Read Khiamniungan Naga Mark 16 Bible Online

Mark 16 - Khiamniungan Naga bible

Mark 16

¹Yihuda Anounyi shi-ankütünai Mari Magdalene naiuso Yakob nyiu Mari, naiuso Salome soüh Yisu miapem da tsomkiu-au angannyamtsün laoshang tuhlu.

²Ahkü shitsün ayating nyap ajepek tao, ngüso etam nai khu.

³Akhu yamko ngüso tsak si tsak chitekü ngiom, “Etam koukhan ainou lung sam hao sauüh lekkan kiu-e?” (Nung Lung nou thatü songkü noiküla).

⁴Ngüsoüh thapnai nung lung nou lekkankü ep.

⁵Nungtiphe ngüso etam nai napnai, oum tsak ne athaiu thokü Yisu mia-tsan uai moknoikü epkü ngüso lekkatkü ngawan.

⁶Apaüh ngüso tü ngiom, “Lekkatkü lanoi,” “Asamüh Nazaret hai nou Yisu sau paiphu nai lalut apa yamji ta ngo ngen. Apa nungko tsünoi, apa ahkü shi-iu! Ngüsoüh apa wantsün athang athaplu!

⁷Lo lükhu, küta apa sahoiso naiuso Peter hao nung ngiongem lüchite: ‘Apa asam khako Galil ai khuji; apaüh asam tü ngiotsünli nungai asamüh apa eppe!’”

⁸Nungtiphe ngüso yangelatkü naiuso lekkatkü etam ainou khaolaokü khuwan. Ngüsoüh nung thaiutha sau tü titso tsüngio, tiautenai ngüso lekkatkü noiküla.

⁹Yisu e-e ainou ahshitsün Anounyap beta, apaüh angei onthso chinyat koman kiutsün nyiuhai Mari Magdalene dongai sungkü han.

¹⁰Nai apaüh khukü Yisu ko noihatsünso hao chiten. Nungko ngüso mongsaiukü naiuso shapkü noiküla. Naiuso tilai

¹¹Yisu aa noin, naiuso Mari Magdaleneüh apa epiu ta lu, nungai ngüso apa da mongtsülam.

¹²Nungphiai sahoi nouso ongko ngüso nime nokai khukü noinai, Yisuüh mothikü ngüne dongai sungkü han.

¹³Ngüne laokü shiküta nung amao nouso hao chiten, lüko ngüsoüh nung da mongtsülam.

¹⁴Aphiteng sahoi chekü tsak nou chihheao kamnoi nai, Yisuüh ngüso hao sungkü han. Apaüh ngüso tsümonglamtsün naiuso apa ahshikü ep nouso da mong tsülamkün thaiutha ngüso tü thut.

¹⁵Yisuüh ngüso tü ngiom, “Asam goumchi apemai khukü khaiunia apem tü Ngem Amei lüchim.

¹⁶Sauüh monglamkü khiamai lime, apa kipsan-e; lüko sauüh tsümonglam-e, apa tsükipsan-e.

¹⁷Sauhaiüh monglam-e ngüso thaiutha ii nou nungso noi-e: jü nianko ngüsoüh angei onthso nouso koman-e; ngüsoüh ngio amao nou chite-e;

¹⁸ngüsoüh pao thalou lüko, naiuso eao oukong suntsün sheh shiu lüko, nungüh ngüso tü atawaiao oukong tsünoi-e; ngüso phaüh akiahai da thannai ngüsoüh alomei eppe.”

¹⁹APAOU Yisu ngüsoko chitekütün phiai apa aün nai niakü sungkü Goa uai moknoi.

²⁰Sahoi nousoüh alumai chimkü khu, naiuso APAOU nou ngüsoko hakü chhi, naiuso ngüsoüh chimtsün nung ngiotsüo ta ii athanga chhitsün tsangkü mitha kiuji.