Read Khiamniungan Naga Mat 26 Bible Online

Mat 26 - Khiamniungan Naga bible

Mat 26

¹Yisuüh nung ngio apem chitekhemküta, apa sahoi tü ngiom,

²“Ajekhaiu nenyi noiküta Aasantsün Sümai shiji, ta asamüh ngen, naiuso Khaiunia Thso paiphu nai lalutao janhean-e.”

³Nungai atengting mesonhoi, naiuso petchehoi, Caiaphas ta jontsün Mesonpao tsamsu ai kamshin;

⁴naiuso ngüsoüh akau-ai Yisu thaloukü luatao thaiutha aikü ngemlou.

⁵Lüko ngüsoüh, “Hoi ongko angja angem sungeta noin, sümai taoko to tsüchhi-e.” Ta ngem.

⁶Yisu Behtani nai je sungtsün Simon tsamai heshiukü noinai,

⁷menyiu tsaküh tangka piakü mai angannyamtsün khaiutsom long meng tsak kankü apa dongai shiküta apa khaiu nai nung tsomkiu.

⁸Sahoi nousoüh nung epnai, ngüso mongmatkü ngiom, “Tiauta nung khaiutsom nungti khemanji?”

⁹“Nung khaiutsom amai piakü he janküta angjahoi nouso hao kiu-ela!”

¹⁰Yisuüh nung ngemtsün ngekü ngüso tü ngiom, “Tiauta asamüh nung nyiuhai nou tsonjek kiuji? Tititenai apaüh ngo tü chhi ameiting chhin.

¹¹Angja haito asamko asai noi-e, lüko ngo to asamko asai tsünoi-e.

¹²Apaüh jü pemai khaiutsom loluttsün nou, ngo etam nai khanao khemlou-iao thaiutha chhin.

¹³Atsüoting, ngo asam tü ngioji, goumchi chikü naiuso tilüsongai nung ngem amei chime, nung menyiu nou chhitsün lüko apa thaiutha yangsankü chite-e.”

¹⁴Nungai sahoi chekü nime ongko Yihuda Iskariot ta jontsün tsak nou atengting mesonhoi dongai khu

¹⁵kü ngiom, “Ngü asam hao Apa janthionai asamüh ngo hao ti kiuao mongchioji?” Nai ngüsoüh apa hao tangka aosam vesankü kiu.

¹⁶Nungko yakü Yihuda Iskariotüh ngüso hao Yisu janthioao yam nou yam.

¹⁷Phoplao tsüthiokün Themtsai Sümai ayalu ajekhaiu nai sahoi nou Yisu dongai shikü ngiom, “Athaiutha Aasantsün Sümai heao samüh tiai khemluao aiuji?”

¹⁸Apaüh ngiom, “Noknio nai napkü khaiunia tsak tü lüngio, ‘Atsandetsün nou ngioji, Jü atao shisao-iu, jü sahoi nouko ngü atsamai Asantsün Sümai heshiu-e.’”

¹⁹Nai Yisuüh ngiotsünli sahoi nousoüh Aasantsün Sümai nou khemlou.

²⁰Ahsham shinai apa sahoi chekü nime nousoko chih he ao moknoi.

²¹Ngüso heshiu taoko Yisuüh ngiom, “Atsüoting ngü asam tü ngioji, Asam ongko tsaküh ngü sapthio-e.”

²²Nai sahoi nouso thatü mongkiakü iula, naiuso ngüso pungküüh “APAOU, nung ngo süne?” ta ngüsoüh sangao yachu.

²³Yisuüh thalakü ngiom, “Sauüh ngüko chionai pha tsatthioji, nungüh ngo sapthio-i-e.

²⁴Khaiunia Thso, thaiutha Asiongio nai satkü taimli apa tü chhi-e; lüko sau tsangkü Khaiunia Thso sapthio-i-e nung khaiunia thaiutha inyate! Nung khaiunia thaiutha apa tsüchetkü noinai bao chenela!”

²⁵Nai apa sapthio-itsün Yihudaüh thalakü ngiom, “Atsandetsün, nung ngo süne?” Yisuüh apa tü thalan, “Ni ngioji.”

²⁶Ngüso heshiunai Yisuüh themtsai nou louküta nung oukkiukü ngeppek küta sahoi hao kiukü ngiom, “Alou, küta lühe,” “nung Jü pem.”

²⁷Nai apaüh thengkam tsak loukü, Goa hao nianlomkiu küta nung ngüso hao kiukü ngiom, “Asam chiküüh nung lüshiu.”

²⁸“Nung Goa ün athalou-e thaolutkü taiutsün jü she, sübao piakü thaiutha angei wankiuao lopengtsün noin.

²⁹Ngo asamko aikü Jü Po nokshing nai theng ayan moshiukün lektso, lonai yakü ngü nung theng tilaitso tsüshiu-e ta asam tü ngioji.”

³⁰Ngüsoüh jih tsak jih küta, Olip kingai sungkü khu.

³¹Nungai Yisuüh ngüso tü ngiom, “Lüso asam chiküüh ngo wankü khuwan-e; tititenai nung asiongio nai satkü taim, ‘Ngü onnemok jimtsün da shiu-e, naiuso onnemok hoi pengkü khu-e.’

³²Lüko ahkü shiküta, asam khako ngo chong Galil ai khu-e.”

³³Lüko Peterüh thalakü Yisu tü ngiom, “Apemüh ni wankü khuwan lüko, ngo tilaitso ni wankü tsükhu-e!”

³⁴Yisuüh Peter tü ngiom, “Atsüoting ngo ni tü ngioji, Lüso waio nou mokokünai, ni ngo tsünge ta samjam ngio-e.”

³⁵Peterüh apa tü ngiom, “Ngo niko eao noilüko, nungti ngü tilaitso tsüngio-e!” Naiuso sahoi amao nousoüh lüko apemüh nungti ngiom.

³⁶Nungai Yisu sahoi nousoko Getsemane ta jontsün athang tsakai khukü, apa sahoi tü ngiom, “Ngo nungai khukü misaonai, asam nungko anoi.”

³⁷Naiuso Yisuüh Peter naiuso Zebedi thso nime apako nialou. Apa mong kiakü angjajikan.

³⁸Nungai apaüh ngüso tü ngiom, “Jü mongpemai thatü thsüokü kiaji, asam nungko anoi naiuso ngoko aikü thsümonkü anoi.”

³⁹Küta Apa kha-ai entso khukü, kha thaothiokü misao saokü ngiom, “Oh Jüpo, shio naito, nung angja thengkam ngo ainou asoiankiu; nungti lüko ngü mongchiotsün tsüde, ni mongchiotsün lüthe.”

⁴⁰Nai Apa sahoi süme nouso dongai shinai, ngüso sailakü epkü Peter tü ngiom, “Asamüh ghontao tsak ngoko aikü thsümonkü noiau tsüshioso?

⁴¹Alilu nai tsüsaliao asam lüthsümonlu, naiuso misao lüsao. Onthso to mongchioji lüko nyih nai outsükong.”

⁴²Loüh jam apa khukü misaokü ngiom, “Oh Jüpo, ngü nung angja thengkam moshiukün lektso ngü ainou soianao tsüshiokü naito, ngü mongchiotsün tsüde, ni mongchiotsün lüthe.”

⁴³Loüh apa laokü shishinai, sahoi nouso sailakü ep; tititenai ngüso niovei maiushikü noiküla.

⁴⁴Apa loüh ngüso wankü khukü, samjam noukoüh ngio nunglu ngiokü misao sao.

⁴⁵Nungai apa sahoi dongai laokü shikü ngiom, “Lo lüko asam aalokü naiuso sailakü noinso? Athaplu! Khaiunia Thso angei khaiuniahoi oukong nai thumkü kiuao atao shisao-iu.

⁴⁶Atsalou, sam khuko. Athaplu, ngo sapthiotsün khaiunia nou nungko noin!”

⁴⁷Yisu ngio chitekü noinai, sahoi chekü nime ongko tsak, Yihuda Iskariot ko atengting mesonhoi naiuso petchehoi ainou hoi asong tsaküh sah naiuso paiyan kankü shin.

⁴⁸Apa sapthio-itsün nou ngüso hao ii tsak kiukü ngiom: “Ngü saotü son nai cheppe, asamüh yamtsün nung apa. Apa lüthalou.”

⁴⁹Nai Yihuda Iskariot Yisu dongai saitha shikü ngiom, “Atsandetsün, meikü lünoi!” küta Apa tü son nai chep.

⁵⁰Yisuüh apa tü ngiom, “Haimei! ni ti chhiao noin shakta lüchhian!” Nungai ngüso shikü Yisu da pha poukü apa thalou.

⁵¹Naiuso Yisuko hanso ongko tsaküh apa sah tensankü Akhengting Meson tsamki da hekü, apa noukhan heankiu.

⁵²Yisuüh apa tü ngiom, “Asah, asasup ai lütaiuwan.” “Sauhaiüh sah kankeiji ngüso chikü sah nou mowane.

⁵³Ngo lo Jüpo tü apa aünhonghoi heng chekü nime khaiuai hongao misao saoao tsüshio-e ta asamüh yangji süne?

⁵⁴Naito Asiongio sübao nou nungti thawaoao nointa ngioji, nung titi shithawao-e?”

⁵⁵Nung taoko Yisuüh hoi tü ngiom, “Asam kauhai thalouao shitsünli ngo thalouau sah naiuso paiyan kankü shijiso? Ngo ajekhaiu pungkü Amkham tsamai tsandekü noinai, asamüh ngo tsüthalou.

⁵⁶Lüko nung chikü E-po nousoüh Asiongio nai satkü taiutsün atsüo shinapao thaiutha shiji. Nungai sahoi apem nou apa wankü khuwan.

⁵⁷Nai Yisu thaloutsünsoüh Apa Akhengting Meson Caiphas, tsamai nialükhun nungko Ngiokhem tsandetsünso naiuso petchehai aikü kamkü noiküla.

⁵⁸Lüko Peterüh Akhengting Meson kam saokü, lelutkü hoilut, küta napkü titi shithon lo-e ta ngelouao thaiutha ehühoi nousoko noi.

⁵⁹Atengting mesonhoi naiuso achosanhoi nou Yisu e-iao atsüotsüdekün mi yam;

⁶⁰kü atsüotsüdekün mi khaiunia piakü nou kiu lüko, ngüsoüh nungko apa eao lümeikü tsüep. Athon nai khaiunia nime shikü,

⁶¹“Nung khaiunia nou, ‘Ngü Goa Amkham Tsam lotheanküta samnyi nai shanshiao shiom ta ngiom.’”

⁶²Akhengting Meson nou tsakü Yisu tü ngiom, “Athako nung mi kiutsün tü ni ti tsüthalajiso?”

⁶³Lüko Yisuüh ti tsüngio; loüh Akhengting Meson nou Apa tü ngiom, “Aa Goa thaiutha ngo ni tü ngiomongshingkü ngioji: Ni Goa Thso, Khrista süne tsüde sam tü angio.”

⁶⁴Yisuüh apa tü ngiom, “Ni ngio-iu. Lüko ngo ni tü ngioji: Lo yakü asamüh Khaiunia Thso Goa uai moknoikü aün hai thengmia nai noikü shitsün eppe!”

⁶⁵Nungai Akhengting Meson nou apa ne chipekkü ngiom, “Apaüh Goa lotsaokü chite-iu! Samüh nung chiai mi amao tsüpoushi! Apaüh Goa lutsaotsün lo samüh lu-iu!

⁶⁶Asamüh ti yangji? Ngüsoüh thalakü ngiom, “Apa eao maikü noin.”

⁶⁷Nungai ngüsoüh apa khanai lei thoplutkü apa da shiuh; naiuso apa tü pha nou latsünsoüh

⁶⁸ngiom, “Wai Khrista! Ni da shiuhtsün nung sau? sam tü oukong nou angio!”

⁶⁹Lo Peter kam tsamso nai mokkü noitsün taoko, Akhengteng Meson menyiu tsamki tsak shikü apa tü ngiom, “Ni lüko Galil hai nou Yisu ko hakü noiküla.”

⁷⁰Lüko apaüh ngüso chikü khako tsüthaloukü, “Ni ti thaiutha ngioji ngü tsünge” ta thalan.

⁷¹Naiuso apa mikhem ke bekhan nai sungnai, amao menyiuthso tsamki tsaküh apa epkü nungai noinso tü ngiom, “Nung khaiunia nou Nazaret hai Yisu ko hakü noiküla.”

⁷²Loüh Peterüh ngiomongshingkü tsüthaloukü ngiom, “Khaiunia nung ngü tsünge!”

⁷³Atao intso noiküta shimkü tsatsünso shikü Peter tü ngiom, “Atsüoting ni ngüso ongko tsak,” “tiautenai ni chitetsün ngio sangyak nou ni tsangsheikiuji!”

⁷⁴Nungai Peterüh athesan ngiomong shingkü ngiom, “Ngo ngiotsüo ngioji! Ngo ngiotsün tsüthakü naito, Goa nou ngü hau angja akiu! Ngo nung khaiunia nou tsünge!” Nungailu waio nou koh,

⁷⁵nai nungko Yisuüh Peter tü, “waio nou mokokünai ni ngü tsünge ta samjam tsüthalou-e” ta ngiotsün yangsan: Küta apa kengchiai khukü thsüokü shap.