Read Khiamniungan Naga Mat 4 Bible Online

Mat 4 - Khiamniungan Naga bible

Mat 4

¹Nungphiai Biya hau lilu-iao thaiutha Onthso nou Yisu liutsa nai nialükhun.

²Apa aopülenyi naiuso aopüleso keithonkü noikütün phiai thatü naiujikan.

³Nungai Biya nou shiküta apa tü ngiom, “Ni Goa Thso naito nung lung nou themtsai iulaao lüngio.”

⁴Lüko Yisuüh thashin, “Nung Asiongio nai satkü taim; ‘Khaiunia nou themtsai noulu tsüde, lüko Goa son ainou sungtsün ngio noulu kih-e.’”

⁵Nungphiai Biya nou Yisu Asio Noknio, Yirusalemai niakü khukü amkham tsamkhaiu asongthon nai noi-in,

⁶naiuso apa tü ngiom, “Ni Goa Thso naito, nung ainou achija lühami, tititenai nung asiongio nai satkü taim, ‘Goa nou apa aünhonghoi nouso honge naiuso ngüsoüh ahok lung nou tsütawai-iao thaiutha ngüso pha nou thalo-e.’”

⁷Yisuüh apa tü thalan, “Loüh nung asiongio nai satkü taim, ‘Ni APAOU Goa lalilu.’”

⁸Loüh Biya nou Yisu king thatü tsokkü nai nialokü sung, naiuso apa hao goumchi noksong nouso apem aleng aniamshim meikü han.

⁹Nai apaüh Yisu tü ngiom, “Ni kaukü ngo tü am naito, nung apem ngo ni hao kiu-e.”

¹⁰Nungai Yisuüh apa tü ngiom, “Biya! nung ainou lükhuwan! Tititenai nung asiongio nai satkü taim, ‘Ni APAOU a Goa tü lüam, naiuso apa lu lüyathsüo!’”

¹¹Nungai Biya nou apa wankü khuwan naiuso athaplu aünhonghoi nou shikü apatü paotsang.

¹²Tilai Yisuüh Yohan akhou tsamai thiowaniu ta lu, nung ainou apa Galil ai khuwan,

¹³Apa Nazaret ai tsünoikü, Zebulun naiuso Naptali elungai, Galil she shimkü noitsün noksong Kapernaum ai kih-iu.

¹⁴Nung E-po Isaiaüh ngiotaiutsün shinapao thaiutha chhin.

¹⁵“Chenpahai ün nou Galil! Yordan thsatkü khuküta, khiamnok dongai noi nou Zebulun goumchi naiuso Naptali goumchi,

¹⁶Anyakhem nai noinsoüh aawon asong tsak eppe. Naiuso e goumchi anyakhem nai noitsünso tü aawon nou thsalute.”

¹⁷Nung taonai yakü Yisuüh nungti chimao yalo: “Asam mong lüphokle, tiautenai aün nokshing shimkü noin!”

¹⁸Yisu Galil khiamnok sainai tsakeinai, adeisinio, ngouphek khaiunia Simon (sau tü Peter ta jonji) naiuso apa nio Andria, khiamnok nai nyao sokkü ep.

¹⁹Yisuüh ngüne tü ngiom, “Jü phiai ohoilut, naiuso ngo asam hao khaiunia thaloau tsande-e.”

²⁰Nungailu ngüneüh nyao nou wankü apa phiai hoilut.

²¹Nung ainou khunai amaohai adeisinio, Zebedi thso Yakob naiuso apa nio Yohan ne, kheng nai ngüne po Zebedi ko hakü nyao chiushikü epkü, apaüh ngüne jon.

²²Ngüneüh nungailu kheng naiuso ngüne po wankü apa phiai hoilut.

²³Yisu Galil apemai Yihuda kamthang nai tsandekü, naiuso aün nokshing, thaiutha ngem amei chimkü naiuso akia in amomo suntsün khaiuniahoi lomeikiukü khun.

²⁴Apa thaiutha ngiongem Syria goumchi apemai peng, naiuso akia in amomo nou angjatsünso, angei onthso nou thaloutsünso, waiojiokia sun nouso, naiuso akela kia noinso, chikü apa dongai nialoukü shin, naiuso apaüh ngüso lomeikiu.

²⁵Galil ainou naiuso noksong che nouso ainou Yirusalem naiuso Yihuda ainou naiuso Yordan etsai nou hoi asongting apa phiai hoilut.