Read Khiamniungan Naga Luk 2 Bible Online

Luk 2 - Khiamniungan Naga bible

Luk 2

¹Nung ajekhaiu ko goumchi apemai nian sattao noin ta Caesar Augusta Akhengting nokshing ainou ngiokhem hong.

²Nung Quirinius Syria goumchiko nokshingpaou noinai aya niansat noiküla.

³Apem meshen nian satao meshen noksong ai khun.

⁴Yosep lüko Galil ai Nazaret noksong ainou Yihuda ai Betlehem ta jontsün, David noksongai sung, tititenai apa David kau naiuso tsammong ainou noiküla.

⁵Apaüh emkü noitsün Mari pemtsükengkü noinai, apa nian satao thaiutha khun.

⁶Ngüso Betlehem ai noinai, apa methso chettao ajekhaiu saojikan.

⁷Apaüh ayating melothso chet. Naiuso apaüh apa niothom ne nou nyingjeikü tsokap hetsün kim tsak ko taiu, tititenai ngüso anoiao tsampai tsünoiküla.

⁸Nung shingkhannio nouko onnemok jimhoi ahsu meshen onnemok jimkü noiküla.

⁹APAOU aünhong tsak ngüso shimkü tsakü APAOU ajinka ngüso lemkü thsalut. Naiuso ngüso thatü hatkü noiküla.

¹⁰Hong nou ngüso tü ngiom, “Tsühatkü lünoi! tititenai athaplu, ngü asam dongai khaiunia chikü thaiutha amongling asong ngem amei kankü shiji.

¹¹Tititenai lonyi asam hao David noksong nai Aasantsün tsak chetkü noin; apa APAOU Khrista noin!

¹²Naiuso asam tü ii nou nung noi-e; asamüh methso tsak niothom ne nou nyingjeikü, tsokap hetsün kim nai saikü eppe.”

¹³Alekta aünhonghoi piakü sungkü Goa nian lomkü ngiom:

¹⁴“Asongting nai Goa tü ajinka, naiuso goumchi ko apa mongtsamtsün khaiunia ongko aalou!”

¹⁵Tilai aünhong nouso ngüso ainou pungekü aün ai sung, onnemok jimhoi nou chitekü ngiom, “Ti APAOU nou sam tü nge-in naiuso ti sung, lo samüh Betlehemai saokü nung ta thapao khuko.”

¹⁶Ngüsoüh khaolaokü shikü Mari si Yosep neko methso nou tsokap hetsün kim nai saikü ep.

¹⁷Tilai ngüsoüh nung ep, methso nou thaiutha ngüso tü ngio ngiotsün nge-in.

¹⁸Nung luküta chikü nou ngüso tü onnemok jimtsünsoüh chitetsün thaiutha ngawan.

¹⁹Lüko Mariüh nung ngiotsün chikü mongai yangkü taiu.

²⁰Ngüsoüh ngiotsün naiuso eptsün chikü thaiutha ngüso tü ngiotsünli, onnemok jimtsünsoüh Goa ajinka-ikü nianlomkü laokü shin.

²¹Tilai apa tippanao ajekhaiu petjeinyi thapungjikan, aünhong nou thaimongai pem tsükengkü moiulakünai nian kiutsünli apa nian Yisu ta nian.

²²Tilai Mosa Ngiokhemli ngüso losiotsün ajekhaiu saojikan, Yosep si Marineüh methso nou APAOU hao kiuao thaiutha Yirusalemai kanlükhun.

²³Tititenai APAOU ngiokhem nai satkü noitsünli! “Aya chet nou melothso pungkü APAOU tü asio ta jone.”

²⁴APAOU ngiokhem nai ngiotsünli, mükham nime tsüdekünai chongmükam thso nime ngüsoüh chaithio kiuao shin.

²⁵Nung taoko Yirusalemai khaiunia tsak nian nou Simeon; nung asio naiuso don nai mongkiukü tsüojintsün noiküla. Israel kipsanao nou thaiutha apaüh taiukü; naiuso Asio Onthso apa khako noiküla,

²⁶naiuso APAOU nou thaloutsün Messiah moepkün lektso apa tsü-e-e ta thatkü noiküla. Asio Onthso nou niakü apa Amkham Tsamai sung.

²⁷Tilai Yisu methso thaiutha ngiokhem saili kankeiao posinyiu nou apa kankü shin,

²⁸Simeonüh apa pha nou Yisu loum, naiuso Goa lomsankü ngiom;

²⁹“Lo APAOU, ni angioli, ni yathsüotsün aalu nai lüpunge-i.

³⁰Tititenai Melemaohoi tü awon achiai sungao naiuso asahoi Israel tü achiai sungao naiuso asahoi Israel ajinkaao thaiutha,

³¹Sübao ni hoi nouso kha chikü khako khemlu-iu;

³²Jü nioveiüh aasantsün epiu.”

³³Apa posinyiu ne apa thaiutha chitetsün nou ngakü noi.

³⁴Simeonüh ngüso oukkiu naiuso apa nyiu Mari tü ngiom, “Nung methso nou Goa nou Israel nai aloianiao naiuso akipsanao thaiutha chosan. Apa thako khaiunia piakü chiteao apa Goa ainou ii tsak noi-e.

³⁵Naiuso ngüso akhei mongyang achiai sungi-e, naiuso sah amon nou hetsünli, amongsaiu nou asam meshen mongpem lothe-e.”

³⁶Nungai jihi E-nyiu tsak nian nou Anna, Asher kau ainou Fanuel thso noiküla. Apa meso tao apa tsammongpo ko pon chinyat kihakütün phiai lo pon aopetjeikü püle ngoikü apaüh Amkham Tsam tsüle; Apaüh ahsu naiuso ahnyi tsüyangkü Goa amkhamkü keithon naiuso misaokü noiküla.

³⁷

³⁸Nung taokolu sungkü apaüh Goa hao nianlom kiu naiuso Yirusalem aasan thaiutha taiutsünso chikü tü methso nou thaiutha chite.

³⁹Tilai APAOU ngiokhemli ngüsoüh chhi apem khemküshin, ngüso Galil ai noitsün meshen noksong Nazaret ai laokü shin.

⁴⁰Methso nou songjikan, naiuso oukongkü iulan; apa mongyang ahaopungkü iula naiuso Goa ouk apa khako noiküla.

⁴¹Pon tsütokü Yisu posinyiu Aasantsün Sümai taoko Yirusalem ai sung.

⁴²Tilai Yisu pon chekü nime ngoi, ngüso sümai nai haao Yirusalem ai sung.

⁴³Tilai sümai ajekhaiu thonkü shin, ngüso laokü yanai, Yisu Methso tsüyahakü Yirusalemai noian.

⁴⁴Naiuso apa posinyiuüh nung tsüngekü, lüko apa haiso ongko noi-e ta yangkü ngüso ajekhaiu tsak yam khuwan. Nungai ngüsoüh tsammonghoi naiuso haiso ongko apa tü yam, lüko tilai ngüsoüh apa tsüep,

⁴⁵apa tü yamkü Yirusalem ai laokü khushi.

⁴⁶Ajekhaiu samnyi khukütün phiai ngüsoüh apa amkham tsamai atsandetsünhoi jetko ngüso ngio angkü naiuso ngüso tü ngio sangkü moknoikü ep.

⁴⁷Apa ngio lutsünso chikü nou apaüh ngetsün naiuso thalatsün nai ngawan.

⁴⁸Tilai ngüneüh apa ep, ngüne ngawankü apa nyiuüh apa tü ngiom, “Methso, tiau ni sam tü nungti kankei? Apo si ngo mongtsonkü ni tü yam.”

⁴⁹Apaüh ngüne tü ngiom, tiau asamüh ngo yamji? “Ngo jü po tsamai noi-ela ta asamüh tsüngeso?”

⁵⁰Lüko apaüh ngüso tü ngiotsün ngüsoüh tsüngela.

⁵¹Apa ngüso ko Nazaret ai shin, küta ngüso ngiokhem ko noi. Naiuso apa nyiuüh nung ngiotsün chikü meshen mongai taiu.

⁵²Yisu mongyang nai, pem nai, Goa naiuso khaiunia khako atsüojin nai songjikan.