Read Khiamniungan Naga Luk 17 Bible Online

Luk 17 - Khiamniungan Naga bible

Luk 17

¹Yisuüh apa sahoi tü ngiom, “Angei nai khaiunia salian-itsün alilu shikühaolu, lüko sau tsangkü nungtin thawao-iau shanji nung khaiunia thaiutha inyate!

²Nung ehenthso tsak hoi ongko lüko angei lousantsün apa thaiutha to anoipektsün lungpun asong tsak sang nai phanlutkü khiamnok ai hamthio naibao meila.

³Nungtiphe asamüh ti chhiji asam chija lütsüolu! “Adeiüh angei sunlounai, apa lüthut, naiuso apa mong phoklenai, apa hau lüwankiu.

⁴Apaüh nyitso mongko athako chinyatjam angei sunnai, naiuso nung chinyatjam pungkü ‘ngo mong phokleji,’ ta ngiokü apa shinai, ni apa hau wankiuao noin.”

⁵Honghoi nou APAOU tü ngiom, “Sam amonglam tekkü alosongkiu.”

⁶APAOU nou thalan, “Asam da amonglam nou kianjim ou chantso lüko noi naito, asamüh nung tsamtsamshep pai nou tü, ‘Ni achija sheksanküta khiamnok ai lüthom!’ ta ngionai nungüh asam ngio ang-ela.

⁷“Athatlu asam ongko khaiunia tsaküh tsamki tsak eiu ah-ao tsüdekünai onnemok nouso jimao taim. Tilai apa eiu ainou yaji, asamüh apa tü liukü ashi naiuso chih heao mokkü anoi ta asamüh ngioji süne?

⁸Nungtito tsüngio-e! ‘Nungliko asamüh ngü ti heshiuao noin nung lükhemlou, naiuso omthsa thsakü ngo moheshiukün chikü jimkü anoi; küta ni heshiu-e ta ngio-e.’

⁹Tsamki nou apa chhi haoson chhi nai nung thaiutha nianlom kiuao maikü noin süne?

¹⁰Nungti asamüh lüko asam tü ngiotsün apem chhikhem küta lüngio, ‘Sam atheao tsünoikün tsamkihoi; samüh sam chhi haosonlu chhi-iu.’”

¹¹Yisu Yirusalem dongai khunai, apaüh Samaria naiuso Galil elung yankü khukü noiküla.

¹²Apaüh nok tsakai khutsün taokonai jee kia sungtsün khaiunia che apa ko phete. Ngüso kumai tsakü

¹³sang asong nou vekü ngiom, “Yisu! Atsandetsün! Sam tü atsüojinyang anoi!”

¹⁴Yisuüh ngüso epkü ngiom, “Lükhu küta mesonhoi hau asam pem tü lüthaisan-i.” Ngüso yamai khukü noitaoko ngüso meila-an.

¹⁵Tilai ngüso ongko tsaküh apa jee kia sungtsün meilakü ep, apa laokü shikü, sang asong nou Goa hau nianlom kiu.

¹⁶Apa Yisu khako kaukü nianlom kiu. Nung khaiunia nou Samariahai noiküla.

¹⁷Yisuüh ngiom, “Nungko alomei eptsün khaiunia che noiküla; naito amao lükao nouso tiai noin?

¹⁸Nung Melemaohai noulu tiau Goa hau nianlom kiuao shin?”

¹⁹Yisuüh apa tü ngiom, “Chuküta lükhu; ni monglam nou ni lomeikiu-iu.”

²⁰Farisihoi ajantsoüh Goa nokshing tilai shi-e ta Yisu tü sang. Apaüh nungti thashi, “Goa Nokshing epepküli to tsüshi-e.

²¹Sauühtso, ‘Athap, Goa nokshing nungai noin!’ tsüdekünai ‘khukü noin!’; ta tsüngio-e! tiautenai Goa Nokshing asam ongko noin.”

²²Nai apaüh sahoi tü ngiom, “Asamüh Khaiunia Thso nyitso ajekhaiu lüko epao aiu-e, lüko asamüh tsüepkü hau atao nou shi-e.

²³Ngüsoüh asam tü ‘shilai athap,’ tsüdekünai ‘nungai athap’ ta ngio-e! nungai lahenyi, naiuso ngüso phiai lahoilut.

²⁴Tititenai ahsalap nou titi aün athon etsai nou aün athon etsai saokü awonji nungti Khaiunia Thso apa ajekhaiu nai noili-e.

²⁵Lüko ayanai apa thatü omhe-e naiuso nung vetao nou apa wanan-e.

²⁶Noa taoko thawaotsünli Khaiunia Thso ajekhaiu lüko noili-e.

²⁷Noa kheng nai monapkün ajekhaiu saokü naiuso shelei shikü ngüso chikü molimlouwankün lektso ngüsoüh hekü, shiukü naiuso tsamsigoh yangkü noiküla.

²⁸Nungti loüh Lot ajekhaiuli ngüsoüh hekü, shiukü tuhkü, jankü, lethiokü naiuso tsam shankü noitsünli noili-e.

²⁹Lot Sodom ainou khuwantsün ajekhaiu nai in naiuso taoson moushe aün ainou ah-ouli saokü, ngüso chikü mowan-itsünli noi-e.

³⁰Nungti Khaiunia Thso shitsün ajekhaiu nai lüko noili-e.

³¹“Nung ajekhaiu ko sau tsamkhaiu chiai noin apaüh tsamai taiutsün jengtsaiu louao lasao; nungtilu sau eiu-ai noin apa lüko tsamai laokü layashi.

³²Lot tsammongnyiu lüyangsan!

³³Sauüh apa aa kipsanao kowe-e nung mowan-e; lüko sauüh apa aa mowan-e nung epshi-e.

³⁴Ngo asam tü ngioji, nungsoh nai then tsak ko khaiunia nime sai-e tsak nialou-e, naiuso amao tsak nou poi-an-e.

³⁵Nyiuhai nime aikü thamthao noi-e; tsak nialou-e naiuso amao tsak nou poi-an-e.

³⁶Khaiunia nime eiu-ai chhikü noi-e, tsak nialou-e, naiuso amao tsak nou poi-an-e.”

³⁷Sahoi nou apa tü, “Tiai, APAOU?” ta sang. Yisuüh ngüso tü thalan, “Tilüsongai e mia noi-e, nungai miahe letche nouso aikü kamshi-e.”