Read Khiamniungan Naga Luk 12 Bible Online

Luk 12 - Khiamniungan Naga bible

Luk 12

¹Khaiunia heng piakü tsak chiai tsak ta ngamekü kamshinai, apaüh aya nai apa sahoi tü chite, “Asamüh Farisihoi akaosai phoplao thaiutha lütsüolu.

²Tilüsong kiapjeikü taim nung tsükiapjeishi-e, naiuso atsangtaiu nouso apem ngekü iula-e.

³Nungtiphe asamüh anyakhem nai tilüsong ngio-e, nung awon nai lu-e, naiuso tsambai akheiai tilüsong asam noukhanai nyankü chite-e, nung tsamkhaiu chinai ve-e.

⁴“Jü haiso, ngo asam tü ngio-e, sauhaiüh pem luatji, lüko nung chiai ngüsoüh titso chhiao tsüshio, ngüso lon lahat.

⁵Lüko asamüh sau lon hatkü hao noin ngo asam lutsüo-iu: Goa lon lühat, sauüh luatküta inheeng nai louthioao oukong noin, apabao lühat. Ah, ngo asam tü ngioji, Apabao lühat!

⁶“Lümethso pungo poisa nime he tsüjanji süne? Goa khako ngüso tsak lüko tsümoji.

⁷Loüh akhaiu nai khaiuou lüko apem vesankü noin. Nungtiphe lahat; lümethso piakü nouko to asam chen!

⁸“Ngo asam tü ngioji, sauüh khaiunia khako ngo thalou-e, Khaiunia Thso nou apa lüko Goa honghoi khako thalou-e.

⁹Lüko sauüh khaiunia khako ngo tsüthalou-e, Khaiunia Thso nou apa aünhonghoi khako tsüthalou-e.

¹⁰“Sauüh Khaiunia Thso thako ngio singio-e, nung apa tü wankiu-e, lüko sauüh Asio Onthso thako lutsao-e, nung apa tü tsüwankiu-e.

¹¹“Tilai ngüsoüh Yihuda kamthang nai, naiuso nokpao nokshing nouso, naiuso oukong noinso dongai asam nialoukü shi-e, asamüh titi thalashi-e tsüdekünai ti in chite-e ta layangelat.

¹²Tititenai nung taokolu asamüh ti ngioao noin nung Asio Onthso nou asam tü han-e.”

¹³Hoi ainou khaiunia tsaküh apa tü ngiom, “Atsandetsün, jü dei tü sam poüh tengkam poitaiu kiu nou ngoko ajane ta lüngio.”

¹⁴Naiuso Yisuüh apa tü thala, “Jü hai, aje jetko tengkam janekü mikhem kiuao ngo hao sauüh oukong kiu?”

¹⁵Naiuso apaüh ngüso chikü tü tsülaokü ngiom, “Achinek mejeitsün ainou asam lütsüolu, tiautenai khaiunia tsak apa titithatso memei noilünou, aa ta ngiotsün atsüo nou apaüh taiutsün jengtsaiu nai tsüde.”

¹⁶Apaüh ngüso tü nung athatlu tsak ngiom, “Memei khaiunia tsaküh apa eiu ai khülam piakü lou.

¹⁷Apaüh meshen mongai yanglukü ngiom, ‘Ngo ti chhi-e? tititenai ngo jü khülam tiai tsütaiu.

¹⁸Apaüh ngiom, Ngo nung chhi-e, ngo jübei laopengküta losongshikü shanko, küta ngo jü khülam naiuso jü jengtsaiu apem singtaiu-e.

¹⁹Küta ngo jü onthso tü ngio-e, Onthso, pon piakü thaiutha ni jengtsaiu piakü shingtaim, tsükowekü lünoi, lühe, lüshiu, monglingkü lünoi!’

²⁰Lüko Goa nou apa tü ngiom, ‘Ni mongyang tsünoikün! Lüsolu a-onthso ni ainou louwan-e, nungai ti jengtsaiu ni, kamtaim nungso sau ün hao the-e?’”

²¹“Nungti sauhaiüh meshen memei jengtsaiu kamsanji lüko Goa khako to memei tsüde” ta ngiokü Yisuüh philou.

²²Yisuüh apa sahoi nouso tü ngiom, “Nungtiphe ngo asam tü ngio-e, asam aa thaiutha asamüh ti he-e, tsüdekünai asam pem thaiutha ti tene, layangelat.

²³Tititenai eheshiu nouko hau aa chen, naiuso nese nouko pem chen.

²⁴Mükho nouso tü lüthaplu: ngüsoüh le tsülethioji, be-eiuyam tsüyamji, naiuso akamtaiutsün tsam tsüdekünai bei tsülahji, lüko Goa nou ngüso tsadji!

²⁵Asam ongko ajantsoüh amongpi nou aakihlaiu phasab tsak lüko lolaiuao shio-e süne?

²⁶Asamüh nung chhi ehen nou tsümonkü naito, tiau amao apoi nouso thaiutha yangelatji?

²⁷Liutsa nai lakkhaiu taopon titi sungji ta lüyanglu. Ngüsoüh kongkü tsüchhiji, tsüdekünai ethsa tsüyangji, nungti lüko ngü asam tü ngio-e, nokpao Solomon apa ajinka apem nou nungso tsak khekkü tsüthochu.

²⁸Lüko Oh intsolu monglamtsünso, ti liutsa sang lonyi noiküta lühom in nai thio-e, nung hao Goa nou tenkiuji tünaito, apaüh nung tü simkü asam hao tsütenkiu-e süne?

²⁹“Nungtiphe asamüh heao naiuso shiuao, thaiutha layangelat.

³⁰(Tititenai nung goumchi khaiunia Goa tsüngekünhoi nou nungti yamji.) Lüko asam Poüh nung poukü noin ta ngen.

³¹Nungti lüko asamüh apa nokshing lüyam, nungai asam hao ouk nou kamlutkiu-e.

³²“Ehen hoiso lahat, tititenai asam Poüh asam hao Nokshing nou kiuao mongchiokü noin.

³³Ni taiutsün jengtsaiu apem lüjan naiuso tangka nou angjahai hao lükiu. Anyi-an tsüyangkün tangka nekong lütuh, naiuso aün nai jengtsaiu lükamtaiu, nungai tilaitso tsüthsaojikanji, tiautenai kao napao tsüshio, naiuso mat nou tsüheji.

³⁴Tititenai tiai asam jengtsaiu taim, nungko asam mong noi-e.

³⁵“Tsamkihoi meshen tsampao tsamsigoh shan sümai ainou laokü shitsün tü jiokü noitsünli,

³⁶asam tilüsong shilünou achhiao thaiuthalu sheitholokü tson sunkü khemkü lünoi.

³⁷Tsamki nouso sauhaiüh APAOU shinai thsümonkü noikü epji ngüso thaiumei. Ngo asam tü atsüoting ngio-e, Apaüh meshen chija omthsa thsalou-e, küta ngüso heshiu-iao thaiutha moknoi-e, naiuso shikü ngüso hao sunkü wao-e.

³⁸Apa ah-wem tsüdekünai tsangankü shilüko, khemloukü sauhai eppe ngüso thaiumei!

³⁹Lüko nung lüngelu, tsampao nou ti taoko kao nou shi-e nung ngetünto apaüh jimkü noi-ela, naiuso apaüh apa tsam tsülusat-iela.

⁴⁰Asam lüko khemloukü lünoi, tititenai asamüh tsüyangtsün atao tsakko Khaiunia Thso nou shi-e.”

⁴¹Peterüh ngiom, “APAOU, athatlu ngio nung sam thaiutha chitetsün süne, tsüdekünai apem thaiutha noin?”

⁴²APAOU nou thalan, “Naito, monglamtsün naiuso mongsai noitün tsamki nou sau? Apa to apa tsampaoüh apa tsam apem khaiuko apaotsangau the-itsün amonglam tsamki nou noin.

⁴³Apa tsampao shinai tsamki sauüh nungti chhikü eppe, nung tsamki thaiumei!

⁴⁴Tsampao nou apa jengtsaiu apem khaiuko nung tsamki apaotsangao taiu-e ta, ngo atsüoting asam tü ngioji.

⁴⁵Lüko tsamki sübaoüh ngo nou tsampao shitsün tsanganji ta apa mongai ngioji, naiuso tsamki nouso naiuso menyiu tsamki nouso da shiu-e, naiuso heshiukü tokatao yachu-e,

⁴⁶nung tsamki nou tilai tsüyangkün atao naiuso tsüngekün taoko tsampao nou nyitso laokü shi-e. Nungai tsampao nou apa nelangkü tapneküta, angem tsülukünso ko aikü haoson sunkiu-e.

⁴⁷“Tsamki sauüh apa tsampaoüh mongchiotsün ngekü nung tsükhemlou tsüdekünai apa mongchiotsünli tsüchhi ta piaküjam shiukü angja kiu-e.

⁴⁸Lüko sauüh tsünge, naiuso ashiutsün epao lümeikü chhisan, apa ashiutsün intso noulu shiu-e. Sauhai hao piakü kiutaim, apa ainou piakü sao-e; sau phamongai ngüsoüh piakü wankü noin, ngüsoüh apa ainou tekkü piakü sao-e.

⁴⁹“Goumchi ko in sung-iao ngo shin, naiuso nung nyaisanantünto titengkü mei-e-la!

⁵⁰Lüko ngo alimkiutsün tsak nou limkiukü hao noin, naiuso nung mokhemkün chikü ngo titi jeiatji!

⁵¹Goumchi ko nokmei kiuao ngo shin ta asamüh yangji süne? Ngo asam tü ngio-e, Tsüde, lüko ajanpek sung-iao thaiutha ngo shin.

⁵²Tititenai loyakü tsam tsakko pungo noinai, süme nou nime thako, naiuso nime nou süme thako ajanpek sungi-e.

⁵³Po nou thso thako, thso nou po thako, nyiu nou thso menyiuthso thako, thso menyiuthso nou nyiu thako, anyai nou apa le thako, thso tsammongnyiu nou apa nyai thako ngüso ajanpek sungi-e.”

⁵⁴Apaüh hoi nouso tü thapkü ngiom, “Tilai asamüh ajenap etsai thengmiakhao tsak epji, nungai asamüh ngioji, Ah-nou ou-e; naiuso nungti thawaoji.

⁵⁵Tilai asamüh ajepek etsai asheih shinou epji, nungai asamüh ngioji, Ahnou lam-e, naiuso nungti thawaoji.

⁵⁶Asam akaosai nouso! asamüh goumchi naiuso aün kha titi ngeao monji, lüko asamüh nung atao thatsanao titi ngeao tsümon?

⁵⁷“Ti atsüoting noin nung tiauta asamüh meshen chija tsüthaiusanji?

⁵⁸Tititenai ni mipao nouko mikhemtsünso dongai khunai, yamai ni apako jeiai-ao lükowe; nungti tsüdekünai apaüh mikhemtsünso phamongai ni thio-e, naiuso mikhemtsünsoüh ni akhouwantsün phamongai kiuwane, naiuso akhoutsünsoüh ni akhou tsamai taiu-e.

⁵⁹Ngo ni tü ngio-e, Ni athonting poisa nou mothamkhemkün chikü nung ainou ni titi thekü tsüsung-e.”