Read Khiamniungan Naga Mat 5 Bible Online

Mat 5 - Khiamniungan Naga bible

Mat 5

¹Yisuüh hoi nouso epkü king tsakai sungküta moknoi. Nai Apa sahoiso apa lemkü kamshin,

²naiuso apaüh ngüso tü nungti tsandeao yalou:

³“Onthso nai lukü noinso thaiumei; tititenai aün nokshing ngüso ün nou!

⁴“Sauhai miashap shapji ngüso thaiumei; Goa nou ngüso alu-i-e!

⁵“Shitsamhoi nouso thaiumei; Ngüsoüh Goa nou thaloutsün eppe!

⁶“Sauhaiüh Goa mongchiotsün chhiau yangji ngüso thaiumei; Goa nou ngüso mongtsam-i-e!

⁷“Tsüojinkü yangkiutsüno thaiumei; Goa nou ngüso tü tsüojine!

⁸“Mong yanthsüokü noinso thaiumei; tititenai ngüsoüh Goa eppe!

⁹“Nokmei shantsünso thaiumei; tititenai ngüso tü Goa thoso ta jone!

¹⁰“Sauhai Goa mongchio chhitsün thako omhe-in ngüso thaiumei; tititenai aün nokshing ngüso ün nou!

¹¹“Tilai khaiunia nou jü thaiutha asam lochi lotsao-e naiuso asam thako atsüotsüdekü nou chitekü angja-i-e, nungai asam thaiumei.

¹²Mongtsamkü lünoi naiuso thatü lümongling, tititenai aün nokai asam alesan asong khemtaim, asam khako noitsün E-po nousoüh nungti omhe-in!

¹³“Asam goumchi jem, lüko jem da anya mowan naito, ti in nou nung nya-i-e? lotü nung tiao tsütheshi, lüko wanküta khaiunia hok nou ngamkeiao lu noin.”

¹⁴“Asam goumchi thaiutha aawon, king nai noitsün noksong tsangkü wanao tsüshio.

¹⁵Khaiunia nou tson sunküta kim nou hanjeikü tsüwanji; lüko tson taiutsün nai taiuji; naiuso nungüh tsamai noinso apem hao awon kiuji.

¹⁶Asam chhi amei epsanao naiuso aün nai noitsün asam Po, nungsoüh ajinka-iao asamüh khaiunia nou khako aawon asungi!

¹⁷“Ngü Mosa Ngiokhem lüko, E-po nouso ngio lüko mowan-iao shin ta layang; Ngü amowan-iao tsüde, lüko shinap-iao shin.

¹⁸Ngü asam ta atsüoting ngioji, aün naiuso goumchi momowankün lektso ehetphu taiutsün ehenting tsak lüko lailünou tsüthawaoküto yankü tsükhu-e.

¹⁹Nungtiphe sauhaiüh nung ngiokhem ongko ehenting tsak lüko lothe-e, naiuso nungti khaiunia nou tü tsande-e, aün nokshing nai apa ehentingao the-e, lüko sauhaiüh nungso kankei-e naiuso tsande-e, aün nokshing nai asongao the-e.

²⁰Ngü asam tü ngioji, ngiokhem tsandetsün naiuso Farisi hoi nou tü tekkü siokü nailu naiuso Goa mongchiotsün chhi nailu aün nokshing nai nappau shio-e.

²¹“Pe khaiunia nou ta chitetsün nung asamüh lula-iu, ‘Ni laluat, naiuso sauhaiüh luat-e apa ta mi kheme.’

²²Lüko ngü lo asam tü ngioji: sauhaiüh meshen deisinio tü mongmat-e apa mikhem angja nai noi-e, naiuso sauhaiüh meshen deisinio tü ‘waiwai!’ ta jone, apa hao hoi khako angja kiu-e; naiuso sauhaiüh meshen deisinio tü a-aiu ta jone apa inheeng angja nai nappe.

²³Nungtiphe ni Goa hau chaithio kiuao noikünai, nungai adeisiniosoüh athako tso aphio chhikü noin ta ni yangsan nai, chaithio thang nai achaithio lütaiu,

²⁴naiuso khuküta aya nai adeisinioso ko lümei-elo, küta shikü achaithio lükiu.

²⁵“Ni yamai noikünai amipaou ko shakta lümei-elo, nungti tsüdekünai mipaou nou ni mikhem nouso phamongai lethiowan-e, naiuso ni akhou tsamai thio-e.

²⁶Ngü ni tü atsüoting ngioji, atangka mothamkhemkün chikü ni nungai noi-e.

²⁷“Asamüh nung ngiotsün lula-iu, ‘Ni tsütsamtsütsüokü lachhi.’

²⁸Loto ngü asam tü ngioji, asamüh menyiuhai tü chinekkü thapnai lüko asamüh apako amongpemai tsütsamtsütsüokün chhian-iu.

²⁹Nungtiphe aniovei uai nou ni angei sunlonai nung alowan; tititenai pem chikü inheeng nai thiowan nouko athaiutha oujei tsak mowan chenthso.

³⁰Naiuso apha uai nou ni angei sunlonai nung lütapan, tititenai pem chikü inheeng nai thiowan noukoto athaiutha pha tsak mowan chenthso.

³¹“Loüh nungti ngiotsün noiküla, ‘sauhaiüh meshen tsammongnyiu komane apaüh apa hao apungeao sattsün thsam nou tsak akiu-i.’

³²Lüko loto ngo asam tü ngioji, sauüh tsütsamtsütsüokü nou tü simkü amao thaiutha meshen tsammongnyiu komane, apaüh apa tsütsamtsütsüokün tsammongnyiu ao iula-iji, naiuso pungekü noikünai sauüh apa jone nung hau lüko tsütsamtsütsükün chhi-iji.

³³“Loüh pe khaiunia tü ngiotsün asamüh lula-iu, ‘Ni yaang latsande, lüko ni APAOU nou tü thaloutsün lüchhi.’

³⁴Lotü ngü asamtü ngioji, ti in lünou ngiomongshing lashan, aün nianko ta lashan tititenai nung Goa noikham noin.

³⁵Goum niankoüh lashan tititenai nung apa hok ngamluttsün noin; Yirusalem niankoüh lashan, tititenai nung asong Nokpao ün noknio noin.

³⁶Akhaiu jonkü lashan, tititenai akhaiuo tsaktso athaiu si anya lüko ni iula-iao tsüshio-e.

³⁷Loto ‘Ah’ tü nai ‘Ah’ ta lüthe, ‘Tsüde’ tü nai ‘Tsüde’ ta lüthe. Naiuso nungtü simkü tilüsong chite-e, nungto Angei Biya ainou sungji.

³⁸“Nung chitetsün asamüh lukü shin, ‘Niovei liko niovei, naiuso hou liko hou.’

³⁹Lüko ngü asam tü ngioji: ni ta tsümeikü chhitsünso tü phao lashan, lüko ni tü onthong uai batnai, onthong tsak ainou lüthoshi.

⁴⁰Naiuso ajantsoüh aphakhut loau mikhemthang nai nialükhun nai apa hau alam phakhut lüko lükiu-i.

⁴¹Naiuso ajantsoüh ni mail tsak thsa kankü khu-iao aiunai apako mail nime lükhuha.

⁴²Tilai ni tü tso tsak akiuha ta sao-e apa hau lükiu, naiuso ajantsoüh ni tü laiuao aiunai apa hau lülaiuha.

⁴³“Nung ngiotsün asamüh lula-iu, ‘Ni aphao hai tü lütsüojin, naiuso eh lon lüchinyan.

⁴⁴Lüko ngü lo asam tü ngioji: asam eh tü lütsüojin naiuso asam omhe-itsünso thaiutha misao lüsaokiu,

⁴⁵nungti naito asam aün ai noitsün asam Po thsoso iula-e; tititenai apaüh aje nou amei tsümei nemthso hao hongji.

⁴⁶Tititenai asam ta tsüojintsün tülu asamüh tsüojinnai ti alesan noin? Liukim shitsünsoüh tso nungti chhiji!

⁴⁷Naiuso asam meshen paiusihaisoko lu chitenai, asamüh amao haita ti aphop chhiji? Goa tsüngekünsoüh lüko nungtilu chhiji!

⁴⁸Nungtiphe aün nai noi nou asam Po ahaopungkü noinli asam lüko ahaopungkü lünoi!