Read Khiamniungan Naga Mark 14 Bible Online

Mark 14 - Khiamniungan Naga bible

Mark 14

¹Lo nenyi noikütün phiaito phoplao tsüthiokü nou Aasantsün sümai saoheao noiküla. Atengting mesonhoi naiuso Ngiokhem tsandetsünsoüh Yisu titi akaoai thaloukü, loate ta yam.

²“Hoi ongko ngem sunge ta noin, nungtiphe sümai taoko naito lachhiko” ta ngüso chite.

³Yisu Bethani nai je sungtsün Simon tsamai chih hekü moknoikünai, nyiuhai tsaküh tangka piakü mai angannyam khaiutsom meng athaiu tsakko kankü shi, naiuso apaüh meng nou thiopaiküta Yisu hau khaiu nai tsomkiu.

⁴Lüko ngüso ongko khaiunia ajantsoüh mongkiakü ngiom, “Chaiou khaiutsom nung tiau nungti lupenganji?

⁵Tititenai khaiutsom nung tangka tsom süme thatso he janküta, tsosiluhai hau kiu-ela!” Naiuso ngüso nyiuhai nou thako thatü namnam.

⁶Lüko Yisuüh ngiom, “Apa nungti ataiuwan! tiau asamüh apa tsonjek kiuji? Apaüh ngü hau chhi amei chhikiu-iu.

⁷Tititenai tsosiluhai asam ko asai noi-e, naiuso tilailünou asamüh ngüso da hachuau shio-e. Lüko ngo to asam ko asaita tsünoiha-e.

⁸Apaüh ti shio nung chhin, apaüh ngo khannao thaiutha atao mosaokünai jü pem khemtaiuao khaiutsom tsomkium.

⁹Atsüoting ngü asam tü ngioji, goumchi tilüsongai ngem amei nou chime, nung nyiuhai nou chhitsün thaiutha yangsankü chite-e.”

¹⁰Yihuda Iskariot, sahoi chekü nime ongko tsaküh atengteng mesonhoi nouso hao apa janheao thaiutha ngüso dongai khu.

¹¹Tilai ngüsoüh Yihuda Iskariot ngio lula, ngüso mongling, naiuso apa hao tangka kiuao thalo. Naiuso apaüh Yisu ngüso hao janthioau ayam nou yam.

¹²Phoplao tsüthiokün Themtsai Sümai ayalonyi nai, ngüsoüh aasantsün sümai thaiutha onnemokthso nouso loattsün nyi, apa sahoisoüh apa tü ngiom, “Ni Aasantsün Sümai heau lümeikü samüh tiai khukü khemlo-iao aiuji?”

¹³Nungai Yisuüh apa sahoi nime tü nungti thilutkü hong, “Noksong nai lünap, naiuso nungai khaiunia tsak khiam meng kankü asam ko phete-e. Apa phiai thaiukü lükhu küta,

¹⁴apa napiutsün tsampao tü lüngio: ‘Atsandetsün nou ngioji, Ngü jü sahoi ko Aasantsün Sümai heao nou tsampai tiai noin?’

¹⁵Nai Apaüh asam hao asongthon tsampai asong tsak jengtsaiu nou saiukü hakü khemtaiutsün hane; nungai sam thaiutha khemkhukü lütaiu.”

¹⁶Sahoi nou noksong nai khu, naiuso apaüh ngüso tü ngiotsünli epiu, naiuso ngüsoüh Aasantsün Sümai nou khemkhu.

¹⁷Ahsham Yisu apa sahoi chekü nime nou hakü nungai shi.

¹⁸Ngüso heshiukü moknoinai, Yisuüh ngiom, “Atsüoting ngü asam tü ngioji, Asam ongko ngüko heshiutsün tsaküh ngo janthio-e.”

¹⁹Sahoi nouso monghenau yachu, naiuso tsaküh jam tsaküh jamkü apa tü sang, “Nung ngü süne tsüde?”

²⁰Yisuüh thashin, “Asam chekü nime nou ongko sauüh jü chiu nai apa themtsai thsomthioha-e, nung khaiunia noi-e.

²¹Tititenai Khaiunia Thso apa thaiutha asiongio nai satkü taiutsünli ean-e; lüko sau tsangkü Khaiunia Thso janthio-e, nung khaiunia nou thaiutha inyate! Nung khaiunia thaiutha apa tsüchetkü noian chenthso!”

²²Ngüso chih henai, Yisuüh themtsai nou lou, naiuso nianlom kiukü nung ngeppekkü ngüso hao kiukü ngiom, “Asamüh lühe, nung jü pem noin.”

²³Loüh apaüh thengkam nou lou, naiuso nianlom kiuküta, ngüso hao kiu, naiuso ngüso apem nou nung shiu.

²⁴Apaüh ngüso tü ngiom, “Nung jü she sübao piakü thaiutha lopengji, naiuso ayan athalu-etsün she noin.

²⁵Atsüoting ngü asam tü ngioji, Ngü theng ayan nou Goa nokshing nai moshiukün lektso nung theng tsüshiushi-e.”

²⁶Ngüsoüh jih tsak jih küta, Olip king ai sung.

²⁷Yisuüh ngüso tü ngiom, “Asam chikü nou ngü leankü khuwan-e, tititenai nung asiongio nai satkü taim, ‘Goa nou Onnemok jimtsün loat-e, naiuso onnemokhoi penglükhunan-e.’

²⁸Lüko ngo ahkü shikütün phiai asam khako Galil ai khu-e.”

²⁹Peterüh apa tü ngiom, “Amaohai apemüh lean lüko ngü to ni laitso tsülean-e!”

³⁰Yisuüh apa tü ngiom, “Atsüoting ngü ni tü ngio-e, lüsolu, waio nou müjam mokokünai ni ngo samjam tsüthalo-e.”

³¹Lüko Peterüh thatü mongkü ngiom, “Ngü niko eao noilüko, ngü ni tsüthalokü tsünoi-e!” Sahoi amao nousoüh lüko nungtilu ngiom.

³²Ngüso Getsemane ta jontsün athang tsakai shinai Yisuüh sahoi nouso tü ngiom, “Ngo misao saonai, asam nungko anoikei.”

³³Apaüh Peter, Yakob, naiuso Yohan apako ha-i, naiuso alekta, mongshekliojikan.

³⁴Apaüh ngüso tü ngiom, “Jü onthso eao lümeikü thatü mongsaiuji. Asam nungko anoi, naiuso thsümonkü lünoi.”

³⁵Naiuso apaüh khaai intso soilükhunkü, kauthiokü, shionaito nung angja haoson nou ngo ainou asoilükhun-i, ta misao sao.

³⁶Naiuso apaüh nungti misao sao, “Jüpo! ni alum shioji, nung thengkam ngo ainou akanlükhun; nungti lüko jü mongchio tsüde amongchio lüthe.”

³⁷Naiuso apa shishinai, ngüso sailakü noitsün epkü, Peter tü ngiom, “Simon, ni sailakü noijiso? Ni ghontao tsaktso thsümonkü noiao tsüshioso?

³⁸Asam alilu nai tsüsaliao thsümonkü lünoi naiuso misao lüsao; onthso nou atsüoteng mongchioji, lüko nyih nai outsükong.”

³⁹Apaüh müjam khukü, nung aya ngioyak lu thekü misao sao.

⁴⁰Apa müjam shishinai sahoi nouso sailakü ep, tititenai ngüso niovei sopkü taiuao tsüshio; naiuso ngüsoüh apa tü ti thalaao tsüshio.

⁴¹Apaüh samjam shikü ngüso tü ngiom, “Lo saokü asam sailajiso? Nungüh saiu-iu! Atao nou sao-iu! Athaplu, Khaiunia Thso angeihoi phamongai lethio-iu.

⁴²Atsa, sam khuko, athaplu, ngo janthiotsün khaiunia nou shiji!”

⁴³Yisu ngio chite mothonkünai, Yihuda, sau sahoi ongko tsak noiküla nung shisaom. Apako hoi asong tsak, sah naiuso paiyan semkü atengteng mesonhoi, Ngiokhem tsandetsünhoi naiuso petchehoi nou hongshitsünso hakü noiküla.

⁴⁴Apa janthiotsün nou ngüso hao ii nou tsak kiukü taiu: “Ngü sau da son nai cheppe, nung asamüh yamtsün, Apa lüthalo naiuso eh nou hakü niakü lükhu.”

⁴⁵Yihudaüh shikü thunkü Yisu tü ngiom, “Atsandetsün!” naiuso apa tü son nai chep.

⁴⁶Ngüsoüh Yisu thalouküta kejeikü taiu.

⁴⁷Lüko shimkü tsatsünso ongko tsaküh apa sah tensankü atengteng meson tsamki da hekü apa noukhan heankiu.

⁴⁸Nungai Yisuüh ngüso tü ngiom, “Asamüh sah si paiyan semkü ngo ngiokhem lothetsünsoli thalouao shijiso?

⁴⁹Amkham tsamai ngo asam ko ajekhaiu pungkü tsandekü noiküla, nungai asamüh ngo tsüthalou. Lüko asiongio shinapiao thaiutha nung chite.”

⁵⁰Naiuso sahoi apemüh apa wankü khuwan.

⁵¹Oum tsaküh neh ashethuplu tenkü Yisu phiai hoilutkü noiküla.

⁵²Ngüsoüh apa thalouau kowe lüko apaüh neh wankü tsosa khulükhun.

⁵³Ngüsoüh Yisu atengteng meson tsamai nialokü khu, naiuso nungai atengteng mesonhoi, petchehoi, naiuso Ngiokhem tsandetsünso chikü kamshi.

⁵⁴Peterüh thaiukü khuküta akhengteng meson kam ai napha. Nungai apa ehü nousoko in lamhekü moknoiküla.

⁵⁵Atengteng mesonhoi naiuso achosanhoi apem nou Yisu ean-iao thaiutha apa thako aphio kiuao yam lüko tsüep.

⁵⁶Tititenai piakü nou apa thako atsüotsüdekü mitha nou kiu lüko ngüso ngio tsüjeiai.

⁵⁷Nungai ajantsoüh tsakü Yisu thako atsüotsüdekü ngiom:

⁵⁸“Ngü nung pha nou shantsün amkham tsam lotheankü samnyi nai pha nou tsüshankü nou amao tsak shane, ta apaüh ngiotsün samüh lula.”

⁵⁹Nungti lüko ngüso ngio tsüjeiai.

⁶⁰Akhengteng meson nou ngüso khaai tsaküta Yisu tü sang, “Athako ngüsoüh ti ngioji? nung tü ni titso tsüthalajiso?”

⁶¹Lüko Yisu tsüsingio, naiuso titso tsüthala. Müjam akhengteng meson nou apa tü sang, “Ni Ouk kiutsün Goa Thso, Messia nou süne?”

⁶²Yisuüh thalan, “Ah, ngokha, naiuso asamüh Khaiunia Thso Akhengteng Goa uai moknoitsün naiuso aün nai thengmia nouko shitsün eppe!”

⁶³Akhengteng meson nou apa neshe chipekkü ngiom, “Samüh mitha amao ti tsüposhi!!

⁶⁴Apaüh Goa lotsaotsün asamüh lula-iu. Asamüh ti yangji?” Ngüso chikü nou apa eao maikü noin ta ngio nou jeiai.

⁶⁵Ajantsoüh apa tü lei thuplutao yachu, naiuso apa kha lopuk kiuküta, naiuso apa da shiuh. “Ni da sauüh shiuhji nung angehe ta ngüsoüh ngiom. Ehü nousoüh apa nialo naiuso kha nai patkeikü noiküla.

⁶⁶Peter kamai tsamsu ai noinai, Akhengteng meson tsamki menyiuthso tsak shin.

⁶⁷Peter in lamhekü noitsün epkü apa tü tsüokü thapkü ngiom, “Ni Nazaret hai nou Yisu ko hakü noiküla.”

⁶⁸Lüko apaüh tsüthaloukü ngiom, “Ni ti ngioji nung ngü angetsüo tsüngela.” Naiuso apa koukhan nai sungnai waio nou koh.

⁶⁹Tsamki menyiuthso nou apa nungai epkü nungko tsakü noinso ta loüh sangshi, “Apa lüko ngüso ongko tsak noin!”

⁷⁰Lüko loüh Peterüh tsüthalou. Atao intso noiküta nungko tsakü noinsoüh Peter ta kolutkü ngiom, “Ni lüko ngüso ongko nou tsüde ta phi ao tsüshio-e, tiautenai ni lüko Galil hai noin.”

⁷¹Nungai Peterüh ngiom, “Ngo athesanloukü ngioji, asamüh sau thaiutha ngioji nung khaiunia nou ngo tsünge!”

⁷²Nungailu waio nou müjam nou koh, naiuso Peterüh Yisuüh “waio nou müjam mokohkünai ni ngo samjam tsüthalou-e!” ta ngiotaiutsün yangsan. Naiuso yanghekü thatü shap.