Read Khiamniungan Naga Luk 18 Bible Online

Luk 18 - Khiamniungan Naga bible

Luk 18

¹Nai asaita outsüchankü mi saoau noin ta Yisuüh athatlu ngio tsak ngüso hao nungti chite:

²“Noksong tsakko mikhemtsün tsak Goa lon asutsühatkü naiuso khaiunia tü awesan tsünoikü kihküla.

³Nai nung noksong nai jihi tsak nou mikhem kiutsün tü piaküjam shikü, ‘Ngü ko tsaotsün tü mi nou akhemkiu!’ ta ngio.

⁴Atao laiukü apaüh mi nou khemkiuao tsüaiu; lüko phikü apa chija yanghekü ngiom, ‘Ngo Goa lon asu tsühat, naiuso khaiunia tü awesan tsünoi lüko,

⁵nung jihi nou ngo angja-i nou shioko ngü apa mi khemkiu-e, tsüdekünaito apa tsülaokü shinai ngo tanate!’”

⁶Nai APAOU nou tsülaokü ngiom, “Tsütsüokü mikhem kiutsün ngio tü a-anglu.

⁷Goa nou anyi si asu chikü apa tü vetsünso hau mi nou tsükhem kiu-e süne? Ngüso thaiutha ahachuao apaüh tsülio-e süne?

⁸Ngo asam tü ngio-e, apaüh ngüso thaiutha mi nou shakta khemkiu-e. Nungti lüko tilai Khaiunia Thso shi-e, apaüh goumchi ko amonglam nou eppe süne?”

⁹Khaiunia ajantsoüh ngüso chija asio ta yangkü amaohai apem tsüvesantsün tü apaüh nung athatlu ngio chite.

¹⁰“Khaiunia nime amkham tsamai misao ao sung: Ngüne ongko tsak nou Farisihai, naiuso amao tsak nou liukim shitsün noiküla.

¹¹Farisihai nou tsaküta misao nungti sao, ‘Oh Goa, ngo amao khaiunia mewophoi naiuso tsüsiokünso tsüdekünai tsütsamtsütsükünsoli tsüde, naiuso loüh nung liukim shitsünli lüko tsüdephe, ngo anian lomji.

¹²Ngo anoujet tsakko nenyi keithonlouji, naiuso ngo eptsün apem ainou ni hau ekve kiuji.’

¹³Lüko liukim shitsün nou kumai tsakü apa niovei aün ai thapsanao tso tsüsomkü apa kong nai lakü ngiom, ‘Oh Goa, ngo angei khaiunia nou tü atsüojin ayangkiu!’

¹⁴Ngo asam tü ngioji ta Yisuüh ngiom, “Farisihai nouko naito nung liukim shitsün khaiunia bao apen epkü apa tsamai khu. Tititenai sauhaiüh meshen chija lousonglou-e, apa hen-e; naiuso meshen chija henkü shitsün songkü thsüo-e.”

¹⁵Yisu hao than-iao khaiuniahoi nou ehen methsohoi apa dongai nialoukü shin; naiuso sahoi nou nung epnai, ngüso tü thut,

¹⁶lüko Yisuüh ngüso apa dongai jonshikü ngiom, “Ehen methsohoi nouso jü dongai ashi-i, ngüso lalolao, tititenai Goa nokshing nungsoli ün noin.

¹⁷Ngo asam tü atsüoting ngio-e! Sauhaiüh nung ehen methso nousoühli Goa nokshing tsülou-e, ngüso titi thekü nungai tsünappe.”

¹⁸Yihudahai aniakei tsaküh apa tü sang, “Atsandetsün amei, asaita aa tengkam kamao ngo ti in chhi-e?”

¹⁹Yisuüh apa tü ngiom, “Ni tiau ngo tü amei ta jonji?” “Goa tü simkü sau amei tsünoi.

²⁰Ni ngiokhem nouso ngen; ‘Tsütsamtsütsüokü lakankei, laloat, lakao, atsüotsüdekü langio, Apo naiuso Anyiu asu lühat.’”

²¹Nai memei nou thashin, “Nung ngiokhem nouso ngo methso nai tü kankeikü noin.”

²²Tilai Yisuüh nung lula, apaüh memei nou tü ngiom, “Ni lotü tsak nou mothapung. Ni taiu nou apem lüjan, naiuso nung tsosiluhai hao lüsonkiu, naito aün nai atengkam taiu-e; küta ashi jü phiai ahoilut.”

²³Lüko tilai memei nou nung ngio lula, apa thatü mongkiakü iulan, tititenai apa thatü memei noiküla.

²⁴Yisuüh apa mongkiakü epküta ngiom, “Memeihai aün nokai napao titi achek!

²⁵Tititenai memeihai aün nokai napao noukoto nyat ang tsatkü lon shikhuao shiotso.”

²⁶Nung lutsünsoüh sang, “Naito, sauhai kipsane?”

²⁷Yisuüh thalan, “Sübao khaiunia thaiutha tsüshiokü noin nung Goa nouto shioji.”

²⁸Nai Peterüh ngiom, “Athaplu! samüh sam tsam wankü aphiai hoilut.”

²⁹Yisuüh ngüso tü ngiom, “Ah,” “atsüoting ngo asam tü ngio-e, sauüh tsam lüko, tsammongnyiu lüko, deisinio lüko, posinyiu lüko, thsohai lüko, Goa nokshing thaiutha wanan,

³⁰apaüh nung vetao nouko phopkü eppe, naiuso ashiao taoko asaita aa nou eppe.”

³¹Apaüh chekü nime nouso apako niakü khunai ngüso tü ngiom, “Anglu! sam Yirusalemai sungji naiuso E-po nouso tsangkü satkü noitsün apem Khaiunia Thso da thawao-e.

³²Tititenai apa Melemaohai hao lethiowan-e, lutsao-e, lei nou thuplut-e naiuso miam-ikü kankei-e.

³³Ngüsoüh apa da shiu-e naiuso apa luat-e, lüko samnyi nouko ahkü shi-e.”

³⁴Lüko ngüsoüh nung ngio ti tsüngela, nung ngio ngelatsün oukong ngüso ainou tsangankü noiküla.

³⁵Yisu Yeriko shimkü shinai niopek khaiunia tsak yamkuk nai noikü saohekü noiküla.

³⁶Apaüh hoi thsatlükhuntsün lulanai, “nung ti-in?” ta sang.

³⁷Ngüsoüh “Nung Nazaret hai Yisu yanlükhunji,” ta apa hau chiten.

³⁸Nai apaüh, “David thso Yisu! Ngo tü atsüojin!” ta wekü ngiom.

³⁹Ngüso khako khutsünsoüh apa tü nyankü athe ta thut. Lüko apaüh, “David Thso! Ngo tü atsüojin!” ta tekkü weshin.

⁴⁰Yisu tsaküta nung khaiunia apa dongai nialoukü ashi ta ngiom. Tilai apa shimkü shin, Yisuüh apa tü sang,

⁴¹“Ngo athaiutha ti chhi-iao aiuji?” Apaüh thalan, “APAOU, Ngo epshiao aiuji.”

⁴²Nai Yisuüh apa tü ngiom, “Ni lüepshi! Ni monglam nou ni lomei-iu.”

⁴³Nungailu apaüh ep, naiuso Goa nian lomkü apa phiai hoilut. Tilai khaiunia apem nou nung ep, Goa hau nianlom kiu.