Read Khiamniungan Naga Mark 9 Bible Online

Mark 9 - Khiamniungan Naga bible

Mark 9

¹Naiuso Apaüh ngüso tü tsülaokü ngiom, “Atsüoting ngü asam tü ngioji, Goa nokshing oukong nai shitsün moepkün lektso nungko tsakü noinso ongko ajantso to tsü e-e.”

²Ajekhaiu louk noiküta, Yisuüh apako Peter, Yakob, naiuso Yohan so, king atsokting tsakai nialokü sung, nungko ngüso pemsa noiküla. Ngüsoüh thapkü noinai, Yisu tü ali-etsün tsak shin

³Apa nese-e oukü thaiukü iulanung goumchi ko nephet khaiunia sauüh nungti thaiukü phetao tsümonkü haoli thatü thaiukü noiküla.

⁴Nungai sahoi süme nousoüh Elija si Mosane Yisu ko chitekü noikü ep.

⁵Peterüh Yisu tü ngiom, “Atsandetsün, sam nungko noiao titi amei! Samüh kamnoi süme athaiutha tsak, Mosa thaiutha tsak, naiuso Elija thaiutha tsak ta shanko.”

⁶Apa naiuso amao nouso thatü hatat nou apaüh ti ngiom nung tsünge.

⁷Nai thengmia tsak shikü ngüso nung soh nou lajei, naiuso thengmia ainou sang tsaküh shikü ngiom, “Nung Jü Atsüojin Thso noinasamüh apa tü lü-ang!”

⁸Ngüsoüh lemkü thapnai amao nouso sautso tsüepshi; ngüsoko Yisu pemsa lu noiküla.

⁹Ngüso king ainou saonai, Yisuüh ngüso tü ngiokhem kiukü ngiom, “Khaiunia Thso e ainou ahkü moshikün lektso, asamüh ti ep nung sauhao lachite.”

¹⁰Ngüsoüh apa ngio ang, lüko ngüso si ngüso ongko “eküta ahshi-e ta ngiotsün nung ti athat?” thaiutha ta sangeao yachu.

¹¹Nai ngüsoüh Yisu tü, “Ngiokhem tsandetsünsoüh Elija chong shiao noin ta ngioji?”

¹²Apaüh ngüso tü thashin, “Atsüoting Elija chong alum khemlokü taiuao shi-e. Külüko Khaiunia Thso thatü angja-e naiuso tsüwesankü wanne ta titi asiongio nou ngioji?

¹³Ngü asam tü ngioji, Elija shi-iu, naiuso apa thaiutha Asiongio nai satkü noitsünli ngüsoüh apa da ngüsoüh aiutsünli kankei.”

¹⁴Tilai ngüso sahoi amao nouso dongai shin, ngüsoüh hoi asong tsaküh ngüso lemjeikü Ngiokhem tsandetsünso ajantsoüh ngüso tü khengekü ep.

¹⁵Tilai khaiuniahoi nou Yisu ep, ngüso thatü ngawan, naiuso apa dongai kopkü khukü apa hao amongling han.

¹⁶Yisuüh apa sahoiso tü sang, “Asam ngüso ko ti khengeji?”

¹⁷Hoi ongko khaiunia tsaküh apa tü thalan, “Atsandetsün, ngü jü thso adongai niakü shin, tiautenai apa da angei onthso noin naiuso achiteau tsüshio.

¹⁸Titaoko nai nung onthso nou apa thalou-e, apa goh ai loianji, naiuso apa son ai leichiomokong shiji, apaüh hou jei-eji, naiuso pem tsolakü iulaji. Ngo asahoiso tü nung angei onthso komanau sang, lüko ngüsoüh akomanau tsüshio.”

¹⁹Yisuüh ngüso tü ngiom, “Asam titi amonglam tsünoikün khaiunia nouso! Ngo asam ko tilektso noi-e? Ngo asam ko tilektso jeilukü noiha-e? Methso nou jü dongai nialokü ashi!”

²⁰Ngüsoüh apa Yisu dongai nialokü shi. Angei onthso nou Yisu epkü thunkü, apa goh ai loi-an-i, nungti apa goh ai leichiomokong sonai shikü chinkei.

²¹Yisuüh apa po tü, “Apa nungti iulakü shitsün atao tilektso?” ta sang. Nai apa, “Methso aita nungti” ta apa poüh thala.

²²“Atao piaküjam angei onthso nou apa khiam nai si in nai hamthiokü mowan-iau kowe. Ni chhiau shionaito, sam tü atsüojinyang nou ahachu!”

²³“Shio-e,” ta Yisuüh thalan, “Ni apemüh shionaito! Amonglam noitsün khaiunia thaiutha alum ashio nou noin.”

²⁴Nungai methso nou poüh wekü ngiom, “Ngü amonglam noin, lüko tsüsaiu. Loüh saiukü taiuao ngü tü ahachu!”

²⁵Yisuüh hoi tsak aikü kopkü shitsün epkü apaüh angei onthso hau ngiokhem kiukü ngiom. “Ni aiu naiuso noukek onthso.” “Ngo ni tü nung methso ainou asungan, küta lotü apa da tilaitso lanapshi ta ngiokhem kiuji!”

²⁶Angei onthso nou wekü methso nou loian-iküta apa ainou shikhuwan. Methso nou eanhai miali iulan, naiuso khaiunia pungkü nou ngiom, “Apa eaniu!”

²⁷Lüko Yisuüh methso nou phanai thaloukü tenchu, naiuso apa tsaküchu.

²⁸Yisu tsamai napkütün phiai, apa sahoisoüh tsamsu ai apa tü sangkü ngiom, “Samüh tiauta angei onthso komanau tsüshio?”

²⁹Yisuüh ngüso tü thashin, “Nungtin to misao noulu komanau shioji,” “amao to tiüh komanao tsüshio.”

³⁰Yisu naiuso apa sahoiso nung athang letaiukü Galil yankü khu. Yisuüh apa tiai noin nung sauhau nge-iao tsüaiu,

³¹tiautenai apaüh apa sahoi tü; “Khaiunia Thso nou khaiuniahoi nouso phamongai thumkü kiuwan-e naiuso ngüsoüh apa loatkü wann-e. Külüko samnyi phiai apa ahkü shi-e,” ta ngiom.

³²Lüko ngüsoüh nung tsandetsün ti alat ta tsüngela, naiuso ngüsoüh apa tü sangao hat.

³³Ngüso Kapernaumai shi, naiuso Yisu tsamai noinai, apaüh sahoi nouso tü, “Asam yamai keitsün taoko ti thaiutha chitekü noiküla?”

³⁴Lüko ngüsoüh apa tü thashiau tsüshio, tiautenai yamai tsakei taoko ngüso ongko sau asongting ta chitekü noiküla.

³⁵Yisu moknoi küta sahoi chekü nime nouso jonkü ngüso tü ngiom, “Ajantsoüh chongau theau aiunai apa chija apemko aphiau lüthe naiuso apem yathsüotsün theau noin.”

³⁶Nai Apaüh methso tsak niakü shikü ngüso khako tsakü noi-i. Apa phaüh nung methso nou piplokü ngiom,

³⁷“Jü nianko sauüh nung methsoli nou monglengkü lou-e, apaüh ngo louji, naiuso sauüh ngo louji, apaüh ngolu tsüde lüko ngo hongtsün lüko louji.”

³⁸Yohanüh apa tü ngiom, “Atsandetsün, khaiunia tsaküh anianko angei onthso nouso komantsün samüh epkü samüh apa lulao, tiautenai apa samhoi tsüdekü noiküla.”

³⁹Yisuüh ngüso tü ngiom, “Apa lalulao,” “tiautenai jü nianko athanga chhitsün loüh shakta jü thaiutha tsümeikü chitekü hao khaiunia sau tsünoi.

⁴⁰Tititenai sauüh sam tü tsükhengshi apa sam dongai noin.

⁴¹Tititenai sauhaiüh asam hao jühoi shioko khiamsang thengkam tsaklu lüko shen-e, atsüoting ngü asam tü ngioji, apaüh apa paopei titilünou eppe.

⁴²“Ngü da monglamtsün nung ehenhoi ongko tsak lüko sauüh amonglam lothe-e apa thaiutha anoipektsün lungpun asong tsak sangnai phanlutkü, khiamnok nai hamthiowan naibao chene.

⁴³Nungtiphe apha nou ni amonglam lothenai, nung pha hesankü lüwan! Pha nemtso pokü inheeng nai khutsün koto pha tsak tsüpokü aa nai khunaibao athaiutha chene.

⁴⁴Nungai ‘ngüso heantsün suong nouso laitso tsü-e-e, naiuso ngüso chetheantsün in nou laitso tsünyate.’

⁴⁵Naiuso ohoküh ni amonglam lothenai, nung hok hesankü lüwan! Hok nemtso pokü inheeng nai nappantsün koto hok tsak tsüpokü aa nai khunaibao athaiutha chene.

⁴⁶‘Nungai ngüso heantsün suong nouso laitso tsü-e-e, naiuso ngüso chetheantsün in nou laitso tsünyate.’

⁴⁷Naiuso anioveiüh ni amonglam lothenai, nung niovei kunsankü lüwan! Niovei nemtso pokü inheeng nai khutsün koto niovei tsaklu pokü Goa Nokshing nai nap naibao athaiutha chene.

⁴⁸Nungai ‘ngüso heantsün suong nouso laitso tsü-e-e, naiuso ngüso chetheantsün in nou laitso tsünyat-e.’

⁴⁹“Aloattsün chaithio nung jem nou losangtsünli, khaiunia pungkü in nou tsangkü losang-e.

⁵⁰“Jem nou amei noin; lüko jem da anya nou mowan nai, asamüh nung titi thekü müjam nya-ishikü shanshiao shio-e? “Asam ongko jem sunkü lünoi, naiuso asam tsak si tsak jetko ajeiai nai aalokü lükih.”