Read Khiamniungan Naga Luk 21 Bible Online

Luk 21 - Khiamniungan Naga bible

Luk 21

¹Yisuüh lemkü thapnai, memei haiüh amkham chai kamtaiutsün nai ngüso paopei nouso thiokü ep,

²naiuso tsosilu jihi tsaküh nungai poisa nime thiotsün lüko ep.

³Yisuüh ngiom, “Atsüoting ngo asam tü ngioko, ngüso chikükonai nung tsosilu jihi nou pia thio-iu.

⁴Tititenai ngüso chikü nou jengtsaiu apia ainou chai kamtaiutsün nai thiokiu, lüko jihi nouto apa tsosilu ainou apa aa thaiutha kamtaiutsün apem thiokiu.”

⁵Sahoi ajantsoüh Amkham tsam nung titi athapao meikü lung naiuso Goa hau chaithio kiukü aleng meikü shan ta chitenai, apaüh ngiom,

⁶“Asamüh ti epji nung thaiutha ajekhaiu shisao-e, nungko lung tsüloiankü tsak chiai tsak ta poikü tsünoi-e.”

⁷Ngüsoüh apa tü sang, “Atsandetsün, naito nung tilai shinape? Tilai nung shinapao atao shimkü shisao-e, ii nou ti noi-e?”

⁸Yisuüh ngiom, “Asam atsüotsüdekünai tsünialükhun-iao lütsüolou. Tititenai piakü nou jü nianko shikü ‘ngo apa’ ta ngio-e; naiuso Atao shisao-iu ta ngio-e; ngüso phiai lahoilut!

⁹Tilai ehli naiuso angemsingem sungtsün lula-e, lalekkat; tititenai nung chong shinapao noin, lüko nung athon tsüde.”

¹⁰Nungai apaüh ngüso tü ngiom, “Singkhan nou shingkhan thako, nok nou nok thako tsalou-e.

¹¹Nungai ajantso ai gohhaiu asong, ajantso ai naiusile, ajantso ai imkia, naiuso aün ainou ahattao ii asong noi-e.

¹²Lüko nung apem moshinapkünai jü nianko ngüso pha asam tü pou-e, naiuso nokpaohoi naiuso nokshingpao dongai kankü shikü asam Yihuda kamthang naiuso akhou tsamai wankü omhean-i-e.

¹³Nungko asamüh mitha kiuao thaiutha atao noi-e.

¹⁴Nungtiphe asamüh titi thala-e atao mosaokünai tsüyangelatao lüyangsan.

¹⁵Tititenai asam eh apemüh athalaao tsüshiokü nou son naiuso mongthat ngo asam hao kiu-e.

¹⁶Lüko asam posinyiu, deisinioso, tsammongso hai nousoüh janhe-e, naiuso ngüsoüh asam ajantsoto ean-i-e.

¹⁷Jü nian thaiutha apem nou asam lon chinyan-e.

¹⁸Lüko asam khaiu ainou khaiuou pem tsaktso tsümo-e.

¹⁹Ajeilu nai asamüh asam onthso shio-e.

²⁰“Lüko tilai asamüh Yirusalem lemlouwankü eppe, nungai alotheantsün atao shimaniu ta lüngelou.

²¹Nungai Yihuda nai noinso king nai lükhuwan, naiuso Yirusalem awem nai noinso soikü lükhu, naiuso nok kumai noinso nokai lanap.

²²Tititenai asiongio nai satkü taiutsün apem shinapao thaiutha nung, ‘Angja kiutsün Ajekhaiu noin.’

²³Nung taoko pem tsükengkü naiuso nyao chepitsünso thaiutha inyate! Tititenai goumchi ko angja asong nung khaiunia tü mongmattsün noi-e.

²⁴Ajantso sah nou loat-e, naiuso ajantso thaloukü shingkhan apem dongai nialükhun-e. Melemaohai thaiutha atao mosaokün chikü ngüsoüh Yirusalem tü ngamkei-e.

²⁵“Nungai aje, alei naiuso kianthsüo nai ii sung-e. Goumchi ko shingkhan naiuso khiamnok naiuso khiampek ngem angtsün nou angja-e.

²⁶Khaiuniahoi ahat nou goumchiko shinaptsün epkü eao lümeikü iula-e, tititenai thengmia nai oukong naiuso ajinka asong hakü shitsün eppe.

²⁷Nai thengmia nai oukong asong ajinka nouko Khaiunia Thso shitsün eppe.

²⁸Lüko tilai nungso thawao-e asam kha koiyai athapsan, tititenai asam aasan shimkü shiji.”

²⁹Nungai Yisuüh ngüso hau athatlu ngio tsak chite: “Latpai naiuso amao pai apem ta athaplu,

³⁰Ngüso tilai paison iulakü asah nou sung-e nung epnai asamüh asam chija asaiu shimkü noin ta ngeji.

³¹Nungtili tilai asamüh nung thawaotsün eppe, Goa nokshing shimkü noin ta lüngelu.

³²“Lo kihkü noitsün khaiuniahoi nouso moeankhemkünai nung apem thawao-e ta lüyangsan.

³³Aün naiuso goum yanlükhun-e, lüko jü ngio tsüyanlükhun-e.

³⁴“Lüko asam chija lütsüolu! Nungti tsüdekünai thaipup, thengtok naiuso nung aakih ayangelat nou asam lethsangkü la-iula-i, naiuso nung ajekhaiu ko jin naili asam monan-e.

³⁵Tititenai nung goumchi apem dongai shi-e.

³⁶Ashinapao noitsün apem nai thakhuao naiuso Khaiunia Thso khako tsaao shiokü hau asam atao pungkü nai thsümonkü lünoi!”

³⁷Ajekhaiu pungkü Yisuüh Amkham tsamai tsandekü noiküla, naiuso aso pungkü apa khukü Olip ta jontsün king nai atao wan.

³⁸Ahom tsütokü khaiunia apemüh amkham tsamai apa ngio angao shin.