Read Khiamniungan Naga Mark 10 Bible Online

Mark 10 - Khiamniungan Naga bible

Mark 10

¹Nungai Yisuüh nung athang leankü Yihuda goumchi ai Yordan Haiu yankü khu. Hoi asong tsak ailokü apa dongai kamshinai apaüh asaita chhikü shitsünli ngüso hau tsande.

²Farisihoi ajantso apa dongai shikü lilukü ngiom, “Khaiunia tsaküh apa tsammongnyiu komanau sam Ngiokhem nai ayam noin süne?” “Sam hau achite” ta sang.

³Nungai Yisuüh ngüso tü, “Mosaüh asam hau ti ngiokhem kiu?” ta laoshikü sangshin.

⁴“Khaiunia tsaküh apa tsammongnyiu komanao thaiutha thsam satkü hao shio-e ta Mosaüh ayam sopkium.” Ta ngüsoüh thashikü noiküla.

⁵Yisuüh ngüso tü ngiom, “Asam hao tsandeau thatü chek nou shioko Mosaüh asam thaiutha nung ngiokhem satkiu.

⁶Lüko ayating apung anyim taoko ‘Goa nou ngüso pohai naiuso nyiuhai shan,’ ta nung asiongio nou ngioji.

⁷‘Nung shioko pohai tsaküh meshen po naiuso nyiu lean-e, küta apa tsammongnyiu ko jeiaikü noi-e,

⁸naiuso ngüne nime nou nyih tsak hau iula-e.’ Nungti lotü ngüne nime tsüdeshi, lüko nyih tsaklu.

⁹Nungtiphe Goa nou ti in jeiai-in, nung khaiunia nou lapunge-i.”

¹⁰Tilai ngüso tsamai laokü khun sahoi nousoüh nung thaiutha Yisu tü sang.

¹¹Apaüh ngüso tü ngiom, “Khaiunia tsaküh meshen tsammongnyiu komanküta sauüh menyiu amao jonshi-e, apaüh apa tsammongnyiu thako tsütsamtsütsüokü sunheji.

¹²Nung khekkü, menyiu sauüh meshen tsammongpo ko pungekü amao tsammongpo dongai khuji apaüh tsütsamtsütsüokü sunheji.”

¹³Yisu hao apa pha thanglutkü oukkiu-iao thaiutha, khaiunia ajantsoüh methsohoi niakü shin, lüko sahoi nousoüh khaiuniahoi nouso tü thut.

¹⁴Yisuüh nung ngelanai apaüh sahoi nouso tü mongmatkü ngiom, “Ehen methso nouso jü dongai ashi-i, ngüso lalulao, tiautenai Goa Nokshing nungsoli ün noin.

¹⁵Ngü asam tü atsüoting ngioji, sauhaiüh ehen methso tsakühli Goa Nokshing tsülou-e, tilaitso nungai tsünappe.”

¹⁶Nai Yisuüh methso nouso apa pha nou pipkü, ngüso oukkiu.

¹⁷Yisu loüh apa yamai tsalokü khutsün taonai, khaiunia tsak apa dongai kopkü shikü apa khako kaukü sang, “Atsandetsün Amei, asai aa nou epao thaiutha ngü ti chhi-e?”

¹⁸Yisuüh apa tü sang, “Tiauta ni ngü tü amei ta jonji?” “Goa tü simkü sau amei tsünoi.

¹⁹Ni ngiokhem nouso ngen: ‘Laloat; tsütsamtsütsüo lachhi; kao nou lakao; atsüotsüdekü mi lakiu; akhunattsün lachhi; Apo naiuso anyiu asu lühat.’”

²⁰Nai memei nou Yisu tü ngiom, “Atsandetsün,” “nung ngiokhem nouso chikü ngü methso nai yakü kankeikü shin.”

²¹Yisuüh apa tü tsüojinkü thapkü ngiom, “Ni tsak linlinlu pouji. Khukü ni taiutsün apem lüjan küta nung chai nou tsosiluhai hao lükiu, naiuso ni aün nai memeiting noi-e; küta shikü jü phiai ohoilut.”

²²Tilai nung ngio apaüh lula, apa kha maosangkü khemkü nap, naiuso tsümonglengkü khuwan, tiautenai apa thatü memei khaiunia tsak noiküla.

²³Yisuüh apa sahoiso tü lemkü thapkü ngiom, “Memeihai Goa Nokshing nai nappao titi achekteng noi-e!”

²⁴Nung ngio lulanai sahoi nouso lekkat, lüko Yisuüh tsülaokü ngioji, “Methsoso, Goa Nokshing nai nappao titi achekteng noin!

²⁵Memeihai Goa Nokshing nai nappao noukoto, nyat ang thsatkü lon tsak shikhuao shiothso.”

²⁶Nung ngio nouko sahoi nouso thatü ngakü tsaküh tsak tü sangkü ngiom, “Naito, sau kipsanao shio-e?”

²⁷Yisuüh ngüso tü langlutkü thapkü thashin, “Khaiunia thaiutha to nung tsüshiokün noin, lüko Goa thaiutha tsüde; Goa thaiutha to alum ashiotsün noin.”

²⁸Nai Peterüh apa tü ngiom, “Athaplu, samüh alum wankü aphiai hoilut.”

²⁹“Ah,” ta Yisuüh ngüso tü ngiom, “ngü asam tü ngioji, sauüh tsam lüko, deisinio lüko, nousinio lüko, posinyiu lüko, thsoso lüko, eiu lüko, jü thaiutha naiuso ngem amei thaiutha wannan,

³⁰apaüh lo nung vetaoko nung tü tekkü piakü epshi-e. Apaüh tsam, deisinio, nousinio, nyiu, thsoso, naiuso eiu nouso tsom khaiuai tsom ngoikü epshi-e, naiuso ajeiat lüko eppe; naiuso ashiao vetaoko apaüh asai aa eppe.

³¹Lüko lo chong nouso piakü phiao iula-e, naiuso lo aphi nouso piakü chongao iula-e.”

³²Yisu naiuso apa sahoiso Yirusalemai sungkhutsün taoko, apa sahoi ti thawao-e nung thaiutha hatkü tsakeitsünko apa ngüso khaai khukü noiküla; nai ngüso phiai hoiluttsünso ahat nou miankü noiküla. Loühjam Yisuüh apa sahoi chekü nime nouso jonkü apa tü thawaoau noitsün thaiutha ngiom.

³³Apaüh ngüso tü ngiom, “Anglu,” “Sam Yirusalem ai sungji, nungai Khaiunia Thso atengting mesonhoi naiuso Ngiokhem tsandetsünso phamongai thumkü kiuwan-e. Ngüsoüh apa e-ao lochilotsao-e naiuso Melemaohai hao thumkü lethiowan-e,

³⁴ngüsoüh apa lochilotsao-e, lei thuplut-e, shiuh-e, küta apa loat-e; lüko samnyi phiai apa ahkü shi-e.”

³⁵Nungai Zebedi thso, Yakob si Yohan ne Yisu dongai shikü ngiom, “Atsandetsün,” “Samüh ni hau sam thaiutha chhikiu-iao tso tsak noin.”

³⁶Yisuüh ngüso tü sang, “Nung ti in chhi noin?”

³⁷Ngüsoüh apa tü, “Ni tilai ni ün ajinka Nokshing noikham nai noi-e, sam ni tü uai tsak, naiuso tsatai tsak kü noi-iao samüh aiuji.”

³⁸Yisuüh ngüso tü ngiom, “Asamüh ti thaiutha saoji nung tsünge. Ngü sübao angja thengkam nai shiu-e nung thengkam ko asamüh shiuao shio-e mo? Nungti tsüdekünai ngo limao noitsün aküo li nouko, asam limao shio-e mo?”

³⁹Ngüneüh apa tü, “Samüh shioji” ta thala. Yisuüh ngüso tü ngiom, “Ngü sübao thengkam nai shiu-e asamüh shio-e, naiuso ngo ti alimtsün nouko lim-e nungko asamüh lim-e.

⁴⁰Lüko jü uai naiuso jü tsatai sau noi-e nung ngü chosankiuao ayam tsüde. Nung athang sauhai hao kiuao khemkü taium nung kiuao nou Goa noin.”

⁴¹Tilai amao sahoi che nousoüh nung thaiutha lulan, ngüso Yakob si Yohan netü mongmat.

⁴²Nungtiphe Yisuüh ngüso apem apa dongai jonshikü ngiom, “Sauhaiüh Melemaohai khako nokshingji, naiuso oukong noin asamüh ngen.

⁴³Lüko asam ongko to ayam nou nungti tsüde. Asam ongko tsaküh aniakei theao aiunai, apa to apem ongko ayathsüotsün theao noin;

⁴⁴naiuso asam ongko tsaküh chongting theao aiunai, apa to apem ongko sua theao noin.

⁴⁵Tititenai Khaiunia Thso lüko yathsüo-iao tsüde, lüko yathsüoao naiuso khaiunia piakü shiosanau apa aa kiuao shin.”

⁴⁶Ngüso Yeriko ai shinnai Yisu apa sahoiso naiuso hoi asong tsakko akhuwan noiküla, nungko Timaeus thso niopek Bartimaeus, asaohetsün tsak, yam etsai mokkü noiküla.

⁴⁷Tilai apaüh nung Nazaret hai nou Yisu ta lula, apaüh weao yachu, “David thso, Yisu! ngü tü atsüojin anoikiu!”

⁴⁸Nungai apa nyankü noianao khaiunia piakü nou apa tü thut. Lüko apaüh tekkü songkü weshikü ngiom, “David Thso, Ngü tü atsüojin anoikiu!”

⁴⁹Yisu laokü tsaküta ngiom, “Apa lüjon.” Nungtiphe ngüsoüh niopek khaiunia nou jonkü ngiom, “Mong songkü lüthe!” “Atsalu, apaüh ni tü jonji.”

⁵⁰Nungai apaüh apa ne wankü hamkü Yisu dongai shin.

⁵¹Yisuüh apa tü sangkü ngiom, “Ngü athaiutha ti chhikiu-iao aiuji?” Niopek nou apa tü thalan, “Atsandetsün, Ngü loüh epao aiuji.”

⁵²Yisuüh apa tü ngiom, “Lükhu,” “Ni amonglamüh ni alomei ep-iu.” Nungai apaüh epkü Yisu tü hoilutkü yamai khu.