Read Khiamniungan Naga Mark 15 Bible Online

Mark 15 - Khiamniungan Naga bible

Mark 15

¹Ahom peta Atengteng mesonhoi, petche hoi, Ngiokhem tsandetsünso naiuso achosanhoi apem ko ngemloküta, Yisu kekü kankü khukü Pailat hao kiu.

²Pailatüh apa tü, “Ni Yihudahai Nokpao süne?” ta sang. Nai Yisuüh “Ni ngio-iu” ta apa tü thala.

³Atengteng mesonhoi nou Yisu hao ayam piakü nai aphio kiu.

⁴Nai Pailatüh Yisu tü müjam ngiosang nou, “Ni titso tsüthala-e tüta? Ngüsoüh ni hao titithatso aphio kiuji anglu!” ta ngiom.

⁵Lüko Yisuüh titso tsüthala; nungko Pailat ngawan.

⁶Aasantsün Sümai taoko khaiuniahoi nou aiutsün nung akhou tsam ainou tsak sokshiao Pailat sai noiküla.

⁷Nung taoko angem taonai khaiunia loattsün, angem losantsünsoko hakü thaloutsün Baraba ta niankü tsak akhou tsamai noiküla.

⁸Hoi kamshiküta Pailatüh ngüso tü kümi kankeitsünli lükankei ta apa tü sangao yachu.

⁹Pailatüh ngüso tü, “Ngü asam hao Yihudahai nokpao sokiuao asamüh mongchiojimo?” ta sang.

¹⁰Athapao tsüaiukün shioko atengteng mesonhoi nou Yisu apa hao lethiowan ta Pailaatüh thatü meikü nge-en, tiautenai niokia noiküla.

¹¹Lüko atengteng meson nousoüh hoi nou tü lojengkiukü Pailat hao ngüso dongai Baraba sok-iao sang.

¹²Pailatüh hoi asong nouso tü ngiom, “Naito, asamüh Yihudahai nokpao ta jontsün tü ngü ti chhi-iao mongchioji?”

¹³Ngüsoüh loüh, “Apa paiphu nai lülalut!” ta we.

¹⁴Pailatüh ngüso tü, “Apaüh eaolümeikü ti tsümeikü chhin?” ta sang. Ngüsoüh, “Apa paiphu nai lülalut!” ta thatü thsüokü we-en.

¹⁵Pailatüh hoi mongtsamiao yangkü, ngüso dongai Baraba sokkiu. Küta apaüh Yisu tü shiuhküta paiphu nai lalutao thumkü kiuwan.

¹⁶Süpaihoi nou Yisu nokshingpaou tsamsu nai nialokü nap; naiuso ngüsoüh süpaihoi apem jonkam.

¹⁷Ngüsoüh Yisu hao ethang neh tsak tenkiu, naiuso tsaopung nou kandio tsak thsa-ekü shanküta apa khaiu-ai keihi.

¹⁸Nai ngüsoüh apa hao salam kiukü ngiom, “Yihudahai Nokpao aakihlaiukü lünoi!”

¹⁹Ngüsoüh apa khaiu ai pailai nou shiuh, apa da lei thuplut, ngüsoüh kaukü napkü apa tü amkham.

²⁰Tilai ngüsoüh apa lotsaotsün khem, apa ainou ethang neh nou lousan, küta apa hao tenkiu. Nai ngüsoüh apa paiphu nai lalutao nialokü khu.

²¹Yamko Alexander si Rufo ne po, Cyrene hai nou Simon sau noknio ainou shikü ashi noiküla, süpaihoi nou Yisu Paiphu piao thaiutha apa, kojakü khuha-i.

²²Ngüsoüh Yisu Golgotha, “Khaiuou gohthang” ta jontsün nai nialoukü khu.

²³Nungai ngüsoüh Yisu hao theng nouko akho laolutkü kiu, lüko Yisuüh nung tsüshiu.

²⁴Nai ngüsoüh apa paiphu nai lalut, naiuso khaiunia pungkü nou ti in haoson eppe ta, phong dekü apa neshe ngüso ongko sunlo.

²⁵Nung lükao baji nai ngüsoüh Yisu paiphu nai lalut.

²⁶Apa hao aphio kiutsün ngioyak, “YIHUDA HAI NOKPAO.” Ta apa khütha ai paiphu nou tü satlut.

²⁷Ngüsoüh Yisu ko aikü phoklelaple khaiunia nime uai tsak, naiuso tsatai tsak ta lalut.

²⁸Apaüh tsümeikü chhitsünso ongko haoson theha-e ta asiongio nai ngiotsün, nung atsüoting shithawao.

²⁹Shimkü yankeitsünhoi nou ngüso khaiu munkü Yisu lotsaokü ngiom, “Aha! Amkham tsam lotheküta samnyi nouko shanao nou ni!

³⁰Lo achija kipsanloküta paiphu ainou asao!”

³¹Nungti atengting mesonhoi nousoüh lüko, Ngiokhem tsandetsünso hakü ngüso ongko Yisu lotsaokü ngiom, “Apaüh amaohai to kipsan, lüko müshenpem to kipsanao tsüshio!

³²Samüh monglamao Israelhai nokpao, Khrista lo paiphu ainou asao-i.” Naiuso apa ko hakü paiphu nai laluttsün khaiunia nime nou lüko apa lotsao.

³³Anyiwem chekü nime baji ainou süme baji saokü goumchi athum anyakhem nou loipok.

³⁴Süme baji nai Yisuüh sang songkü wekü ngiom, “Eloi, Eloi, lama sabakthani?” “Jü Goa, jü Goa, ni ngo tiau leanji?”

³⁵Nungko shimkü tsanoinsoüh nung lulanai, “Anglu, apaüh Elija jonji!” ta chitekü ngiom.

³⁶Ngüso ongko tsaküh kopkü khukü, lüpoilam nai ehejek khiam chamlutküta, nung kai tsak tü kelutküta, Yisu sonkou ai chinlut kiukü ngiom, “Taiukü anoi! Elija apa paiphu ainou soksanao shi-e süne tsüshi-e samüh thapluko!”

³⁷Yisuüh sang songkü we küta apa ean.

³⁸Amkham tsam asio pou phiai ne khongtaiutsün asongthon ainou asaothon saosaokü nime hao thekü pai-an.

³⁹Süpai ahei tsak sau paiphu dongko tsakü noiküla, apaüh Yisu titi ean nung epkü ngiom, “Nung khaiunia nou atsüoting Goa Thso noiküla!”

⁴⁰Nungko nyiuhai ajantsoüh kumaikü thapkü noiküla. Ngüso ongko Mari Magdalene, naiuso Yakob si Yosep ne nyiu Mari, naiuso Salome hakü noiküla.

⁴¹Ngüsoüh Yisu Galil ai noikünaita, apa phiai hoilut, naiuso apa hachu. Naiuso nyiuhai amao nouso piakü apako hakü Yirusalem ainou shitsünso noiküla.

⁴²Ahsham shinai nung Yihuda Anounyi akhemlutsün ajekhaiu thaiuko noiküla.

⁴³Nungko ayanglu noitsün asonghai tsak Arimathea hai nou Yosep, sau Goa nokshing tü taiukü noiküla, apa mongsongkü Pailat dongai khuküta Yisu pem loau sang.

⁴⁴Pailatüh Yisu eaniu ta lunai ngawan. Nai apaüh süpai ahei nou jonkü Yisu eküta atao laiukü khu-iu süne ta sang.

⁴⁵Pailatüh nung asong khaiunia ainou ngiongem luküta Yisu mia nung Yosep hao kiu.

⁴⁶Yosepüh ashethop ne tuhkü, Yisu mia paiphu ainou lok-ikü tsanlo küta nung lung langsatkü taiutsün etam nai wan. Nai apaüh etam koukhan nai lung asong tsak nou nyanjeikü taiukiu.

⁴⁷Mari Magdalene naiuso Yosep nyiu Marisoüh thapnai, ngüsoüh Yisu miapem tiai wankü noiküla nung ep.