Read Khiamniungan Naga Mat 8 Bible Online

Mat 8 - Khiamniungan Naga bible

Mat 8

¹Tilai Yisu king ainou saom, apa phiai hoi asong hoilut.

²Nungai Jee sungtsün tsak apa dongai shikü amkü ngiom, “APAOU, ni mongchio naito, ni ngü lomeikiuao shiom.”

³Yisuüh pha nou apa tü thankü ngiom, “Ngü mongchioji,” “Ni lümei-an!” Nungai jamaolu nung khaiunia Jee kia nou mei-an.

⁴Nai Yisuüh apa tü ngiom, “Aanglu! ni nung sauhao lachite, lüko khuküta apim mesonhai hao lühan naiuso ngüso tü ni meian-iu ta mitha thaiutha Mosaüh ngiotsün chaithio nou lükiu.”

⁵Naiuso tilai Yisu Kapennaum ai nap, Romhai asong khaiunia tsak apa dongai shikü kaukü amkü ngiom,

⁶“APAOU, jü tsamki akelakia nou thatü omhekü, tsamai saikü noin.”

⁷Nai Yisuüh apa tü ngiom, “Ngü shiküta, apa lomeikiu-e.”

⁸Lüko asong khaiunia nou thalakü ngiom, “APAOU, Ni jü tsamso khemai shinapiao ngo tsümai. Ngiokhemlu kiunai jü tsamki lomei-e.

⁹Tititenai jü khemai süpaihoi taiukü, ngü lüko ngo tü shekünso khemai noitsün khaiunia tsak noin. Naiuso ngü tsak tü, ‘Lükhu! ‘ta ngionai apa khuji; naiuso amaohai tsak tü, ‘Ashi!’ ta ngionai apa shiji; naiuso tsamki nou tü, ‘nung lüchhi!’ ta ngionai nung chhiji.”

¹⁰Yisuüh nung lulanai, Apa ngawan, naiuso ohoilut nouso tü ngiom, “Ngü asam tü atsüoteng ngioji, nungli amonglam akongting Israelhai ongko ngü tai lüko tsü-epsan.

¹¹Ngü asam tü ngioji, ajepek naiuso ajenap ainou piakü shikü, Abraham, Isak naiuso Yakob ko sümai hekü aün nokai noi-e.

¹²Lüko sauhai nung nokshing nai hao noiküla, nungsoto anyakhem nai yakthiowane, nungko ngüso hou jei-ekü shape.”

¹³Naiuso Yisuüh asong khaiunia nou tü ngiom, “Lüshi, naiuso ni monglamtsünli nung athaiutha chhikiu-e.” Nai tsamki nou nung taokolu mei-an.

¹⁴Yisu tilai Peter tsamai shin, apaüh Peter tsammongnyiu nou nyiu kiyashi nou saitaiukü ep.

¹⁵Yisuüh nung nyiuhai nou pha nai than nai; kiyashi nou apa lean; küta apa chukü yamthengkü waoshen.

¹⁶Tilai ahsham shin, khaiuniahoi nou biya nou thaloutsün piakü niakü shin. Yisuüh nung angei onthso nouso ngio tsak ngiokü koman, naiuso akia nouso apem lomeikiu.

¹⁷Apaüh nung E-po Isaiaüh, “Apaüh sam akiasiya naiuso tsaosilao kanlowan.” Ta ngiotaiutsün shinapao chhin.

¹⁸Tilai Yisuüh apa lemkü hoi piakü ep, apaüh sahoi nouso tü khiam etsai khuao ngiokhem kiukü ngiom.

¹⁹Naiuso ngiokhemtsandetsün tsak shikü apa tü ngiom, “Atsandetsün,” “Ni tiai khulünou ngo aphiai hoilute.”

²⁰Yisuüh apa tü thalan, “Chiu nouso thaiutha lungken noin, naiuso waio nouso thaiutha a-ap noin, lüko Khaiunia Thso alokü saiao athang tsünoi.”

²¹Naiuso sahoi ongko amaohai tsaküh apa tü ngiom, “APAOU, ngo khuküta jüpo chong akhannan taiu-i.”

²²Lüko Yisuüh thalan, “Ee nousoüh ngüso chija ee hoi khananao lütaiukiu, lüko ni to Jüphiai ahoilut.”

²³Yisu kheng tsakai nap, naiuso apa sahoiso apa phiai hoilut.

²⁴Alekta khiamnok nai khiampek asong tsak shin, naiuso kheng nou limanau shimkü noiküla. Lüko Yisu to sailakü noi-anküla.

²⁵Nai Apa sahoiso shikü apa jonchukü ngiom, “Sam akipsan, APAOU!” “Sam mowaneta!”

²⁶Apaüh ngüso tü ngiom, “tiau asam hatatji?” “Oh asam intsolu monglamtsünso!” Nungai apa chuoküta ahsheih naiuso khiampek tü thut, naiuso thatü tsamkü iula.

²⁷Nai sahoi nou ngakü ngiom, “ahsheih nou si khiampek nou tso angio angtsün nung titi in khaiunia noin-ya!”

²⁸Tilai apa khiamnok etsai Gadara hai goumchi ai shin, nai angei onthso nou thaloutsün khaiunia nime etam ainou sungkü apako pheten. Ngüne thatü je-kü noi nou thako khaiunia sauüh nung yamai tsükhusom.

²⁹Ngüneüh vekü ngiom, “Ni Goa Thso, sam niko ti chhi noin? Atao mosaokünai sam mowaniao ni nungai shijiso?”

³⁰Nungai ngüne noi nou shimkü yah pin achih yamhekü noiküla.

³¹Naiuso angei onthsohoi nou apa tü kojakü ngiom, “Ni sam komane tü naito, sam yah nouso ongai ahongan.”

³²Nai Yisuüh ngüso tü ngiom, “Lükhu,” naiuso ngüso sungküta, yah hoi nou da nap; naiuso athaplu; yah hoi chikü jin nai saokhukü khiamnok nai sathiokü limatan.

³³Yah jimtsünso khulükhun naiuso nokai napküta angei onthso nou thalo nouso ta ti in thawao, nung thaiutha alum chiten.

³⁴Nung noksong ainou khaiunia chikü Yisu ko pheteao shin; naiuso tilai ngüsoüh apa ep, ngüso elung ainou khuwanao apa tü koja.