Read Khiamniungan Naga Luk 19 Bible Online

Luk 19 - Khiamniungan Naga bible

Luk 19

²Nungko Zachaeus ta niankü liukim shitsün naiuso memei khaiunia atengting tsak kihküla.

³Apaüh Yisu nung sau ta yam; lüko apa konsitheng letletkün shioko, hoi piaküphe Yisu epao tsüshio.

⁴Nungtiphe apa khaai khaolaokü khukü, Yisu epao thaiutha latpai nai sung, tititenai Yisu nungai khuao noiküla.

⁵Tilai Yisu nungai shin, apaüh koyai thapsankü ngiom, “Zachaeus, shakta asao, tititenai lonyi ngo atsamai sao-e.”

⁶Apa khaolaokü saoküta Yisu monglingkü nialou.

⁷Tilai hoi nou nung ep, ngüso apemüh namnamkü ngiom, “Nung khaiunia nou angei khaiunia tsak ün tsamai mesan tsakli noiao khuji!”

⁸Zachaeusüh tsakü APAOU tü ngiom, “Anglu, APAOU! Jü jengtsaiu apaitso ngo tsosilu hai hao kiu-e, küta ngo tsütsüokü ajantso phamong ainou tso louwankü noinai tsakko püle phopkü kiuko.”

⁹Yisuüh apa tü ngiom, “Lonyi nung tsamai aasan shikü noin, tititenai apa lüko Abraham thsaosithso noin.

¹⁰Tititenai Khaiunia Thso amowan nou yamao naiuso kipsanao shin.”

¹¹Ngüsoüh nungso angnai, apaüh loüh athatlu ngio tsak chiteshin. Nungai apa Yirusalem shimkü noiküla, naiuso ngüsoüh Goa nokshing jamaolu shi-e ta yang.

¹²Nungtiphe apaüh ngiom, “Atao tsakko asong khaiunia tsak goumchi laiukü tsakai khukü nokpao shanlouküta tsamai laokü yashiao ayang noiküla.

¹³Apa süme motsaloukünai apaüh tsamki che nouso jonshikü ngüso hao chaiou tangka tsak tsak kiuküta ngiom, ‘Ngo moyashikün lektso lüchaile.’

¹⁴Lüko nung goumchiko noinsoüh apa chinyan naiuso apa phiai ngiothi nouso hongkü ngiom, ‘Sam khako nung khaiunia hao nokpao-iao tsüaiu.’

¹⁵“Tilai apa nokshing nou louküta laokü yashin, apaüh tangka loutsün tsamkihoi nouso chaile nai ti aphop ep nung ngeao aiukü ngüso apa dongai jonao ngiom.

¹⁶Nungai ayating nou shikü ngiom, ‘APAOU, ngo chaiou tangka tsak nouko aphop che lesan.’

¹⁷Apaüh tsamki tü ngiom, ‘Thaiumei,’ ‘Ni tsamki amei tsak! Ni thatü ehen nai mong lamphe, ni nokshing che khaiuko nokshingao lüthe.’

¹⁸Nime nou shikü ngiom, ‘APAOU, ngo chaiou tangka tsak nouko aphop pungo lesan.’

¹⁹Apaüh tsamki tü lüko ngiom, ‘Ni lüko nokshing pungo khaiuko nokshingao lüthe.’

²⁰“Tsamki ongko amao tsak nou shikü ngiom, ‘APAOU, a-chaiou tangka sübao ngo ne nou tsanshikü wan nung nungkha.

²¹Tititenai ni mongkan khaiuniaphe ngo ni lon hat. Sübao ni nou tsüde ni nung louji, naiuso ni sübao ko tsüshiupeng nungko yamheji.’

²²Apaüh tsamki tü ngiom, ‘Ni tsümeikün tsamki! Angio tsangkü ngü ami khemkiu-e! Ni ngo mongkan khaiunia ta ngen, ngo sübaoko tsütaiu, nungai louji naiuso sübaoko tsüshiupeng nungko yamheji ta ni ngen.

²³Naito ni jü tangka amaohai hao tiau tsülaiukiu? Nung laiukiu tünto ngo shinai nung aphop hakü eppela.’

²⁴“Nai apaüh shimkü noinso tü ngiom, ‘apa ainou chaiou tangka nou kankü lükhuwan, küta chaiou tangka che taiutsün hao lükiu.’

²⁵Ngüsoüh apa tü ngiom, ‘APAOU, apa chaiou tangka che taim!’

²⁶Apaüh ngiom, Ngo asam tü ngio-e, ‘Sauüh tsütaiu apa tilüsong taim nung lüko apa ainou kankü khuwan-e.

²⁷Lüko ngüso khaiuko ngo nokshing the-iao tsüaiukün eh nouso nungai nialoukü ashi, naiuso jü khako ngüso lüloat!’”

²⁸Nung chiteküta apa Yirusalemai khu.

²⁹Tilai Yisu Olip king ta jontsün Betfage naiuso Bethani shimkü shin, apaüh sahoi nime hongkü ngiom,

³⁰“Asam khako noitsün nokai lünap: Asam napnai gado thso tsak sübao ko khaiunia nou tilaitso tsünoilu, nung phantaiukü eppe, nung sokloukü ashi.

³¹Ajantsoüh asam tü tiau nung sokji ta sangnai asamüh nungti lüngio, nung APAOU nou pokü ta apa hau lüchite.”

³²Naiuso ahongtsünso khunai Apaüh ngüso tü ngiotsünli eplou.

³³Ngüsoüh gado thso nou soklounai APAOU nousoüh ngüso tü ngiom, “Asamüh tiau gado thso nou sokji?”

³⁴Ngüsoüh thalakü ngiom, “APAOU thaiutha nung poukü noin.”

³⁵Ngüsoüh nung Yisu dongai kankü shin, naiuso ngüsoüh gado thso chiai ngüso ne sakiu.

³⁶Yisu khutsünko ngüsoüh yamai ngüso ne sakiu.

³⁷Tilai apa Yirusalem shimkü Olip kingai saokü khutsün yamai shisaom, nai sahoi apem nou monglingkü ngüsoüh eptsün athanga chhi thaiutha sang asong nou Goa nian lomao yachukü ngiom,

³⁸“APAOU nianko shitsün Nokpao thaiumei! aün nai aalu naiuso akhengting nai ajinka!”

³⁹Nai hoi ongko Farisi ajantsoüh ngiom, “Atsandetsün, asahoiso tü lüthut!”

⁴⁰Yisuüh thalan, “Ngo asam tü ngio-e, nungso tsamkü noian naito, lung nousoüh veau tsalou-e.”

⁴¹Yisu Yirusalem noknio shimkü shinai apaüh nung epkü shapkü ngiom,

⁴²“Ni nung ajekhaiu nai aalu thaiutha tilüsong poukü noin nunglu lüko ngetünto! Lüko lo asamüh nung epau tsüshio!

⁴³Tititenai ehoi nousoüh ni lemlowanküta ni tsüshikhu-ishikü pemongai kiapjeikü wananao adongai nung ajekhaiu nouso shi-e.

⁴⁴Ngüsoüh ni naiuso apemongko noitsün khaiuniahoi soimokü wane; lung tsaktso athang nouko tsületaiu-e, tiautenai ni kipsanau Goa shitsün atao nou ni tsüngesan!”

⁴⁵Nai Yisu Amkham tsamai napküta chaile oulehoi tü thutkü ngüso komanau yachu.

⁴⁶“Nung Asiongio nai satkü taim, ‘Jü tsam tü misao saotsün tsam ta jone’ lüko asamüh nung kaohoi solutsün athangau iula-in!”

⁴⁷Ajekhaiu pungkü Yisuüh Amkham tsamai tsande. Atengting mesonhoi, Ngiokhem tsandetsünso, naiuso aheihoi nousoüh Yisu loattao aiukü noiküla.

⁴⁸Lüko ngüsoüh nung chhiau yam titso tsüep, tiautenai apa ngioyak tsaktso tsüsa-ankü angao apem nou thatü mongchiokü noiküla.