Read Khiamniungan Naga Luk 10 Bible Online

Luk 10 - Khiamniungan Naga bible

Luk 10

¹Nungphiai APAOU nou amao sahoi aochinyatkü nime shingsan, naiuso apa tilüsongai noila, nung nok naiuso noksong pungkü nai ngüso nimeme apa khako hong.

²Apaüh ngüso tü ngiom, “Atsüoting eiu nou anyamsim nyankü noin, lüko mephaiu thsaothsaokülu. Nungtiphe apa eiu ai mephaiu ahong ta asamüh eiupao tü misao lüsao.

³Lükhu! ngo asam chiu ongko Onnemok thsosoli hongji.

⁴Tangka tsop, nekong, tsüdekünai hokkhut, titso lakan; naiuso yamai sau hao salam lakiu.

⁵Sauhai tsamai asam nappe, ‘Aya nai nung tsamko aalu lünoi!’ ta lüngio.

⁶Nungai aalu tso tsak noinai, asam aalu apa da noi-e, lüko tsünoi nai, asam dongai nung müjam laokü shi-e.

⁷Ngüsoüh tilüsong kiu-e asamüh nung heshiukü tsamai lünoi, tititenai achhitsünso to meshen amai epkü hao noin.

⁸Ti noksong ai asam nappe naiuso ngüsoüh asam lou-e asam khako taiutkiutsünli asamüh lüheshiu.

⁹Nungko noinso akiahoi lülomeikiu, naiuso ngüso tü, ‘Goa nokshing asam dongko shimkü shikü noin’ ta lüngio.

¹⁰Lüko ti noksong ai asam napkü ngüsoüh asam tsülou-e, nung ainou sonkengai khukü,

¹¹‘samüh sam hokai suntsün pu asam nok ainou pattanji, nungti lüko nung lüngelu, Goa nokshing shimkü shikü noin” ta lüngio.

¹²Ngo asam tü ngio-e, mikhem ajekhaiu nai nung noksong nousoko hao Sodom hai chenthso-e!

¹³“Korasin, athaiutha titengkü asapat noi-e! Betsaida, athaiutha lüko titengkü asapat noi-e! Tiautenai sübao athanga chhi asam ongko chhin, nung Tair naiuso Sidon nai chhitünto, ngüsoüh nethe tenkü pu tsomlutkü peta mong phokle-ankü noi-ela!

¹⁴Niko naito Goa nou mikhem ajekhaiu nai Tair naiuso Sidon hao atsüojin asong han-e.

¹⁵Naiuso Capernaum! ni aün sungyapkü loksane süne? Ni akheiai napane!”

¹⁶Yisuüh apa sahoi tü ngiom, “Sauhaiüh asam tü angji, nung ngo tü angji, sauhaiüh asam tsülou nung ngo tsülou, naiuso sauhaiüh ngo tsülou nung sauüh ngo hong Apa tsülou.”

¹⁷Sahoi aochinyatkü nime nouso monglingkü shishikü ngiom, “APAOU, angei onthso nousoüh anianko sam tü angji!”

¹⁸Apaüh ngüso tü ngiom, “Aün ainou ahlapli Biya saliantsün ngü ep.

¹⁹Anglu! pao naiuso mekhakhanio khako, naiuso eh oukong apem khako ngamkeiao ngü asam hao oukong kiuji, naiuso ti in nou lüko asam tsütawai-e.

²⁰Nungti lüko angei onthsohoi nou asam tü angtsün nai lamongling, lüko asam nian aün nai satkü noitsün thaiutha bao lümongling.”

²¹Nung taoko apaüh Asio Onthso nai monglingatkü ngiom, “Oh Jüpo, aün naiuso goum APAOU! Nung ni mongsai amei suntsün naiuso ange khaiunia nouso ainou tsangan naiuso ehen methsohoi ongko achiai sungi nou shioko ngü anian lomji: ah, Jüpo, tititenai nungti ni mongchiotsün noila.

²²“Jüpoüh ngo hao apem kiuwaniu, naiuso nung Po nou chiai, Thso sauüh tsünge; naiuso sauhai tü Thso nou achiai sungiao mongchioji, ngüso tü simkü Po nou, sauüh tsünge.”

²³Nungai apaüh laokü shikü sahoi tü akao-ai ngiom, “Asamüh ti epji nung eptsünso thaiumei!

²⁴Tititenai ngo asam tü ngio-iu, asamüh eptsün E-pohoi naiuso nokpaohoi nou epao aiuküla, lüko tsüep, naiuso asamüh lutsün luao aiu lüko tsüluha.”

²⁵Ngiokhem tsandetsün tsak shikü apa lilukü sang, “Atsandetsün, asaita aa tengkam kamao ngü ti chhi-e?”

²⁶Yisuüh apa tü ngiom, “Ngiokhem nai ti satkü taim? Ni titi veluji?”

²⁷Apaüh thalakü ngiom, “‘Amongpem apem nou, a-onthso apem nou, naiuso oukong apem nou APAOU Goa lütsüojin, küta ni aphao hai tü nili lütsüojin.’”

²⁸Yisuüh apa tü ngiom, “Ni atsüo thala-iu, nung lüchhi naiuso ni aa noi-e.”

²⁹Lüko apaüh apa chija penkü hao aiukü Yisu tü ngiom, “Naito jü phao nung sau?”

³⁰Yisuüh thalakü ngiom, “Khaiunia tsak Yirusalem ainou Yeriko ai saokü noiküla, naiuso apako kaohoi nouso phetekü ngüsoüh apa lemluwan. Ngüsoüh apa woiatan, naiuso jengtsaiu yanlowan, küta apa eao lümeikü wantaiukü khuwan.

³¹Nungai nungti thawao, mesonhai tsak nung yamai saokü noiküla, naiuso tilai apaüh nung khaiunia ep, apa amao ai ekü khuwan.

³²Nung thanko Levihai tsak nung yamai shin, apaüh lüko nung epkü amao ai ekü khuwan.

³³Lüko Samariahai tsak süme iu nungai shin, naiuso tilai apaüh nung khaiunia ep, apa mongkiakü yangkü,

³⁴nung khaiunia dongai shikü apa mou nai khaiutsom naiuso theng lolutkü kekiu. Küta apa mokthso chiai noi-ikü apa sansaothang ai niakü shikü paotsang.

³⁵Lühomli nai apaüh tangka nime lousankü tsampao hao kiukü ngiom, ‘Apa tü lüpaotsang’ naiuso ni tilüsong aphup wanshi-e, nung ngo ni hao thamshi-e.”

³⁶“Nung khaiunia süme nouso ongko kaohoiko phetetsün khaiunia tü sübaoüh phaohaili chhin ta ni yangji?”

³⁷Ngiokhem tsandetsün nou thalan, “Apa tü atsüojinyang hantsün nou chhin,” nai Yisuüh apa tü ngiom, “Lükhu, naiuso nungti ni lüchhi.”

³⁸Nungai ngüso yamai khunai, apa nok tsakai nap, nungko Martha ta niankü nyiuhai tsaküh Yisu nialou.

³⁹Apa nio menyiuthso tsak Mary ta niankü noiküla, apaüh APAOU shimkü moknoikü apa chitetsün tü ang.

⁴⁰Lüko Martha ayamtheng chhi thaiutha yangelat, küta Yisu dongai shikü ngiom, “APAOU, jü nioüh chhi chhi-au jü pemsa wanji, nung ni tsüyangluso? Nungtiphe ngo lühachu ta apa tü lüngio!”

⁴¹Lüko Yisuüh thalakü apa tü ngiom, “Martha, Martha! chhi thaiutha ni mongyang piakü yangelatji;

⁴²lüko apoutsün tsaklu noin. Nung Maryüh apa ainou sauüh kanlükhunao tsüshiokün ameiting haoson nou shinglouwaniu.”