Read Khiamniungan Naga Mark 13 Bible Online

Mark 13 - Khiamniungan Naga bible

Mark 13

¹Yisu Amkham Tsam ainou sungnai, apa sahoi ongko tsaküh ngioji, “Atsandetsün, Athaplu! Nung tsam nouso naiuso lung nouso titi athanga!”

²Yisuüh apa tü thala, “Nung tsam asong nouso ni epjimo? Nung lung tsak lüko apa ataiuthang ko tsakü tsünoi-e; nungso apem salian-e.”

³Yisu Olip King nai Amkham Tsam tü lashikü moknoi nai, Peter, Yakob, Yohan naiuso Andria so akao ai shikü apa tü sang.

⁴“Nung tilai thawao-e,” “naiuso nung chikü thawaoau naiuso atao shimkü shinai ii nou ti noi-e, sam hau achite.”

⁵Yisuüh ngüso tü ngiom, “Sau hao asam asapthionai tsünialükhun-iao lütsüolu.

⁶Khaiunia piakü nou, ‘Ngo apa ta!’ chitekü shi-e, naiuso ngüsoüh khaiunia piakü sapthio kiu-e.

⁷Naiuso tilai asamüh ashimko naiuso laiukü nai ehlihetsün ngiongem lu-e, nungai asam lalekkat. Nungti nou thawaoau noin, lüko nungüh athon shisaokü noin ta tsüde.

⁸Shingkhannio tsaküh shngkhannio tsak ko ehli-e, naiuso nokshing tsak nou nokshing tsak thako ehli-e. Athang alumai gohhaiu haiu-e; naiuso nungko naiusile nou noi-e. Nungso nyiuhai methso chetau nai chongting akia yalotsün khekkü angja ayachu.

⁹“Asam lüko momo thaiutha lütsüolu. Tititenai ngüsoüh asam kelokü mikhemthang nai kankü khu-e. Asam Yihuda kamthang nouso ai woi-at-e; asam nokshing nouso naiuso nokpaohoi nouso khako jü thaiutha mitha kiuao tsa-e.

¹⁰Lüko athon moshikün khako ngem amei nou khaiuniathso apem tü chimkü hao noin.

¹¹Naiuso tilai ngüsoüh asam mikhemthang nai nialokü khu-e, asamüh ti chite-e ta atao mosaokünai layangelat; tilai atao nou shi-e, asam hao nungtaoko tilüsong ngioau kiu-e nung lüchite. Tititenai asamüh chitetsün ngio nung asam ngio tsüde; lüko nung Asio Onthso ainou shi-e.

¹²Khaiunia nou meshen deisinioso ean-iao thumkü kiukü janhe-e, naiuso po nousoüh lüko thso nouso ean-iao thumkü kiuwan-e. Thso nouso ngüso posinyiu thako tsalo-e naiuso ngüso ean-iao thumkü kiuwan-e.

¹³Jü thaiuthako khaiunia apemüh asam tü chinyan-e. Lüko sauüh athon saokü jeilu-e apa kipsan-e.

¹⁴“Tsümeikün ‘Achinyanting’ nou apa tsaao tsütinkün thangko tsakü asamüh eppe” (sauüh veji: nung avetsün nou ti thaiutha ngioji ta meikü lüngela!) “Nai sauhai Yihuda nai noin ngüso king nai khuwanao noin.

¹⁵Khaiunia sau tsamkhaiu nai noin, apaüh tsammong ainou tso jengtsaiu loau atao lawan.

¹⁶Khaiunia sau eiu-ai noin, apaüh tsam ainou neh loau laya.

¹⁷Nung vetaoko pem tsükengkün menyiuhoi naiuso nyaochepnio suntsün nyiuhoi thaiutha inyate!

¹⁸Nungso thsonga taoko tsülathakü hao asamüh Goa da misao lüsao.

¹⁹Tititenai nung angja ajekhaiu nouso Goa nou goum aün saitsün tao ainou lo saokü nouko angjatsün tü tekkü tsaokü noi-e, naiuso nung khekkü tilaitso tsünoishi-e.

²⁰Lüko APAOU nou nung ajekhaiu haove nouso lothsaokiu-iu; apaüh tsülothsaokiu tünto, khaiunia sau tsükipsanela. Apa achosan khaiunia thaiuthako apaüh nung ajekhaiu nouso lothsaokiu.

²¹“Nai khaiunia ajantsoüh asam tü, ‘Athaplu, Messia nou nungko noin!’ tsüdekünai, ‘Apa nungai khukü noin!’ ta ngionai apa da lamonglam.

²²Tititenai atsüotsüdekün Messia, naiuso e-po nouso sunge. Shionaito, Goa ün achosanhoi lüko sapthiokiuao ngüsoüh ii naiuso athanga nouso chhi-e.

²³Asam thaiutha lütsüolu! Ngü aya aita asam hao alum chite-aniu.

²⁴Nung ajekhaiu, angja omhe yanlükhunkütün phiai aje nou nyakhem-e, naiuso alei nou awon tsünoishi-e,

²⁵kianthsüo nouso maou ainou salian-e, naiuso maou ainou oukong nouso saiukei-e.

²⁶Nungai Khaiunia Thso thengmia nai oukong naiuso ajinka asong hakü shitsün eppe.

²⁷Nai Apaüh honghoi nouso goumchi aniokun püle athon tsak ainou athon tsak saokü Goa ün achosan khaiuniahoi niakamao hong-e.

²⁸Lo latpai ainou apa athatlu ngio lüngelo. Tilai apa akia nai asun iulakü asha nou sungji, asamüh asaiu shimkü noin ta ngeji.

²⁹Nungti asamüh nung shinaptsün epnai; atao shimkü, tsaloau khemkü noin ta nge-e.

³⁰Lo noitsün khaiuniahoi moeankün khako nung chikü thawao-e ta lüyangshi.

³¹Aün naiuso goumchi yankü khuwan-e, lüko jü ngio tilaitso yankü tsükhu-e.

³²“Nung ajekhaiu tsüdekünai atao shiao thaiutha Po nou tü simkü aün nai honghoi nou lüko, Thso nou lüko, sauüh tsünge.

³³Asam jiokü, thsümonkü lünoi, tititenai atao nou tilai shi-e nung asamüh tsünge.

³⁴Nung khaiunia tsak apa tsamkihoi hao apaotsang taiukiukü amao goumchi ai süme iutsün khekkü noin, apaüh khaiunia pungkü hao momo chhi sonkiu, küta koukhan jimtsünso tü lüko thsümonkü lünoi ta ngiom.

³⁵Nungtiphe thsümonkü lünoi, tiautenai tsampao nou asham süne, ahom süne, anyiwem süne, waiko tao süne, tilai shi-e asamüh tsünge.

³⁶Apa alekta shinai asam sailakü tsüepao noin.

³⁷Ngü asam tü ti ngioji, nung chikü tü ngioji: Jiokü lünoi!”