Read Khiamniungan Naga Mat 9 Bible Online

Mat 9 - Khiamniungan Naga bible

Mat 9

¹Nai Yisu kheng tsakai napküta khiamnok yankü khukü apa noksongai shin.

²Nungai khaiunia ajantsoüh akela nou kiatsün khaiunia tsak, then ai saikü apa dongai kankü shin. Tilai Yisuüh ngüso amonglam asong ep, akela kiatsün tü ngiom, “Jü thso! mong songkü lüthe; ni ün angei wankiu-iu.”

³Nungai ngiokhemtsandetsünso ajantsoüh meshen mongai ngiom, “Nung khaiunia nou Goa lochiji!”

⁴Yisuüh ngüso mongyang ngelakü ngiom, “Tiauta asamüh asam mongai tsümeikü yangji?

⁵‘Apim angei wankiu-iu’ ta ngio ao shiothso süne ‘Achuo, naiuso lütsakei’ ta ngioao shiothso?

⁶Goumchi ko Khaiunia Thso da angei wankiuao oukong noin ta asamüh ngelaao thaiutha ngü nung chhi-e.” Nungtiphe apaüh akela kiatsün tü ngiom, “Achuo, athen pilokü atsamai lüshi!”.

⁷Nai nung khaiunia nou chuoküta, apa tsamai shi-an.

⁸Tilai hoi nou nung ep, ngüso hat, naiuso khaiunia hao nungti oukong kiutsün thaiutha Goa nian lomsan.

⁹Yisu nung ainou khunai, Mathi ta khaiunia tsak liukim shitsün apa chhikamthang ai moknoikü ep. Yisuüh apa tü ngiom, “Jü phiai ohoilut.” Nai Mathi tsakü chuokü apa phiai hoilut.

¹⁰Mathi tsamai chih hekü moknoi nai nungai liukim shitsünso naiuso angei khaiuniahoi piakü shikü, Yisu naiuso apa sahoisoko moknoiha.

¹¹Farisihoi nou nung epnai, ngüsoüh apa sahoi tü ngiom, “Tiauta asam atsandetsün nou liukim shitsün naiuso angeihoi nouko heshiuji?”

¹²Yisuüh nung lukü thashin, “Ameilei nouso thaiutha moushe ngepo poukü tsünoi, lüko akia nouso thaiuthalu apou noin.

¹³Asam khuküta asiongio nung ti thaiutha ngioji ta lüyanghelu: ‘Ngü aloat thainian chaithio tsüde atsüojin aiuji;’ tiautenai asiohoi tsüde, lüko angeihoi jonao ngü shin.”

¹⁴Nungai Yohan sahoiso Yisu dongai shikü ngioji, “Tiauta samüh naiuso Farisi hoi nou paikü jam keithonji, lüko asahoiüh keitsüthonji?”

¹⁵Yisuüh thalan, “Tsamsigoh shanpaou ngüsoko noitsün lektso sümai nai shi nouso tsümonglengkü noi-e süne? Nungti laitso tsüde-e! Lüko tilai tsamsigoh shanpaou ngüso ainou nialükhune, nungai ngüsoüh keithonao ajekhaiu nou shi-e.

¹⁶“Ne akeng nou da ne ayan sauüh tsüchiolutji, tititenai ayan chioluttsün nou laman-e naiuso phakhut nou tekkü chipek-e.

¹⁷Tsüdekünai khaiunia nou theng ayan nou nyikhun nekong akeng nai tsüthioji. Nungti taiunai nyikhun nekong nou paiyane, naiuso theng nou hongpengkü, nyikhun nekong nou lutheane. Lüko tilai theng ayan nyikhun nekong ayan nai thio-e, nemtso meikü noi-e.”

¹⁸Yisuüh nung chitekü noi nai, Yihuda hai aniakei tsak shikü, apatü kaukü amkü ngiom, “Jü thso loteng ean; lüko ni shiküta apa tü aphaüh lüthan, naito apa aa shi-e.”

¹⁹Nungtiphe Yisu tsalokü apa sahoiso hakü apa phiai hoilutkü, khuha.

²⁰Naiuso nyiuhai tsak sau pon chekü nime she shetsün noiküla, apa phiai shiküta Yisu nepeng nai than.

²¹Apaüh meshen mongai yang, “Ngo apa ne nailu lüko than nai ngü lomei-e.”

²²Yisuüh phiai sashikü ngiom, “Jü thso mong lüsong! Ni monglamtsün tsangkü ni lomeikiu-iu.” Naiuso nyiuhai nou nung taokolu mei-an.

²³Naiuso tilai Yisu asonghai nou tsamai nap, poipoi mattsünso naiuso miawan kam thaiutha hoi nou thatü ngemkü epkü,

²⁴Apaüh ngiom, “Apem khengai ashian! Menyiuthso nou ee tsüde, lüko asai sailakü noin!”

²⁵Nungai ngüso apa tü nyailut. Lüko tilai hoi nou soilükhun-in Yisu menyiuthso nou saitaiu nai napküta apa tü pha nai thalo naiuso menyiuthso nou chuo.

²⁶Nung ngiongem nou shingkhannio apemai pengkü khun.

²⁷Yisu nung athang ainou khunai, niopek khaiunia nime apa phiai hoilutkü, shiküta vekü ngiom, “David Thso, sam tü atsüojin!”

²⁸Tilai Yisu tsammongai nap, niopek nime nou apa dongai shinai Yisuüh ngüne tü ngiom, “Ngü aje lomeikiuao shio-e ta yangji süne?” Ngüneüh apa tü, “Ah, APAOU!” ni lomeiau shio-e ta yangji ta thashin.

²⁹Nungai Yisuüh ngüne niovei ai thankü ngiom, “Ajeüh monglamtsünli aje tü lüchhi!”

³⁰naiuso ngüne niovei sat. Nai Yisuüh ngüne tü nung “sau hao lachite!” ta thatü mongkü ngiom.

³¹Lüko ngüneüh khuküta, shingkhannio apemai nung ngiongem nou pungpengkü noiküla.

³²Khaiunia nime nou shikhuwantsün tao, khaiunia ajantsoüh angei onthso nou thaloutsün leijeb khaiunia tsak apa dongai nialoukü shin.

³³Lüko tilai angei onthso nou koman, leijeb khaiunia nou ngio singioau yalonai hoi ngakü ngiom. Ngüsoüh lekkatkü samüh “Israel nai nungti tilai tsüepde!” ta vekü ngiom.

³⁴Lüko Farisihoi nou ngiom, “Yisu hau angei onthso nouso komanao oukong kiutsün nung Angei onthso nouso ongko ahei nou noin.”

³⁵Yisuüh noksong naiuso nok nouso apemai lemkü sailukü tsakei. Yihuda kamthang nouso ai Goa nokshing thaiutha Ngem Amei chimkü, naiuso akiasiya in amomo lomeikiukü tsakei.

³⁶Lüko apaüh hoi nou epnai, ngüso thaiutha apa mongai kiakü yangkiu, tiautenai apaüh ngüso onnemok hoi ajimtsün tsühakü tsakeitsünli ep.

³⁷Nungai apaüh sahoi tü ngiom, “Be-eiu yamao eiu songkü noin, lüko achhiau mephaiu nouso thsaothsaokülu.

³⁸Nungtiphe asamüh be-eiuyam APAOU tü apa be-eiuyam mephaiu piakü hongao misao lüsao.”