu,’ ‘athaplu! ngü loüh atsop pungo lesanshin.’

²¹Apa tsampaoüh tsamki tü ngiom, ‘Thaiumei, amei naiuso monglamtsün tsamki!’ ‘chai thsaothsaokü khaiuko ni da monglamkü noiküla, ngü ni jengtsaiu piakü khaiuko taiukiuji. Ni ashi, jü amongling haoson nai lünoi!’

²²“Naiuso atsop nime loutsün tsamki shikü ngiom, ‘APAOU, ni ngü hao atsop nime kiu; athaplu! ngo loüh atsop nime lesanshin.’

²³Apa tsampaoüh apa tü ngiom, ‘Thaiumei, amei naiuso monglamtsün tsamki chai thsaothsaokü khaiuko ni tü monglamkü noiküla, ngü ni chai piakü khaiuko taiukiuji. Ni atsampao amongling nai lünap!’

²⁴“Nai atsop tsak loutsün tsamki shikü ngiom, ‘APAOU, ni mongthe khaiunia, naiuso tiai ni tsüshiu nungai yamheji; naiuso tiai ni tsülopeng nungai kamshiji ta ngü ngen.

²⁵Ngo hatküta, khukü atangka goh ai tsangkü wan: athaplu, ni nou ti nung ni epshiji.’

²⁶Apa tsampaoüh thalakü apa tü ngiom, ‘tsümeikün naiuso cholak tsamki! ngü tiai tsüshiu nungai yamheji, naiuso tiai tsülopeng nungai kamshiji ta ni ngenso?.

²⁷‘Nungaito tangka kamtaiutsünso pha mongko ni jü tangka taiukiuao noiküla, naiuso ngo shinai anüo hakü laokü eppela.

²⁸Nungtiphe asamüh apa ainou tangka tsop kankü lükhu, küta nung atsop che taiutsün hao lükiu.

²⁹Tititenai sauüh taim apa hao kiu-e; küta apa piakü taiu-e; lüko sau tsütaiu apaüh ti taim nung lüko apa ainou kanlükhun-e.

³⁰Naiuso asamüh atheao tsünoikün tsamki nou kankü khukü anyakhem nai lüwan. Nungai apa hou jei-ekü shapkü noi-e.’

³¹“Tilai Khaiunia Thso meshen ajinka nai apako aünhonghoi chikü hakü, apa nokpao noikham nai shi-e,

³²nai mele khaiunia apem apa dongko kamshi-e. Nai onnemok jimtsün nou won ainou onnemok janetsünli, apaüh ngüso jane-e.

³³Apaüh onnemok hoi apa uai, naiuso won hoi tsatai taiu-e.

³⁴Nungai APAOU nou apa uai noinso tü ngio-e, ‘Ashi, asam Jüpoüh oukkiutsünso! Asam thaiutha apung anyim ainou khemtaiutsün nokshing tengkam lükam.

³⁵Tititenai ngo naiukü noila, naiuso asamüh ngo hao eheshiu kiu; ngo lekü noila, naiuso asamüh ngo hao thioshen; naiuso ngo mesanli noinai, asamüh ngo asam tsamai nialou; ngo tsosa noinai asamüh ngo hao tenkiu.

³⁶Ngo kiakü noila, nai asamüh ngo tü thap; ngo akhuo tsamai noila, naiuso asamüh ngo tü shisailu.’

³⁷“Nungai asiohoi nou apa tü thalakü ngio-e, ‘APAOU, tilai samüh ni naiukü tsüdekünai lekü noinai waoshen?

³⁸Naiuso samüh tilai ni mesanli epkü sam tsamai nialo? tsüdekünai tsosa noinai ni hao tenkiu?

³⁹Naiuso tilai samüh ni kiakü, tsüdekünai ni akhuo tsamai epkü, adongai shikü sailun?’

⁴⁰Naiuso APAOU nou thalakü ngüso tü ngio-e, ‘Atsüoting ngü asam tü ngioji, nungso jü deisinioso ehenting ongko tsak tü lüko asamüh ti chhin, nung ngü tü chhin!’

⁴¹“Nungai apaüh tsatai noinso tü ngio-e, ‘Asam athesan eptsünso, jüdong ainou lüsoian! Biya naiuso apa hongthonhoi thaiutha inheeng khemtaiu nai lünap!

⁴²Tititenai ngo naiukü noila; naiuso asamüh ngo hao eheshiu tsükiu; ngo lekü noila; naiuso asamüh ngo hao ashiuao tsükiu;

⁴³ngo mesanli noila; naiuso asamüh ngo asam tsamai tsünialou; tsosa noila; naiuso asamüh ngo hao tsütenkiu; kiakü naiuso akhou tsamai noila; naiuso asamüh ngo tü tsüsailu.’

⁴⁴Nungai ngüsoüh ngio-e, ‘APAOU, ni naiukü noinai, lekü noinai, mesanli noinai, tsosa noinai, kiakü noinai, tsüdekünai akhou tsamai noinai, samüh tilai ni epkü tsühachu?’

⁴⁵Nungai nokpao nou ngüso tü thalakü ngio-e, ‘Atsüoting, ngü asam tü ngio-e, nungso ehenting ongko tsak tü asamüh ti tsüchhi, nung asamüh ngo tü tsüchhi.’

⁴⁶Naiuso nungso athontsüyangkün angja nai nappe, lüko asiohoi asaita aa nai nappe.”