Read Khiamniungan Naga Mat 27 Bible Online

Mat 27 - Khiamniungan Naga bible

Mat 27

¹Ahom peta Atengting mesonhoi naiuso petchehoi apem nou Yisu e-iao thatlou.

²Ngüsoüh Apa tü sonkhiang thiolutkü Rom nokshingpaou Pailat dongai nialükhun.

³Nungai apa sapthiotsün Yihuda Iskariotüh Yisu hao aphio kiutsün epkü, apa chija mongphoklekü atengting mesonhoi naiuso petchehoi dongai tangka aosam nou kankü shikü ngiom,

⁴“Angei tsünoikün khaiunia tsak ngo sapthiokü e-i-iu!” Lüko ngüsoüh ngiom, “Samüh nung thaiutha ti ayang tsünoi?” “Nung achhisiya noin!”

⁵Nai Yihuda Iskariotüh tangka nou amthang nai wankü khuwan; küta meshen chija singelatloukü ean.

⁶Atengteng mesonhoi nou tangka semkü ngiom, “Nung tangka she maiphe, chaitaiu tsamai taiuao sam ngiokhem nai ayam tsünoi.”

⁷Ngüsoüh ngemloukü, nung Melemaohai mia khanao thaiutha Lak Saitsün gohthang nou tuh.

⁸Nungshioko nung gohthang tü losaokü, “She Goh” ta jonji.

⁹Nungai E-po Yerimiaüh chitetsün ngio nung shinap: “Israel thsosoüh apa thaiutha kiuao thatsantsün chai tangka aosam nou lou,

¹⁰naiuso APAOU nou ngü tü thoiluttsünli ngüsoüh nung chai nou Lak Saitsün gohthang tuh ao kankei.”

¹¹Romhai Nokshingpaou nou Yisu apa khako tsa-iküta apa tü, “Ni Yihuda hai nokpao süne?” ta sang. Nai Yisuüh apa tü, “Ni ngioji” ta thalan.

¹²Lüko atengting mesonhoi naiuso petchehoi nou apa phio-ikü ngionai, apaüh ti tsüthala.

¹³Nungai Pailatüh apa tü ngiom, “Ngüsoüh athako mi nou titi kiuji nung ni tsüluso?”

¹⁴Lüko Yisuüh Nokshingpaou tü ngio tsaktso tsüthashi, nungshioko Nokshingpaou thatü ngawan.

¹⁵Aasantsün Sümai pungkü akhou tsamai noitsün ongko tsak hoi nou mongchiotsün ngüso dongai sokao Romhai nokshingpaou saisile noiküla.

¹⁶Nai nung taoko Baraba ta jontsün nian asong tsak akhou tsamai noiküla.

¹⁷Nungtiphe hoi asong nouso kamshinai, Pailatüh ngüso tü sang, “Ngü asam dongai sokao noitsün tsak nou Baraba süne Khrista ta jontsün Yisu sau sok-iao asamüh mongchioji?”

¹⁸Tititenai Yihudahai aniakeihoi nou niokia noitsün tsangkü Yisu apa hao lethiowan ta apaüh thatü meikü ngekü noiküla.

¹⁹Pailat mikhem kiutsün noikham nai noitaiunai, apa tsammongnyiuüh apa dongai ngiongem tsak hong: “Nung asio khaiunia thaiutha ni ti lachhi, tiautenai müso ngo apa thaiutha ko miamian nai thatü angja epkü noin.”

²⁰Atengting mesonhoi naiuso petche haiüh Yisu lüloat naiuso Baraba lüsaolou ta hoi nou tü choikei.

²¹Lüko hoi asong tü sang, “Nung nime ongko ngo asam dongai sübao soki-ao asamüh mongchioji?” Nai ngüsoüh, “Baraba!” sokiau aiuji ta thalan.

²²Pailatüh ngüso tü sang, “Naito, Yisu, sau tü Khrista ta jonji, ngo apa tü ti chhi-e?” Nungai ngüso apemüh, “Apa paiphu nai lülalut” ta thalan.

²³Nai Pailatüh sang, “Tiau, Apaüh tsümeikü ti chhin?” Lüko ngüsoüh sang atsokting nou thsüokü vekü, “Apa paiphu nai lülalut!” ta ngiom.

²⁴Nungtiphe Pailat ngio titso tsülatha, lüko hoi nou ngematankü sungkü epkü apaüh khiam kankü shikü hoi khako pha tsaowankü ngiom, “Nung asio khaiunia etsünko ngo aphio tsünoi! Nung asam chija lüthe!”

²⁵Nai hoi asong athum nou, “Apa eantsün thaiutha athesan sam khaiuko naiuso sam thsoso khaiuko ashi!” ta wekü ngiom.

²⁶Nungai Pailatüh ngüso hao Baraba sokkiu; lüko Yisu da shiu-i küta paiphu nai lalutao thumkü kiuwan.

²⁷Nungai Pailat süpaihoiüh Yisu nokshingpaou khengai niakü nap, naiuso hoi apem apa lemkü kamshi.

²⁸Ngüsoüh apa ne lowan küta aseng ne nou ten-in.

²⁹Ngüsoüh tsao nou nokpao kandio tsak shankü apa hau kei-i, naiuso apa pha nai pailai tsak shem-i; küta ngüso apa khako kaukü lotsaokü ngiom, “Yihudahai Nokpao meikü lünoi!”

³⁰Ngüsoüh apa da lei nou thuplut, naiuso pailai nou loukü apa khaiu nai shiuh.

³¹Ngüsoüh apa lochitsün khemküta aseng ne losankü apa hau thokiu, naiuso ngüsoüh paiphu nai laluttao nialükhun.

³²Ngüso khunai, Simon ta niankü Cyrene hai tsak ngüsoüh epkü, Yisu paiphu piao thaiutha apa ngüsoko kojakü khuha-i.

³³Nai ngüso Golgotha, sübao tü, “Khaiu ou gohthang” ta jonji nung athang tsakai shin.

³⁴Nungai ngüsoüh Yisu hao theng akhou nouko lao-ekü ashiuao kiu, lüko apaüh nung tapluküta ashiuao tsülou.

³⁵Nai ngüsoüh apa paiphu nai lalutküta, phong dekü apa nese-e ngüso ongko janthat.

³⁶Nungphiai ngüso nungko apa tü jiokü mokkü noi.

³⁷Naiuso, “Yisu, Yihudahai Nokpao” ta apa phio-i-tsün ngio nou satkü apa khütha ai leplutkiu.

³⁸Nungai ngüsoüh ajahe thekü shitsün khaiunia nime, Yisu ko apa uai tsak, tsatai tsak ta lalutha.

³⁹Ayankeitsünsoüh ngüso khaiu ngamkü napkü Yisu lotsao kiukü

⁴⁰ngiom: “Amkham Tsam lotheanküta samnyi nouko shanshiao nou Ni! Ni Goa Thso naito achija lükipsanlou! Ni paiphu ainou asao!”

⁴¹Nungti atengteng mesonhoi, Ngiokhem tsandetsünso naiuso petchehoi nousoüh apa lotsaokü ngiom:

⁴²“Apaüh amaohai to kipsan; lüko apa pem to akipsanau tsüshio! Apa Israelhai nokpao tsüdeso? Apa lo paiphu ainou saonaito samüh apa da monglamkü apa don the-e.

⁴³Apaüh Goa da monglamji, naiuso Goa Thso ta ngioji. Naito lo Goa nou apa kipsane moko ta samüh thapkü noiko!”

⁴⁴Apa ko aikü paiphu nai laluttsün ajahe thekü shitsün khaiunia nime nou lüko nungtilu apa lutsao.

⁴⁵Anyiwem ainou süme baji saokü shingkhannio athum anyakhem nou loijeikü noiküla.

⁴⁶Nai süme baji thatso nai Yisuüh sang asong nou vekü ngiom, “Eloi, Eloi, lama sabakthani!” nung athat nou, “Jü Goa, Jü Goa, ni ngo tiauta wanji?”

⁴⁷Nungko tsakü noinso ajantsoüh nung lunai ngiom, “Apaüh Elija tü jonji!”

⁴⁸Nungailu ngüso ongko tsaküh kopkü khukü, lüpoi nou nung ehejek khiam nai thsomthio küta, tsongkai tsak da kelutkü kankü shikü apa hao ashiuao kiu.

⁴⁹Lüko amao haiüh ngiom, “Nungti lüwan! Elija apa kipsanao shi-e süne tsüshi-eko samüh thapkü noiko.”

⁵⁰Yisuüh müjam sang asong nou ve, küta apa ean.

⁵¹Nai, Amkham Tsam nai khongtaiutsün ne asungthun ainou asaothun saongoikü nime hao thekü chipekkü pai-an. Goum nou haiuhaiu, naiuso lung nouso pai-an;

⁵²etam khan nouso soppan; naiuso eankü noitsün asiohoi pem piakü ahkü shishin.

⁵³Ngüso ahkü shikütün phiai etamkhan ainou sungkü ngüsoüh asio noknio nai napkü piakü hao ep-in.

⁵⁴Tilai tsom tsak khaiuko APAOU, naiuso apako hakü Yisu jimkü noinsoüh gohhaiu naiuso athawaotsün chhi nou ep ngüso thatü hatkü ngiom, “Atsüoting nung Goa Thso noiküla!”

⁵⁵Nai Galil ainou Apa phiai hoiluttsün menyiuhoi piakü kumai nou jinlukü Yisu hachukü noiküla.

⁵⁶Ngüso ongko Mari Magdalin, Yakob naiuso Yosep nyiu Mari, naiuso Zebedi thsoso nyiu hakü noiküla!”

⁵⁷Ah-sham küta, Arimathia hai memei khaiunia tsak nian nou Yosep, apa lüko Yisu sahoi tsak nungai shisaom.

⁵⁸Nung khaiunia nou Pailat dongai khukü Yisu miapem tü saom. Nungai Pailatüh nung lükiu ta ngiokhem kiu.

⁵⁹Nungai Yosepüh Yisu miapem louküta nung ne amatchai nou tsanjei.

⁶⁰Küta apaüh nung apa etam lung ayan lasatkü taiutsün nai wan, naiuso apaüh etam khan nou ta lung asong tsak loklut taiutkü khuwan.

⁶¹Nai Mari Magdalin, naiuso amao Mari, ne nung etam khankuk tü sheilutkü mokkü noiküla.

⁶²Nungthan ajekhaiu Yihuda Anounyi nai atengting mesonhoi naiuso Farisihoi nou Pailat dongai shi phetkü ngiom,

⁶³“Asonghai, nung phokle laple nou apa aa noinai, ‘Samnyi noiküta ngo ahkü shi-e,’ ta ngiotsün samüh yangsanji.

⁶⁴Nungtiphe samnyi nouko yangko etam jimao ngiokhem lükiu, tsüngean apa sahoi nou shikü apa kaulükhunküta, ‘Apa e ainou ahkü shi-iu,’ ta khaiunia nouso tü ngio-e; nungti naito aya angei nouko nai aphi angei tekkü tsümeikü noi-e.”

⁶⁵Pailatüh ngüso tü ngiom, “Asam ajimtsünso noin. Asam lükhu naiuso nung etam asamüh shiotsünko yangkü lüjim.”

⁶⁶Nungtiphe ngüsoüh khukü, ngüso ko ajimtsün hakü, lung nou tü ii nou thanglutkü etam nou tü jim-in.