Read Khiamniungan Naga Luk 15 Bible Online

Luk 15 - Khiamniungan Naga bible

Luk 15

¹Nyitso liukim shitsünso naiuso angeihoi piakü Yisu ngio tü angao thaiutha kamjikan, nai

²Farisihoi naiuso Ngiokhem tsandetsünsoüh, “Nung khaiunia nou angeihoi louji naiuso ngüsoko lüko aikü heshiuji!” ta ngiokü namnamao yachu.

³Nungtiphe Yisuüh nung athatlu ngio ngüso tü ngiom:

⁴“Asam ongko tsaküh onnemok tsom tsak taiukü naiuso nung ongko tsak iannaiapaüh ti chhiji? Apaüh aolükaokü lükao nou thsan tsamhetsün nai letaiuküta iantsün tsak nou moepkün lektso yamkü khuji.

⁵Tilai apaüh nung eplouji, apa thatü monglingkü nung apa sangdongkhaiu nai loklutkü

⁶kankü apa tsamai laokü shiji, nai apaüh meshen haiso naiuso phaohai jonkamkü ngüso tü ngioji, ‘Ngo thatü monglingji, tiautenai ngü iankü noitsün jü onnemok eplou-iu. Sam monglingkü maiheko!”

⁷Nung khekkü, ngo asam tü ngioji, mong phokleao poukü tsünoikün asiohoi aolükaokü lükao nouko naito mong phokletsün angei khaiunia tsak nou ta aün nai amongling asong noi-e.

⁸“Loüh nyiuhai tsaküh son tangka che taiutsün ongko tsak iannaiapaüh ti chhi-e? Apaüh tson sunlouküta tsam kaikü nung moepkün lektso paotsangkü yamji.

⁹Tilai apaüh nung epji, apa haiso naiuso phaosipohai jonkamkü ngüso tü ngioji, ‘Ngo thatü monglingji tiautenai ngo iantsün tangka eplou-iu. Sam monglingkü maiheko!’

¹⁰Nung khekkü, ngo asam tü ngioji, angei khaiunia tsak mong phokletsün nouko Goa aünhonghoi monglingji.”

¹¹Yisuüh tsülaokü ngiom, “Atao tsak ko khaiunia tsak ün melothso nime noiküla.

¹²Niophi nou apa po tü ngiom, ‘Po, tengkam ongko ti haoson ngo theao noin nung ngü hao lo akiu.’ Nungtiphe Po nou apa thso nime jetko apa tengkam janekü kiu.

¹³Ajekhaiu intso shamküta thso niophi nou apa tengkam apem janheküta chai kamloukü tsam letaiukü goumchi laiukü nai khuwan. Apa shingkhannio laiukü noitsün tsakai khukü athatha kihtsün nai chai thapengan.

¹⁴Apaüh suntsün tengkam apem wankheman. Nai nung shingkhannio nai naiusile thatü thsüokü tsak shikü, apa titso tsütaiushikü thatü tsosilu iulan.

¹⁵Nungtiphe nung shingkhannio nouko noitsün khaiunia tsak tü panlut, naiuso apa khengtaiu nai yahpin tü jimao hong.

¹⁶Apaüh yah nou hetsün laponkhup nou heao aiu, lüko sauüh apa hao eheao titso tsükiu.

¹⁷Aphiteng nai apa mongtsüo shikü ngiom, ‘Jü po ko chaichen nousoüh ngüsoüh aiutsün chiai epji, lüko ngo to nungai naiusile nou eanji!

¹⁸Ngo tsaloukü jü po dongai khu-e küta apa tü ngio-e, Jü po, Goa thako naiuso athako ngo angei sunlou-iu.

¹⁹Ngo loto athso ta jonao tsümai; ngo ni nou chaichenhoi ongko tsakli akankeiha.’

²⁰Nungtiphe apa tsaloukü apa po dongai laokü khu. “Apa kumai noikünaita, apa poüh apa epkü mong kiakü yangküta kopkü khukü apa thso sang nai piplouküta son nai chep.

²¹Thso nou ngiom, ‘Jüpo,’ ‘Goa thako naiuso athako ngo angei suniu. Ngo loto athso ta jonao tsümai.’

²²Lüko apa poüh tsamkihoi tü ngiom, ‘Liukü!’ ‘Phakhut ameiting kankü shikü apa tü akhutlut. Apa pha nai khiapthso naiuso hok nai hokkhut lükhut kiu.

²³Nai jangthso atsateng nou kankü shikü aloat, naiuso samüh monglingekü heshiukü sümaiko!

²⁴Tititenai jü thso nung mowankü noiküla, lüko lo aa noin; apa iankü noiküla, lüko lo apa eploushikü noin.’ Naiuso ngüsoüh monglingkü sümaiheao yachu.

²⁵“Nung taokonai apa thso petche nou eiuai keitaiukü noiküla. Apa yashitsün taoko, apa tsam shimkü shinai, apaüh jih hangtsün naiuso akoihe ngem lula.

²⁶Nungtiphe apaüh tsamki tsak jonshikü apa tü, ‘nungso titi theji?’ ta sanglu.

²⁷Tsamki nou apa tü ngiom, ‘Tsamai anio laokü shikü noin,’ naiuso ‘apoüh jangtso atsateng nou loat, tiautenai apaüh anio ameilei eploushin.’

²⁸Adei nou thatü mongmatkü tsamai sungao tsüaiu, nungtiphe apa poüh kamai saokü apa tsamai nappao sailu.

²⁹Lüko apa po tü thalakü ngiom, ‘Athaplu-eime, pon nungtitso ngo sua tsakühli ni yathsüo, naiuso ni ngiotsün tsüangkü laitso tsünoi. Ni ngü hau ti kium? Jü haiso ko monglengekü heshiuao ni laitso wonthso tsaktso ngü hau tsükiu!

³⁰Lüko nung athso sauüh, tsütsamtsütsüokün yamai achai apem kheman, naiuso tilai apa tsamai laokü shin, ni apa thaiutha jangtso atsating nou loat!’

³¹Apa poüh apa tü thala, ‘Jü thso,’ ‘Ni ngüko nungko asaita noikü shin, naiuso ngü nou alum ni nou noin.

³²Lüko sam monglengkü maiheaolu noin, tiautenai anio eankü noiküla, lüko lo apa aa noin; apa iankü noiküla, lüko lo apa eploushikü noin.’”