Read Khiamniungan Naga Luk 14 Bible Online

Luk 14 - Khiamniungan Naga bible

Luk 14

¹Nyitso Yihuda Anounyi Yisu Farisihoi aniakei tsak tsamai chiheao sung, nai ngüsoüh apa jiokü thap.

²Phasihok pumlakü kiatsün khaiunia tsak apa dongai shin,

³nai Yisuüh ngiokhem tsandetsünso naiuso Farisihoi tü, “Sam Ngiokhemüh Yihuda Anounyi akia lomeikiuao ayam sop süne tsüsop?” ta sang.

⁴Lüko ngüsoüh ti tsüthala. Yisuüh nung khaiunia nou nialouküta lomeikiukü hongan.

⁵Nai apaüh ngüso tü ngiom, “Asam ongko ajantso thso tsüdekünai jangtsopong tsak Yihuda Anounyi temkhao nai salian nai nungnyilu apa tsütensan-e süne?”

⁶Lüko ngüsoüh nung tü thalaao tsüshio.

⁷Ajonkamtsün mesanhoi ajantsoüh anoithang ameiting shingloutsün Yisuüh ep, nungtiphe apaüh ngüso chikü tü athatlu ngio tsak chite:

⁸“Tilai ajantsoüh asam haiyam sümai nai jonji, noikham ameiting nai lamoknoi. Ni tü songkü apaüh khaiunia ajantso jonhakü noinai,

⁹aje nemtso jonkamtsün nou shikü, ‘Nung noikham nung khaiunia hao lükiu,’ ta ni tü ngio-e. Nungai ni miamatkü anyapting noikham nai noiao iula-e.

¹⁰Nunglikoto tilai asam jon-e, khukü anyapting noikham nai lünoi, nungaito tilai asam jontsün shi-e, ni tü, ‘Jühai, halai athang mei nai lüsungnoi’ ta ngio-e. Nungai chih hetsün nai niko noinso apem khaiuko ni asuhat noi-e.

¹¹Tititenai sauhaiüh meshen chija tsokkü shan-e nung nyappe, naiuso meshen chija nyaplokü iula-e chikü songkü iulashi-e.”

¹²Nai Yisuüh ajonkampao tü ngiom, “Tilai ni thaisam jon-e, ahaiso, adeisinioso, atsammongso, meimei phaosipo nouso lajonkamtiautenai ngüsoüh ni tü laokü jonshi-e, nungti ni chhikü shitsün thaiutha thamanshi-e.

¹³Tilai ni sümai mai-e, tsosiluhoi, phathe hokthehoi, chiunehoi, naiuso niopekhoi lüjonkam;

¹⁴nai ni ouk nou noi-e, tiautenai ngüsoüh ni hao thamanshiao tsüshio. Goa nou asiohoi ahkü shinai ni hau amai nou laokü kiu-e.”

¹⁵Tilai apako thaisampuo nai moknoitsünso ongko khaiunia tsaküh nung lula, apaüh Yisu tü ngiom, “Goa Nokshing sümai nai sauhai moknoiha-e ngüso titengkü ouk noi-e!”

¹⁶Yisuüh apa tü ngiom, “Atao tsak ko khaiunia tsaküh sümai asong tsak shankü nungko apaüh khaiunia piakü jonkam.

¹⁷Tilai thaisamao atao saokü shin, apaüh apa tsamki ajonkamtsünso hau chiteao hongkü ngiom, ‘Ashi, alum khemloukü taim!’

¹⁸Lüko ngüso apemüh tsakühjam tsakühjam ta ngüso ashiao tsüshiotsün aküo ngioau yachu. Ayating nou tsamki tü ngiom, ‘Ngo gouthang tsak tuhkü noin naiuso nung thaplu khukü hao noin; jü aküo tü tsüojinkü ayangkiu ta kojaji.’

¹⁹Amaohai tsaküh ngiom, ‘Ngo eiu-ah jangtsopong akhe pungo tuhkü noin, naiuso ngo ngüso theluao khuji; jü aküo tü tsüojinkü ayangkiu ta kojaji.’

²⁰Amaohai tsaküh lüko ngiom, ‘Ngo loteng tsamsigoh yangkü noin; nungshioko ngo shiao tsüshio-e.’

²¹“Tsamki nou laokü khukü nung chikü tsampao hau chiten. Tsampao nou thsüokü mongmat küta apa tsamki tü ngiom, ‘Noksong sonkeng nai khaolaokü lükhu, küta tsaosilaohoi, phathe hokthehoi, chiune, naiuso niopek nouso nungai nialoukü ashi.’

²²Tsamki nou ngiom, ‘APAOU, ni ngiotsünli chhi-iu, naiuso loüh noikham akeng noishin.’

²³Nai APAOU nou tsamki tü ngiom, ‘Loüh yamtsüo yamhen nouso ai lükhu küta jü tsam thamiankü ajonthio.

²⁴Ngü ni tü ngio-e, ngo jonthiotsünso sauüh lüko jü sümai tü tsütaplu-e!’”

²⁵Ataojam hoi asong tsak Yisuko khukü noinai apaüh lapküshikü ngüso tü ngiom,

²⁶“Sau jü dongai shiji apaüh apa po naiuso apa nyiu, apa tsammongnyiu naiuso thsohai, apa deisinioso, naiuso apa pem lüko ngü tü tsüojinao nou chiai shikü tsüojin-e apa jü sahoi theao tsüshio.

²⁷Sauüh meshen paiphu pikü jü phiai tsühoilutji, apa jü sahoi theao tsüshio.

²⁸“Asam ongko tsaküh tsamthong lahshanao yangnaito, nung chhi thakhemao thaiutha tangka saiukü taiu süne tsütaiu ta aya nai apaüh mokkünoikü awanao nou chong veluji.

²⁹Apaüh nung tsüthalu naito, apaüh athanya yataiukü chhi khemlouao tsüshio-e; naiuso athaptsün apemüh apa tü,

³⁰‘nung khaiunia nou tsamlah-ao yachu lüko tsüthashalou!’ ta nyailutkü ngio-e.

³¹“Nokpao tsak apa ko süpai heng che hakü süpai heng khei noitsün amao nokpao tsak thako li-ao khunai nung nokpao amao tsak nou tü jeishiao apa oukong saiukü noin süne tsünoi ta ayanai moknoikü yangluji.

³²Nokpao tsak nou tsüshio-elinai amao nokpao tsak nou jetko loüh laiukü noikünai, apaüh ngiothi nou hongkü nokmei thaiutha sang-e.”

³³“Sauhaiüh apa taiutsün apem tsüwansom asam saulünou jü sahoi theao tsüshio, ta Yisuüh ngiothonthelou.”

³⁴“Jem nou amei noin, lüko apa da jemnya nou mowan naito, nung müjam nyakü iulashiao ti ayam tsünoishi.

³⁵Nungto goh naiuso beisikin thaiutha lüko tsümei; khaiunia nou nung yakkanji. Naito, asam noukhan pounaito anglu!”