Read Khiamniungan Naga Luk 20 Bible Online

Luk 20 - Khiamniungan Naga bible

Luk 20

¹Nyitso Yisu amkham tsamai khaiuniahoi tü chimkü noiküla, petchehoi nouko Akhengteng mesonhoi naiuso ngiokhem tsandetsünso shikü, “ni nungti chhiao ti ayam noin?”

²“Ni hau nung oukong kiutsün sau? Ti tsangkü ni nung chhiji? Sam tü angio” ta ngüsoüh apa tü ngiom.

³Yisuüh thalakü ngüso tü ngiom, “Ngo lüko asam tü ngio tsak sangko. Ngü hao achite,

⁴Yohanüh limkiutsün aün ainou süne, tsüdekünai khaiunia ainou?”

⁵Ngüso si ngüso chitekü ngiom, “Samüh ti ngio-e? Samüh ‘Aün ainou’ ta ngionai, ‘Naito, asamüh apa tü tiau tsümonglam?’ ta apaüh ngio-e.

⁶Loüh samüh ‘khaiunia ainou’ ta ngionai, khaiunia apem nou sam da lung nou yakk-e, tititenai Yohan E-po tsak noin ta ngüsoüh ngekü noin.”

⁷Nungtiphe ngüsoüh thala, “Nung ti ainou shin samüh tsünge.”

⁸Yisuüh ngüso tü ngiom, “Ngo lüko ti tsangkü nung chhiji asam tü tsüngio-e.”

⁹Nai apaüh nung athatlu ngio sahoi hao chite: “Khaiunia tsaküh sainaoshep eiu an, naiuso eiu a-tsünso hao mephaiu taiukiukü goumchi amao tsakai atao laiukü thaiutha khuwan.

¹⁰Tilai be-eiuyam atao shisao, nungai eiu a-tsünsoüh apa hao sainaoshep nou kiuao ngüso dongai tsamki tsak hong; lüko eiu a-tsünsoüh apa woiatkü tsosa hongshin.

¹¹Loüh apaüh tsamki amao tsak hongshi; naiuso apa tü lüko woikü lomiamkü kankeiküta tsosa hongshin.

¹²Loüh apaüh süme nou hongshi; naiuso ngüsoüh apa lüko tawaikü kuman.

¹³Nai sainaoshep eiupao nou ngiom, “Ngo ti chhi-e? Ngü jü thso ngo tsüojintsün honge, ngüso apa lon hat-esao!’

¹⁴Lüko tilai eiu a-tsünsoüh apa ep, ngüso chitekü ngiom, ‘Nung tengkam kamtsün noin, samüh apa loatküta tengkam nou theko!’

¹⁵Ngüsoüh apa sainaoshep eiu ainou komankü loat. “Nungtiphe Sainaoshep eiupao nou ngüso tü ti chhi-e?” ta Yisuüh sang.

¹⁶“Apaüh shiküta nung eiu a-tsünso mowan-i-e, naiuso sainaoshep eiu nou amaohai hao kiuwan-e.” Ngüsoüh nung lulanai ngiom, ‘nungti to lathesai!”

¹⁷Lüko apaüh ngüso tü thapkü ngiom, ‘Naito tsamlahoi nou sübao lung tsüthekü wanan, nung tsamnou lungkheam atengao iulan, ta asiongio nai sattaiu nou ti thaiutha hanji?

¹⁸Nung lung nou chiai sau sali-e apa nelangkü phetne-e; naiuso sau tü nung salut-e nungüh apa pukhaoli thionyoman-e.”

¹⁹Nung athatlu ngio nou ngüso tü ngioji ta ngelakü, ngiokhem tsandetsünso naiuso atengteng mesonhoi nousoüh Yisu nung athang nailu thalou-ao kowe; lüko ngüso khaiuniahoi lon hatkü noiküla.

²⁰Nungtiphe ngüsoüh akuo amei ta yam. Ngüsoüh Rom nokpao phamongko apa oukong nai kiuwanao thaiutha apaüh chitetsün ngio nai tsütsüokü nou thalouao jiokü asiohoili aliluao hong.

²¹Ngüsoüh apa tü sangkü ngiom, “Atsandetsün, ni ngiotsüo ngioji naiuso tsandeji, naiuso phaphi phamong tsüchhiji, lüko ngiotsüo nou Goa yam chimji, ta samüh ngen.

²²Samüh Caesar hao liukim kiutsün nung sam Ngiokhem thako noin süne tsüde?”

²³Lüko ngüso akaosai ngekü Yisuüh ngiom,

²⁴“Ngo hau tangka tsak ahan. Nung sau sotsom naiuso sau niansat?” Ngüsoüh ngiom, “Caesar.”

²⁵Apaüh ngüso tü ngiom, “Naito ti Caesar ün nung Caesar hao lükiu, naiuso ti Goa ün nung Goa hao lükiu.”

²⁶Ngüsoüh khaiuniahoi dongko apaüh chimtsün nai thalouao tsüshiokü noiküla, naiuso apaüh thalatsün nai ngüso tsüsingiokü ngala-an.

²⁷Nungai e nouso ahkü tsüshi-e ta chitetsün Sadoki ajantso apa dongai shin.

²⁸Ngüsoüh apa tü sangkü ngiom, “Atsandetsün, khaiunia ajantso adei nou thso tsühakü menyiu nou taiukü ean nai anio nou nung menyiu louao noin, naiuso apa thaiutha tengkam sung-iao noin ta Mosaüh sam hao sattaiu kiu.

²⁹Nungtiphe adeianio chinyat noiküla; naiuso thsoyam chong nou menyiu tsak lou, naiuso thso tsühakü ean.

³⁰Nai nime nou apa lou,

³¹naiuso süme, naiuso nungti chinyat chikü nou lou lüko thso tsühakiukü ean.

³²Nungphiai menyiu nou ean.

³³Nungtiphe e nouso ahkü shinai ngüso ongko menyiu nou sauüh the-e? Tititenai chinyat nouso chikü nou menyiu apalu lou.”

³⁴Yisuüh ngüso tü ngiom, “Nung goumchi khaiunia nou meshen tsamsigoh shankü melo tsamai khuji.

³⁵Lüko melo naiuso menyiu sauhai müjam ahkü shiao maikü noin, ashiao nou goumchi ai tsamsigoh tsüyang-e.

³⁶Tsüdekünai loüh ngüso tsü-e shi-e; tititenai ngüso e ainou ahshitsün thsosophe aün honghoi nousoli ngüso Goa thsoso noin.

³⁷Lüko tilai Mosaüh pai-eng nai APAOU tü Abraham Goa, Isak Goa naiuso Yakob Goa ta jon, apaüh e nouso ahkü shi-e ta chim.

³⁸Nungtiphe apa e nouso Goa tsüde, lotü aa noinso Goa, tititenai apem nou apa da aa kihji.”

³⁹Ngiokhem tsandetsünso ajantsoüh thalakü ngiom, “Atsandetsün! ni meikü ngio-iu.”

⁴⁰Tititenai ngüsoüh apa tü ngio piakü sangao tsüsom.

⁴¹Apaüh ngüso tü sang, “Mesia David thso ta ngüsoüh titi ngioji?

⁴²Tititenai David apa pemüh Nianlom Jih thsam nai ngioji, ‘APAOU nou jü APAOU tü ngiom: Ngo a-ehso ahok khemai motaiukün lektso,

⁴³Ni ngüko uai anoi.’

⁴⁴Davidüh apa tü ‘APAOU ‘ta jonnaito, Apa David thsaosithso theao shio-e süne?”

⁴⁵Khaiunia apem nou angkü noinai apaüh apa sahoiso tü ngiom,

⁴⁶“Sauhaiüh ne laiukü tenkü tsakeiao, chaikamthang nai salam lou au, Yihuda kamthang nai asong noikham naiuso nyong khako asong aiuji;

⁴⁷naiuso jihihoi tsam puploukü akaosai nou laiukü mi saokü hanji; nungso Ngiokhem tsandetsünso thaiutha lütsüolo, ngüso angja atsaoteng noi-e!”