Read Khiamniungan Naga Mark 12 Bible Online

Mark 12 - Khiamniungan Naga bible

Mark 12

¹Nungai Yisuüh ngüso tü athatlu ngionai chite: “Atao tsak ko khaiunia tsaküh Sainaoshep eiu ah, nung lemkü ai nou ai kü taiu, naiuso anoipekao khan tsak thaiuküta, ajimao koilop tsak lahkü taiu. Küta apa nung sainaoshep eiu a-tsünso hao apaotsangao taiukiukü goumchi amao tsakai süme iuwan.

²Tilai sainaoshep panao atao saojikan, apaüh achhitsünso ainou sainaoshep apa ün be-eiuyam haoson luao ngüso dongai tsamki tsak hong.

³Achhitsünsoüh tsamki nou thaloukü thio, küta tsosa hongshian.

⁴Nai eiu-pao nou amao tsamki tsak hongshin; naiuso achhitsünsoüh apa khaiu ai thio, küta alomiam kiukü kankei.

⁵Eiu-pao nou loüh tsamki amao tsak hongshin, naiuso ngüsoüh apa loatkü wan; amaohai lüko piakü ngüsoüh ajantso da thio, naiuso ajantso loatkü nung khekkülu kankei.

⁶Tsak linlin poishitsün nung apaüh thatü tsüojintsün Thso nou noiküla. Aphiteng nai apaüh achhitsünso dongai apa thso hongkü ngiom, ‘Ngüsoüh jü thso hao asuhat noi-e ta ngo monglamji.’

⁷Lüko achhitsünso ngüso si ngüso jetko chitekü ngiom, ‘Nung eiu-pao nou thso tengkam noin. Ashi, samüh apa loatko, küta tengkam nou samüh the-e!’

⁸Nungtiphe ngüsoüh Thso nou thaloukü loatkü, apa miapem sainaoshep eiu ainou yakkan.

⁹“Naito, sainaoshep eiupao nou ti chhi-e?” ta Yisuüh sang. “Apa shikü achhitsünso loatküta nung sainaoshep eiu nou amao achhitsünso hao kiuwan-e.

¹⁰Asamüh asiongio nung velukü noi-e? ‘Tsamlahoi nou sübao lung atheao tsünoi ta wanan nung apem chiko tsamno kheam atengtingao iula.

¹¹Nung APAOU nou chhikü noiküla; nung athapao titi athanga tsak noin!’”

¹²Yihudahai aheihoi nousoüh Yisu thalouau yam, tiautenai athatlu ngio nou apaüh ngüso thako chiten ta ngüsoüh ngesan. Lüko ngüso hoi asong nou lun hat nou shioko, ngüsoüh apa wankü khuwan.

¹³Farisihoi ajantso naiuso Herodhoi ongko mepem ajantso Yisu ngionai aphio thalouau ngiosang kankü apa dongai hong.

¹⁴Ngüso apa dongai shikü ngiom, “Atsandetsün, amao khaiuniahoi nousoüh ti yangji nung thaiutha ayangelat tsünoikü ni ngiotsüo ngioji ta samüh ngeji. Ni khaiunia kha tsüthapji, lüko ngiotsüo nai Goa nou mongchiotsün yam hanji. Romhai Nokpao Caesar hao liukim kiutsün nung sam Ngiokhem nai ayam noin süne tsünoi? Samüh kiu-e süne tsükiu-e?” sam hau achite.

¹⁵Lüko Yisuüh ngüso akaosai ngekü ngüso tü thalan, “Tiau asamüh ngo liluao koweji? Jü dongai son tangka tsak akanjikan, küta ngo nung tü thapko.”

¹⁶Ngüsoüh son tangka tsak kankü shin, naiuso apaüh ngüso tü sang, “Nung sau khasinio sotsom naiuso sau niansat?” Ngüsoüh, “Nung Romhai Nokpao Caesar” sotsom ta thalan.

¹⁷Nungtiphe Yisuüh ngiom, “Naito mein, Ti Nokpao Caesar ün noin nung Nokpao Caesar hao lükiu, naiuso ti Goa ün noin nung Goa hao lükiu.” Nai ngüso Yisu tü thatü ngawan.

¹⁸Nungai e ainou tsü ahshi-e ta ngiotsün Sadokihoi ajantso Yisu dongai shikü ngiom,

¹⁹“Atsandetsün, Mosaüh nung ngiokhem sam thaiutha satkiu: ‘Khaiunia tsak thsohai tsühakü tsammongnyiu poitaiukü eannai, nung anio nou tsamsigoh yange nungtiphe ngüne thso hanai nung adei nou thsoau noi-e.’

²⁰Atao tsak ko adeianio melo chinyat noiküla; petche nou menyiu tsak tsamsigoh yang, lüko thso tsühakü ean.

²¹Nai nime nou nung menyiu tsamsigoh yangshi, naiuso apa lüko thso tsühakü ean; naiuso süme nou lüko nungtilu. Thso süme nou tü lüko nungtilu thawao,

²²naiuso amao apoi nouso tü lüko nungtilu thawao: Nung deisinio chinyat nouso apem nou nung menyiu tsamsigoh yang naiuso thso tsühakü ean. Aphiteng nai menyiu nou ean.

²³Eanhai apem ahkü shitsün ajekhaiu konai nung menyiu sau tsammongnyiu noi-e? Tiautenai ngüso deisinio chinyat nousoüh nung menyiu tsamsigoh yang.”

²⁴Yisuüh ngüso tü thalakü ngiom, “Asam titi tsüthakünai noin! Nung tiau asamüh ngemo? Tiautenai nung asamüh Asiongio tsüdekünai Goa oukong tsünge nou shioko noin.

²⁵Tititenai tilai eanhai ahkü shi-e, ngüso aün nai aünhonghoi khekkü noi-e naiuso tsamsigoh tsüyang-e.

²⁶Lo eanhai ahkü shiao thaiuthako, Mosa Thsam nai, pai-eng nai in nyaisantsün thaiutha ngiotaiutsün velukü tsünoi süne? Nungko ‘Ngo Abraham Goa, Isak Goa, naiuso Yakob Goa,’ ta Goa nou Mosa tü ngiom ta satkü noin.

²⁷Apa eanhai Goa tsüde, aa noinso Goa noin. Asam thumkü tsüthakünai noin!”

²⁸Ngiokhem tsandetsünso ongko tsak nungko ngüso sangetsün angkü noiküla. Yisuüh Sadokihoi hau athashitsün amei tsak kiutsün ep, nungtiphe apa Yisu dongai asangtsün tsak kankü shikü ngiom: “Apem chiko Athoilut atengting nou sübao?”

²⁹Yisuüh thalakü ngiom, “Oh Israel, Anglu! ‘Apem chiko atengting tsak nou nung, APAOU sam Goalu APAOU noin.

³⁰APAOU a-Goa tü among athum nou, a-onthso athum nou, amongyang athum nou, naiuso a-oukong athum nou, lütsüojin.’

³¹Athoilut atengting nime nou nung noin: ‘Aphaosipo tü ni apim tü tsüojintsünli lütsüojin.’ Nungne chiai songkü athoilut atengting amao tsünoi.”

³²Ngiokhem tsandetsün nou Yisu tü ngiom, “Atsandetsün, ni meikü chhi-iu! Ni ngiotsün nung atsüo noin, APAOU lu Goa noin naiuso nungai apa tü simkü amao Goa tsünoi.

³³Naiuso khaiunia mong athum nou, mongyang athum nou, naiuso oukong athum nou, Goa tsüojinao noin; naiuso apaüh meshen pem tsüojintsünli apa phaosipohai tsüojinao noin. Goa hao thainian loatkü chaithio kiutsün konai nung athoiluttsün nime nou angio angtsün atengting.”

³⁴Yisuüh apa mongthat meikü thalatsün ngekü Ngiokhem tsandetsün tü ngiom, “Ni Goa Nokshing ainou laiukü pungekü tsünoi.” Nungphiai to khaiunia sauühtso Yisu tü tso sangao tsüsomshi.

³⁵Yisuüh Amkham tsamnai tsandenai sang, “Messia nung David thsaosithso ta titi Ngiokhem tsandetsünsoüh ngioji?

³⁶Asio Onthso nou David lotsüokü ngio-in: ‘APAOU nou jü APAOU tü ngiom: Ngo a-ehso ahok khemai motaiukün lektso, Ni nungko jü uai anoi.’

³⁷David apa pemüh apa tü ‘APAOU’ ta jon, naito Messia nung titi David thsaosithso theau shio-e?” Hoi asong nou Yisu tü monglingkü angkü noiküla.

³⁸Apaüh tsandekü ngiom, “Sauhaiüh phakhut alaiu thokü chaikam thang nouso ai asuhat kiukü salam aiuji, nung Ngiokhem tsandetsünso thaiutha lütsüolo.

³⁹Ngüsoüh Yihuda kamthang nouso ai naiuso nyungkam nai noikham ameiting nou aiuji.

⁴⁰Ngüsoüh jihihoi thangmangji naiuso ngüso tsamai alum lowanji, naiuso akaosai nou ngioyak laiulaiukü misao saokü hanji!”

⁴¹Yisu amkham chaikamtaiutsün khako moknoi, apaüh khaiuniahoi nou titi chaikamtaiutsün nai tangka thioji nung thapkü noiküla. Memeihai piakü nou momoüh taiutsünli tangka piakü thio;

⁴²nungai tsosilu jihi tsak shikü, apaüh taiutsün poisa nime nou chaikamtaiutsün nai thio.

⁴³Nai Yisuüh apa sahoiso apa dongai jonkamkü ngüso tü ngiom, “Atsüoting ngü asam tü ngio-e, Chaikamtaiutsün paidan nai thiotsünso ongko, nung tsosilu jihi nou thiotsün chaithio tekkü piatso.

⁴⁴Tititenai amao nouso apemüh momo thaiutha singtaiu loküta poisantsün thio, lüko apaüh meshen tsosilu ainou apa taiutsün apemapa aakih ko theau taiutsün apem kiuwan.”