Read Khiamniungan Naga Mat 7 Bible Online

Mat 7 - Khiamniungan Naga bible

Mat 7

¹“Amao hai aphio layam, naito Goa nou asam aphio lüko tsüyame,

²tititenai ti in aphio asamüh yamsane, asam da lüko Goa nou nungti yamsane, naiuso ti tsoithat asamüh thatkiu-e, nung asamhao lüko thatkiu-e.

³Naito tiauta ni meshen niovei ainou thsünyup asong thaiutha tsüyangkü, deisinio niovei nai noitsün thsünyup nou tü luji?

⁴Tsüdekünai aniovei nai thsünyup asong taiuküta, ngü aniovei ainou thsünyup nou lowankiu-e ta ni adeisinio tü titi ngio-e?

⁵Akaosaitsünso! ni meshen niovei ainou chong thsünyup asong nou lüwan, naiuso nungai adeisinio niovei ainou thsünyup nou lowanao ni tsangsheikü eppe.

⁶“Ti in asio noin nung jii hao lakiu, — Ngüsoüh lapkü shikü ni tü jei-e. Yah hau asam lakkeng layakkiu — ngüso hoküh nung tü ngamkei-e.

⁷“Lüsao, naiuso nung asam hao kiu-e; lüyam, naiuso nung asamüh eppe; lühaiu, naiuso nung asam hao sopkiu-e.

⁸Tititenai asangtsün pungkü hao kiu-e, naiuso sauüh yamji apaüh eppe, naiuso sauüh haiuji nung apa hao sopkiu-e.

⁹Asam ongko meshen thsoüh themtsai ta saonai sauüh lung nou kiu-e?

¹⁰Tsüdekünai ngou tsak saonai sauüh pao tsak kiu-e?

¹¹Naito asam tsümei lüko asam thsoso hao paopei amei kiuao ngenaito, Aün nai noitsün Po nou apa tü saotsünso hao jengtsaiu amei nou tiauta tekkü tsükiu-e!

¹²“Nungtiphe khaiuniahoi nou asam hao tilüsong chhi-iao aiuji, nungti asamüh lüko ngüso tü lüchhi: tititenai Mosa Ngiokhem naiuso E-pohoi ngio nung noin.

¹³“Bekhan atsotsan nai lünap, tiautenai amowantsün nai niatsün bekhan thatü tsüomeikü, naiuso yam asong noin, naiuso nungai naptsünso piakü noin.

¹⁴Lüko aa yamai niatsün bekhan thatü tsotsan, naiuso yam nou thatü chek, naiuso nung eptsünso thsaothsaokülu.

¹⁵“Atsüotsüdekü e-po nouso khako lütsüolo; ngüso asam dongai onnemok sheitho tholokü shiji, lüko akheiai atsaoteng chiu khekkü noin.

¹⁶Ngüso chhi tsangkü asamüh ngüso ti nung nge-e. Tsaopai da sainaoshep tsü-eiuji, naiuso liutsa sangpai da latshep tsü-eiuji.

¹⁷Nungtiphe pai amei pungkü da eiu amei eiuji, lüko pai tsümeikü nai eiu tsümeikü eiuji.

¹⁸Pai amei da eiu tsümeikü eiuao tsüshio naiuso pai tsümeikü nai eiu amei tsü-eiuji.

¹⁹Sübao pai da eiu amei tsü-eiu-e nung shaplo küta in nai jah-anji.

²⁰Nungtiphe ngüso chhi tsangkü asamüh atsüotsüdekün e-po nouso nge-e.

²¹Ngo tü ‘APAOU, APAOU,’ ta jontsünso pungkü to aün nokai napao tsüde, lüko sauüh aün nai noi nou Jüpoüh aiutsünli chhi-e, ngüsolu nappe.

²²Mikhem Ajekhaiu nouko piakü nou ngo tü, ‘APAOU, APAOU! samüh anianko tsüchim süne, naiuso anianko angei onthso tsükoman süne, naiuso anianko athanga chhi piakü tsüchhi süne?’ ta ngio-e!’

²³Nungai ngo ngüso tü, ‘Ngo asam laitso tsünge. Asam tsümeikü chhitsünso ngü ainou lükhuwan!’ ta ngio-e.

²⁴“Nungtiphe, sauhaiüh jü ngio nungso lulaji, naiuso kankeiji apa lung chiai tsamlatsün mongthat amei khaiunia khekkü noi-e.

²⁵Naiuso ah nou ou naiuso shelei shin, naiuso asheih nou nung tsam nou tü thoikei lüko, tsüloi, tiautenai nung lung chiai lahkü noin.

²⁶“Sauhaiüh jü ngio nouso lulaji, lüko tsükankeiji, apa to singtso chiai tsam lahtsün mainga khekkü noi-e.

²⁷Naiuso ah nou üon, naiuso shelei shin, naiuso ahsheih nou nung tsam tü thoikei nai loian. Naiuso nung loiantsün asapat asongting noiküla!”

²⁸Tilai Yisuüh nung chitekhem, hoi nou apaüh tsandetsün tü ngawan.

²⁹Tititenai apaüh ngiokhemtsandetsünsoli tsüde lüko oukong noikü ngüso hau tsande.