Read Khiamniungan Naga Mat 6 Bible Online

Mat 6 - Khiamniungan Naga bible

Mat 6

¹“Khaiunia nou epao thaiutha ngüso khako asio chhisiya nou asamüh tsüchhiao lütsüolo, nungti tsüdekünaito aün nai noi nou asam Po khako ti alesan tsünoi-e.

²“Nungtiphe ni tilai hoikü atsüojin chhi nou chhi-e, akaosai nousoüh yamtsong nai naiuso amkham tsamai chhitsünli, ni laitso amaohai hao epla-ikü lachhi. Ngüsoüh nianlom epau chhiji.

³Ni tilai angjahai da hachu-e, apha uai nou ti chhiji nung apha tsatai nou hao langela-i.

⁴Nungti ni hoikü atsüojin chhitsün nung Apo sauüh akao ai chhitsün apem epji apaüh nihau alesan kiu-e.

⁵“Tilai asamüh misao sao-e, asamüh akaosai haili lathe! tititenai khaiunia nou epao thaiutha ngüsoüh Yihuda kamthang nai naiuso sonkeng nai tsakü misao saoji. Ngo asam tü atsüoting ngioji, ngüsoüh meshen alesan epiu.

⁶Lüko asamüh tilai misao sao-e, tsampai akheiai lünap, naiuso kou nou kiapküta anioveiüh tsüepkün apo tü misao lüsao, naiuso apo sauüh akhei ainou epji apaüh nihao alesan kiu-e.

⁷“Naiuso misaonai, tsümonglamkünsoüh kankeitsünli yaang ngiothan lakankei, tititenai ngüsoüh piakü singiokü saonai lula-e ta yangji.

⁸Asam ngüsoli lathe, tititenai asamüh apa tü mosaokü naita asam thaiutha tilüsong pouji, nung asam Poüh ngen.

⁹Nungtiphe, asamüh misao nungti lüsao: ‘Aün nai noi nou sam Po: anian asio noin;

¹⁰anokshing ashi; Aün nai titi noin goumchi ko nungti amongchilüja.

¹¹Lonyi sam eheshiu sam hao akiu.

¹²Naiuso samüh amaohai hao aphio titi wankiuji, nungti sam aphio nou awankiu.

¹³Naiuso alilutsün nai sam lanialükhun, lüko Tsümeikün Tsak ainou sam akipsan.’

¹⁴“Tititenai asamüh amaohai aphio wankiu naito asam Po aün ainou asam aphioüh wankiu-e.

¹⁵Lüko asamüh amaohai aphio tsüwankiu naito asam Poüh lüko asam aphio tsüwan kiu-e.

¹⁶“Naiuso ni tilai keithon-e, akaosai nousoli kha nou khemkü lanap, tititenai ngüso keithontsün khaiunia hao epiao thaiutha, ngüsoüh khanai mea lolutji. Ngü asam tü atsüoting ngioji, ngüsoüh nung thaiutha alesan epiu.

¹⁷Tilai asam chih tsühekü khu-e, asam kha lüpengan naiuso khaiu nou lühethe,

¹⁸nungti naito amaohaiüh asam keithonji ta tsüngela-e asam Po sau niovei nou tsüep apaüh lu nge-e. Naiuso asam Poüh lu asam chhi mai alesan kiu-e.

¹⁹“Mat si hou nou heantsün naiuso kao nou napkü kaolotsün goumchi nai, asamüh meshen thaiutha jengtsaiu lakhamtaiu.

²⁰Lüko tiai mat naiuso hou nou heao naiuso kao nou napkü kaoau tsüshioji nung aün nai jengtsaiu lütsangtaiu.

²¹Tititenai tiai jengtsaiu taim, nungai amongpem lüko noi-e.

²²“Aniovei nung tson tsak noin, nungtiphe aniovei meikü noinai apim chikü awone.

²³Lüko aniovei tsümeikü naito, apim chikü anyakhem nai noi-e. Nungtiphe ni da noi nou awon nung anyakhem naito, anyakhem nou titengkü asong!

²⁴“Sauüh APAOU nime yathsüoao tsüshio, tititenai apaüh tsak chinyan-e naiuso tsak tsüojin-e, tsüdekünai apaüh mong nou tsak hau kiu-e, naiuso tsak tsüvesan-e. Asamüh Goa naiuso jengtsaiu aikü yathsüoao tsüshio.

²⁵“Nungtiphe ngü asam tü ngioji, asam aa thaiutha asamüh ti he-e tsüdekünai ti shiu-e, tsüdekünai loüh asam pem thaiutha ti tene, layangelat. Eheshiu nouko aa nou chen, naiuso neshe nouko pem chen nungti tsüde süne?

²⁶Koiyai jeikeitsün waio nouso athaplu: ngüsoüh tsülethio, tsüyamhe, tsüdekünai bei ai tsükamtaiuji; nungti lüko asam Poüh ngüso tsadji! Ngüsoko naito asam tekkü chen tsüdeso?

²⁷Asam yangelat nou aakih intso lüko lolaiuao shio-eli yangjiso?

²⁸“Asam neshe thaiutha tiau yangelatji? Liutsa nai mimi lakkhaiu titi sungji lüyanglu: ngüsoüh chhi tsüchhiji, neshe tsüshanloji.

²⁹Nungti lüko ngü asam tü ngioji, Solomon lüko apa memei sheitho chikü nou nungko noi nou taopon aleng tsaktso tsüthasao.

³⁰Lüko, Oh intsülo monglamtsünso, tisübao liusang nai noitsün sang tsak lonyi noikü ta lühom to aukhanai thiowanji nung hao lüko Goa nou nungti tholokiujitünai apaüh nung tü shimkü asam hao tsükiu-e süne?

³¹Nungtiphe asamüh ‘ti he-e, tsüdekünai ti shiu-e, tsüdekünai ti tene,’ ta ngemkü layangelat.

³²(Tititenai Goa tsüngekünsoüh nung thaiuthalu yangji). Tititenai asam Po aün nai noi nou nung chikü asam thaiutha poukü noin ta ngen?

³³Nung likoto asamüh aya nai Goa nokshing naiuso apaüh mongchiotsün lüyam, naiuso nung chikü asamhao kamlutkiu-e.

³⁴Nungtiphe lühom thaiutha layangelat: tititenai lühom nou lühom yanghekü saiuwane. Ajekhaiu pungkü nungnyi thaiutha omhe nou saiukü noian.