Read Khiamniungan Naga Mark 2 Bible Online

Mark 2 - Khiamniungan Naga bible

Mark 2

¹Ajekhaiu intso noikütün phiai, apa Kapernaum ai müjam nap, naiuso apa tsamai noin ta ngio ngempeng.

²Piakü kamshiphe lotü ngüso tsüthsom, koukhanko saokü tsüthsomkü iula, nungko apaüh ngüso tü chimkü noiküla.

³Nung taoko khaiunia püleüh akela kiatsün tsak pikü, Apa dongai kankü shin.

⁴Khaiuniahoi piakü noinou shioko ngüsoüh apa shimkü shiau tsüshio, ngüsoüh Yisu noitsün thakü tsamkhaiu losat, küta ngüsoüh alosat taiu nai akela kiatsün khaiunia saikü noitsün then nou lokthio.

⁵Yisuüh ngüso amonglam eplakü akela kiatsün tü ngiom, “Methso, ni hau angei wankiu-iu.”

⁶Lüko nungai ngiokhemtsandetsün hoi ajantsoüh meshen mongai yangluji:

⁷“Tiau nung khaiunia nou nungti chiteji? Apaüh Goa lutsaoji! Tiautenai Goa noulu angei wankiuau shioji!”

⁸Nungailu ngüso mongai nungti yanghetsün Yisuüh ngekü ngüso tü ngiom, “Asamüh tiauta nungti yangheji?

⁹Akela nou kiatsün tü ‘ni hau angei wankiu-iu,’ ta ngioao shio süne ‘Achu, küta athen pikü lükhu’ ta ngioao shiotso?

¹⁰Lüko goumchi ko Khaiunia Thso nou da angei wankiuao oukong noin” ta asamüh ngeao thaiutha apaüh akela nou kiatsün tü ngiom,

¹¹Ngü ni tü ngioji, “Achu, naiuso athen pikü ashi küta atsamai lükhu!”

¹²Apa chu, naiuso nungailu then kankü ngüso chikü khako shi, nungti ngüso apem ngawan, naiuso Goa nian lomkü ngiom, “Samüh nungti tilaitso tsüepde!”

¹³Yisuüh müjam Galil Khiamnok kou ai khunai, hoi nou apem apa dongai shin, naiuso apaüh ngüso tü tsande.

¹⁴Apaüh yanlükhunnai Alfia thso Levi liukim shitsün nai moknoikü epkü apa tü ngiom, “Jü phiai ohoilut.” Levi tsaloküta apa phiai hoilut.

¹⁵Yisu, Levi tsamai thaisam tsak noiküla. Nungko liukim shitsün naiuso angeihoi piakü Apa ko aikü tsakei, naiuso ngüso piakü apa naiuso sahoi nouso phiai hoilut.

¹⁶Ngiokhemtsandetsün Farisihoi nousoüh Yisu angeihoi naiuso liukim shitsünsoko heshiukü epkü, ngüsoüh apa sahoi tü sang, “Tiau apaüh nung khaiuniahoi nousoko heshiuji?”

¹⁷Yisuüh nung lulanai ngüso tü thala, “Ameilei noinso thaiutha moushe ngepo poukü tsünoi, lüko akia nouso thaiutha poukü noin. Ngo asiohoi tsüde, lüko angeihoi jonao shin.”

¹⁸Atao tsakko Yohan sahoi naiuso Farisihoi nouso keithon misao loukü noiküla, Nai ajantso shikü Yisu tü sangkü ngiom, “Tiau Yohan sahoi naiuso Farisihoi nou keithonji, lüko asahoisoüh to keithon tsülouji?”

¹⁹Yisuüh ngüso tü ngiom, “Tsamsigoh shantsün sümai nai noitsün mesanhoi nouso chih tsühekü hau asamüh yangjiso? Nungti laitso tsüde! Tsamsigoh shantsün ngüsoko noin lektso ngüsoüh chih tsühekü noiau tsüshio.

²⁰Lüko tsamsigoh shantsün ngüso ainou nialoukü khuwanau ajekhaiu nou shi-e, nungai ngüsoüh keithon-e.

²¹“Sauüh nepat akeng nou da ayan tsüchiolutji, tiautenai chiulut naito achiuluttsün ne ayan nou akeng chisatnai asat tsüthathopkü songkü sat-iji.

²²Sauüh theng ayan nyikhun nekong akeng nai tsüthioji; tiautenai thio naito theng nou nyikhun nekong paiyane, naiuso theng si nyikhun nekong nemtso lothean-e. Nungliko theng ayan nung nyikhun nekong ayan nai thioji.”

²³Yihuda Anounyi Yisuüh chonglam eiu ajantso yankü khukü noiküla. Apa sahoi lüko apako khuhanai, chonglam moiheau yachu.

²⁴Farisihoi nou Yisu tü ngiom, “Athaplu, Asahoisoüh Yihuda Anounyi chhitsün nung sam Ngiokhemai tsünoi!”

²⁵Yisuüh ngüso tü ngiom, “Davidüh tso heau naiukü noinai, apaüh ti chhin nung asamüh tilaitso tsüwelu süne? Apa naiuso apa sahoiso naiukü noinai,

²⁶apa Goa Amkham Tsamai napkü Goa hau chaithio kiutsün themtsai he-an. Nung Abiathar akhengting meson noi taoko thawao. Sam Ngiokhem tsangkü naito nung themtsai mesonhoi noulu heau shiokü noikülalüko Davidüh nung heküta apa khaiuniaso hau saokü kium.”

²⁷Yisuüh ngüso tü ngiom, “Khaiunia meiau thaiuthako Yihuda Anounyi nou shan; naiuso Yihuda Anounyi thaiuthako to khaiunia tsüshan.

²⁸Nungtiphe Khaiunia Thso to Yihuda Anounyi khako lüko APAOU noin.