Read Khiamniungan Naga Mark 7 Bible Online

Mark 7 - Khiamniungan Naga bible

Mark 7

¹Yirusalem ainou Farisihoi naiuso Ngiokhemtsandetsün ajantso shikü Yisu lemkü kamshin.

²Yisu sahoisoüh pha tsütsaowankü chih hetsün epla, nung Farisihoi nou tsaowanao noin ta ngio.

³(Tititenai Farisihai naiuso Yihudahai chiküüh ngüso paosipo saisileli pha tsütsaowankü chih tsühe;

⁴tsüdekünai chaikam thang ainou shitsünsoüh chong tsütsaowan naito tsühe: naiuso thengkam, chiusilak, haiuwantsün sai nou piakü ngüsoüh kankeikü noikula.)

⁵Farisihoi naiuso Ngiokhemtsandetsünsoüh, “Tiau asahoisoüh paosipo sai tsükankeikü pha tsütsaokü chih heji?” ta apa tü sang.

⁶Yisuüh ngüso tü ngiom, “Asam akaosai nouso! Asam thaiutha E-po Isaiaüh sattaiu nou titi ayamting: ‘Nung hoi üh son noulu ngo lun hatji, Lüko ngüso mong ngo ainou laiukü pungekü noin.

⁷Ngüsoüh yaang nai ngo tü amkhamji Tititenai ngüsoüh chimji ta khaiunia sai tsandeji.’

⁸“Asamüh Goa ngiokhem wankü, khaiunia saisile kankeiji.”

⁹Yisuüh ngüso tü ngiom, “Asamüh asam saisile kankeiao thaiutha Goa ngiokhem wanji.

¹⁰Tititenai Mosaüh ngiom, ‘Apo naiuso anyiu asu lühat,’ naiuso ‘Sauüh po tsüdekünai nyiu thako tsümeikü chite-e apa eaolu.’

¹¹Lüko asam khaiunia tsaküh apa posinyiu tü jengtsaiu ajantsoüh hachuao shiokü noi lüko ‘nung Korban’ (athat nou Goa haoson) ta ngionai,

¹²apa posinyiu ahachu ainou laoji ta tsandeji.

¹³Nungti asamüh kiunou paosipo ngioshan nou Goa ngio yaangao iula-iji. Naiuso asamüh nung khekkü chhi piakü chhiji.”

¹⁴Yisuüh loüh hoinou apa dongai jonshikü ngiom, ‘Asam chikü nou ngo tü anglu, küta lüyangshi.

¹⁵A-chi ainou napkü khaiunia longeiao ti tsünoi; lüko khaiunia ainou sungtsün noulu longeiji.’

¹⁶“Khaiunia ajantso aluao noukhan pokü noinai apaüh lüang.”

¹⁷Tilai apaüh hoi nou wankü tsamai nap sahoi nou apa tü ngio athatlu thaiutha sang.

¹⁸Yisuüh ngüso tü ngiom, “Asam amaohai chiai shikü ange tsünoi,” “Asamüh tsüngela süne? Tilüsong lünou a-chi ainou naptsün nouto khaiunia tsülongeiji.

¹⁹Tiautenai nung mong pemai tsünapji lüko nung thai ai napkü awantsün nai khuwanji. (Nung ngio tsangkü Yisuüh eheshiu apem heao tin ta tsangsheikiu.)

²⁰Yisuüh ngiom, “khaiunia mong ainou ti sungji, nungüh khaiunia longeiji.

²¹Tititenai akheiai khaiunia mongpem ainou mongyang tsümeikü, mewop, kao, khaiunia luatao,

²²tsütsamtsütsüo, apia aiutsün, sakshi tsümeikü, akaosai, abülom, alutsüaiutsün, Goa lochitsün, amekoi, aiu nung sungji;

²³nung tsümeikü nou apem akhei ainou sungji, küta khaiunia longeiji.”

²⁴Apa nung ainou tsalokü, Tair naiuso Sidon elungai khu. Apa tsam tsakai sungnai apa nungai noin ta khaiunia sau hau tsüngela-i-e ta yang, lüko atsangao tsüshio.

²⁵Lüko nungailu nyiuhai tsak, sau thso da angei onthso sunküla, apaüh Yisu thaiutha lulaküta shikü apa khako kau.

²⁶Nung nyiuhai nou Grik hai, Phoenicia mele ainou noiküla. Apaüh apa thso ainou angei onthso nou akomankiu ta Yisu tü koja.

²⁷Lüko Yisuüh apa tü ngiom, “Methso nouso hao chong awaoshenko; tititenai methso hai eheshiu kankü shikü ji hao yakwaoau ayam tsünoi.”

²⁸Nai nyiuhai nou thalakü Yisu tü ngiom, “Ah, APAOU, methso haiüh thaisampo khemai sa-ikü lupengtsün anelangthso to ji nou lüko heji!”

²⁹Yisuüh apa tü ngiom, “Nung ngio nou shioko lükhu; tititenai angei onthso nou athso ainou leankü khuwaniu!”

³⁰Apa tsamai khunai methso nou angei onthso khuwankü then ai saikü ep.

³¹Loüh apa Tair lung ainou Sidon goumchi yankü khukü Dekapoli elung yankü Galil khiamnok shisaom.

³²Ngüsoüh noukek khaiunia tsak apa dongai nialokü shiküta apa tü pha nou thanao Yisu tü koja.

³³Yisuüh noukek khaiuniahoi ainou pemsa nialokü khuküta apa noukhan ai phakha tsatthiokü, lei nou thoplut küta apa lei ai than;

³⁴küta aün nai thapsankü apa tü ngiom, “Effata” athat nou “lülousat!”

³⁵Apa noukhan sat, naiuso lei ketsün sokkü apaüh thatü meikü chite.

³⁶Nungtiphe Yisuüh ngüso tü nung chhi nou sauhao lachite ta thatü mongkü ngiom, lüko Yisuüh titi ngüso tü mongkü ngiom, nungti tekkü ngüsoüh nok nou miankü ngio nou pungpeng.

³⁷“Apaüh meikü chhi-iu” “tiautenai apaüh noukek hai hao lu-iji, naiuso aiu hai hao ngio singio-iji!” ta ngüsoüh thatü ngakü ngiom.