Read Khiamniungan Naga Luk 13 Bible Online

Luk 13 - Khiamniungan Naga bible

Luk 13

¹Nung taoko khaiunia ajantso nungko noikü Galilhaiüh aa chaithio kiutsün taoko Pailatüh sauhai loat, nung ngiongem thaiutha Yisu hau chiten.

²Yisuüh ngüso tü thalakü ngiom, “Nungso Galilhai nungti angja-i nou shioko, amao Galil haiko naito ngüso angei tekkü tsaojeng ta asamüh yangji süne?

³Atsüoting nung tsüde! Asam lüko angei ainou mong tsüphoklekü naito asam chikü nungti mowan-e.

⁴Siloam nai khaiunia chekü petjei da tsamthong loilutkü eantsünso thaiutha ti? Naito asamüh nung Yirusalem nai kihtsün khaiuniahoi apem ko nai ngüso tsaojengkü noiküla ta yangji süne?

⁵Atsüoting nung tsüde! Asam lüko angei ainou mong tsüphoklekü naito asam chikü nungti mowan-e.”

⁶Nai Yisuüh nung athatlu ngüso hau chiten: “Khaiunia tsaküh apa sainaoshep eiu-ai latpai tsak thomtaiuküla, naiuso apaüh nungai shep nou yamkü shinai titso tsüep.

⁷Nungtiphe apaüh sainaoshep eiu atsün tü ngiom, ‘Athaplu, lo nouto pon süme chikü ngo nung latpai da shep nou yamkü shiji, lüko titso tsüep. Nung lüthaman! Tiau nungüh goh nou tummanji?’

⁸Lüko eiu atsün nou thalan, ‘APAOU, loüh nung pon lu ataiukiushi. Ngo goh nou thaiuküta adong lemkü pu mei nou phenlutko.

⁹Nung pai nou nungthan ponko eiu-eiunaito, nung tekkü mei, tsüdekünaito, ni nungailu nung lüthaman.’”

¹⁰Nyitso Yihuda Anounyi Yisuüh Yihuda kamthang tsak ko tsandekü noiküla.

¹¹Nungko angei onthso nou pon chekü petjei kia-itsün nyiuhai tsak noiküla. Apa pem alulaao tsüshiokü kaulüshiankü noiküla.

¹²Tilai Yisuüh apa ep, apaüh nyiuhai nou jonkü ngiom, “Nyiuhai, atsaosilao ainou ni sokji!”

¹³Küta Yisuüh nyiuhai tü apa phaüh thannai, jamaolu apa lukü iula naiuso Goa lomsan kiu.

¹⁴Yisuüh Yihuda Anounyi lomeikiu nou shioko, Yihuda kamthang APAOU mongmatkü thalakü hoi tü ngiom, “Samüh chhi chhiao ajekhaiu luok noin; nungtiphe nung ajekhaiuko alomeiao ashi, lüko Yihuda Anounyi to lashi!”

¹⁵APAOU nou apa tü thalakü ngiom, “Asam akaosai nouso! Asam apemüh Yihuda Anounyi asam jangtso tsüdekünai mokthso achihetsün ainou soksankü khiam shiu-iao niakü tsükhuji süne!”

¹⁶Lo nung nyiuhai Abraham thsaosithso Biya nou pon chekü petjei kekü noin; nung aketsün ainou apa Yihuda Anounyi sokthamao tsünoi süne?”

¹⁷Yisuüh thalatsün ngio nungüh apa ehso ngüso chija miamat, küta khaiuniahoi nouto apa ajinka athanga chhi nouko monglingat.

¹⁸Yisuüh, “Goa Nokshing ti khekkü noin? ta sang. Ngo nung ti ko thatlu-e?

¹⁹Nung khaiunia tsaküh apa aimongai kianjim ou lelu shiutsün khek. Nung samsankü pai songkü iulaji, naiuso aün waiothso nouso shikü nung paikia nai ngüso a-ap shanji.”

²⁰Yisuüh müjam sang, “Ngo Goa Nokshing nung ti in ko thatlu-e?

²¹Nung nungti noin. Nyiuhai tsaküh phoplao intso louküta wonne tsoi aopüle nouko, laowekü nung apem mochiusankün lektso taiunoitsün khekkü noin.”

²²Yisuüh Yirusalem ai khutsün yamko nok tsak ainou noksong tsak ta thsatkü khunai khaiuniahoi hau tsandekü noiküla.

²³Khaiunia ajantsoüh apa tü sang, “APAOU, akipsantsünso thsaothsaokülu süne tsüde?” Yisuüh ngüso tü thala,

²⁴Koukhan atsotsan nai nappao thatü lükowe; tiautenai piakü nou nappao thatü kowe-e, lüko tsüshio-e.

²⁵Tsampao nou chukü kou kiapane; nai asamüh kengchiai tsakü kou nai haiukü ngioao yachu-e, ‘APAOU, sam hao kou nou asopankiu!’ nai apaüh asam tü thala-e, ‘Asam ti ainou shin ngo tsünge!’

²⁶Nungai asamüh thala-e, ‘Samüh niko aikü he naiuso shiu; ni sam noksong nai tsande!’

²⁷Lüko apaüh ngioshi-e, ‘Asam ti ainou shin ngo tsünge. Asam angei chhitsün chikü jü dong ainou lükhuwan!’

²⁸Asamüh tilai Abraham, Isak, Yakob naiuso E-po nouso apem Goa nokshing nai epkü, asam to angja nai wannai ashap naiuso houjei-ekü titengkü angja noi-e!

²⁹Khaiuniahoi nou ajepek naiuso ajenap ainou, ajenap etsai naiuso ajepek etsai nou shikü Goa nokshing sümai nai moknoi-e.

³⁰Nai lo sauhai aphihoi noin, chongao the-e, naiuso sauhai chongau thekü noin nungso phiao the-e!”

³¹Nung taokolu Farisihai ajantso Yisu dongai shikü ngiom, “Ni nung ainou amao ai khuwanau noin, tiautenai Herodüh ni luatao aiuji.”

³²Yisuüh ngüso tü thalan, “Asam khukü nung chiu nou tü lüngio: ‘Lonyi lühom ngo angei onthso nouso komanji, naiuso khaiunia nouso lomeikiuji, naiuso samnyi nai ngü jü chhi thakheme.’

³³Nungti lüko lonyi lühom naiuso tsangnyi ngo jü yamai khu-ela; tititenai Yirusalem mongko tsüdeküto Goa E-po tsak tsüloat-ela.”

³⁴“Oh Yirusalem, Yirusalem! Asamüh Goa E-po nouso luat, asam dongai Goa ngiongem kankü hongtsünso lung nou thopat! Waio anyiu nou meshen thso apa ekuk soh khemai nialoukü pokjeitsünli, ngo titsojam athsoso aikü nialouao aiu, lüko ni tsümongchio!

³⁵Nungtiphe asam Amkham Tsam aodangkü lean-e. Atsüoting ngo asam tü ngioji, asamüh APAOU nianko sau shiji ‘Goa nou apa oukkiu ta mongiokün lektso asamüh ngo tsü eppe.’”