Read Khiamniungan Naga Mark 8 Bible Online

Mark 8 - Khiamniungan Naga bible

Mark 8

¹Nungphiko atao laiukü mokhukünai amaohoi asong tsak kamshin. Ngüso eheshiu tsütaiuphe, apaüh sahoi nouso apa dongai jonshikü ngiom,

²“Ngo hoi nou thaiutha mongkiakü yangkiuji, tiautenai ajekhaiu samnyi ngüso ngo ko tsülaokü noikü shin, naiuso eheshiu ti tsütaiu.

³Ngü ngüso hau eheshiu tsükiukü tsamai hongnai, ngüso tü yamai keithon-e, naiuso ngüso ajantso to laiukü ainou shikü noin.”

⁴Apa sahoi nou, “Nung aodangkün athang nai khaiunia nungtitso nou thatokao eheshiu saiukü tiai eppe?” apa tü sang.

⁵Yisuüh ngüso tü, “Asamüh themtsai titso kankü noin?” ta sang. “Themtsai chinyat kankü noin,” ta ngüsoüh thalan.

⁶Apaüh hoi nouso tü goh ai moknoiao ngiom. Nai apaüh themtsai chinyat nou semkü Goa hau nianlom kiukü lopek, küta apa sahoisoüh hoi asong hau sunao kiuwan; naiuso nung ngüsoüh hoi hau sunkiu.

⁷Ngüsoko loüh ngou ehen entso noiküla. Yisuüh nungso lüko ouk kiukü, sahoi hau sunkiu-i.

⁸Khaiunia pungkü nou mongtsamkü heshiunungko ngüso khaiunia haove heng püle thatso noiküla. Nung apoi anelang kim chinyat miankü sahoi nousoüh kamshin. Küta Yisuüh khaiuniahoi nouso hongan

¹⁰naiuso apa sahoisoko kheng nai napkü Dalmanutha hai khiamkhan ai khuwan.

¹¹Farisihoi ajantso Yisu dongai shikü apako khengeao yachu. Ngüsoüh apa thalouao aiu, nungtiphe apa Goa ainou noin ta mitha hanau athanga ii tsak chhiau apa tü sang.

¹²Lüko Yisuüh mongngetkü ngiom, “Nung vetao nou tiau ii nou saoji? Atsüoting ngü asam tü ngioji, nung vetao hao ii ti tsükiu-e!”

¹³Apaüh ngüso wankü, kheng nai napküta khiamnok etsai khuao tsalo.

¹⁴Sahoi nousoüh themtsai saiukü kanao pean, naiuso ngüso ko kheng nai themtsai tsaklu kankü noiküla.

¹⁵Yisuüh ngüso tü “tsüolokü lünoi,” naiuso “Farisihai si Herod phoplao thaiutha lütsüolu” ta ngiom.

¹⁶Ngüso si ngüso jetko chitekü ngiom, “Samüh themtsai tsütaiu nou apaüh nung ngioji.”

¹⁷Yisuüh ngüso ti chiteji nung ngekü, “Asam themtsai tsütaiutsün thaiutha, tiauta chiteji? Asamüh lo saokü tsüngelaso? Asam mong ti tsüngelating süne? ta sang.

¹⁸Asam niovei pokü asamüh tsü-epso? Naiuso noukhan poküta asamüh tsülulaso? Naiuso asamüh tsüyangsanso?

¹⁹Ngü tilai themtsai pungo nou heng pungo ongko lopek, asamüh apoisantsün anelang kim titso miankü kamshin?” Ngüsoüh apa tü, “Kim chekü nime.” Ta thalan.

²⁰“Tilai heng püle ongko themtsai chinyat nou lopek, asamüh apoisantsün anelang kim titso miankü kamshin?” Nai ngüsoüh apa tü, “Kim chinyat” ta thalan.

²¹Nai Apaüh ngüso tü, “Lo saokü asamüh tsüngelaso?” ta sang.

²²Ngüso Betsaida ai shinai khaiunia ajantsoüh apa dongai niopek tsak niakü shikü apa da lüthan ta Yisu tü koja.

²³Yisuüh niopek phaai thaloukü nok ainou nialoukü khuküta apa niovei ai lei nou thoplutkiukü apa pha nou thankü, “Ni tso epao shiojimo?” ta niopek tü sang.

²⁴Nung khaiunia nou ngusankü thapkü ngiom, “Ah, Ngo khaiunia epji, lüko ngüso pai tsakeitsünli epji.”

²⁵Yisuüh loüh apa pha nou nung khaiunia niovei nai thanshin. Nung taokonaito nung khaiunia nou thatü thsüokü thap, nai apaüh eptsün oukong shikü alum sasakü ep.

²⁶Yisuüh nung niopek tü, “apa tsamai laokü lakhushi” ta ngiokhem mongkü kiukü ngiom.

²⁷Nai Yisu naiuso apa sahoiso Caesaria Philipi shimkü noitsün nokso ai khu. Akhu yamko apaüh, “Khaiuniahoi nou ngo sau ta ngioji?” ta sahoi tü sang.

²⁸“Ngüso ajantsoüh apa tü, ni Alimkiutsün Yohan ta,” naiuso “amaohaiüh, ni Elija ta, naiuso amao ajantsoüh ni E-po ongko tsak ta ngioji” ta thashin.

²⁹Apaüh ngüso tü, “Naito asam titi?” “Asamüh ngo sau ta ngioji?” ta sang. Peterüh thalakü ngiom, “Ni Aa Goa Thso Khrista.”

³⁰Nai Yisuüh ngüso tü, “Jü thaiutha sauhau lachite ta thatü mongkü ngiom.”

³¹Nai Yisuüh apa sahoiso tü tsandeau tsalo: “Khaiunia Thso thatü omheane, naiuso petchehoi, atengting mesonhoi, naiuso ngiokhem tsandetsünsoüh apa loatkü wann-e, lüko samnyi noiküta apa ahkü shi-e.”

³²Apaüh nung ngiotsüo ngüso hao thatü sasakü chiten. Nungtiphe Peterüh Yisu nialokü khukü thutao yachu.

³³Lüko Yisuüh saküshikü apa sahoiso thapkü Peter tü thutkü ngiom, “Biya, ngü ainou asoian.” “Amongyang nung Goa ainou tsüde, lüko khaiunia ainou noin!”

³⁴Nai Yisuüh apa sahoi nouko hoi nou jonkü ngüso tü ngiom, “Ajantsoüh jü phiai hoilutao aiunaito, apaüh meshen pem be-ankü, apa paiphu pikü, jü phiai ohoilut.

³⁵Tititenai sauüh meshen aa kipsanao aiuji nung mowan-e; lüko sauüh jü thaiutha naiuso ngem amei thaiutha meshen aa mowan-e nung epshi-e.

³⁶Khaiunia nou goumchi athum shiolouküta alum lesan lüko meshen onthso mowan nai ti epshi-e? Nung tilaitso tsüde!

³⁷Tititenai khaiunia nou apa aa liko ti kiushiao tsünoi?

³⁸Nung tsütsamtsütsüokün naiuso Goa tsüngekün vetao nouko, sau khaiunia ngo naiuso jü ngio thaiutha miamsimo-e, Khaiunia Thso nou apa Po ajinka nai asio aünhonghoi nouko shinai apa thaiutha miamsimo-e.”