Read Khiamniungan Naga Luk 22 Bible Online

Luk 22 - Khiamniungan Naga bible

Luk 22

¹Aasan Sümai ta jontsün phoplao tsüthiokün Themtsai Sümai heao atao shimkü noiküla.

²Atengting mesonhoi nou Ngiokhem tsandetsünso hau apa titi akao ai ean-i-e ta ayam yam, tititenai ngüso khaiuniahoi lon hat.

³Nai sahoi chekü nime ongko tsak nou, Yihuda Iskariot ta jontsün da Biya nap.

⁴Nungai Yihuda Iskariot khukü atengting mesonhoi naiuso amkham tsam ehü ahei nouko apa titi janhe-e ta ngemlou.

⁵Ngüso monglingkü, apa hao tangka kiuao thalou.

⁶Apaüh mongchio lüko hoi nouso tsünoikünai ngüso hao apa janthioao atao amei yam.

⁷Phoplao tsüthiokün Themtsai Sümai ajekhaiu, sübaoko Aasantsün Sümai thaiutha onnemok hoi chaithio luatao atao shisao.

⁸Yisuüh Peter si Yohan ne hongkü ngiom, “Khuküta sam thaiutha Aasantsün Sümai heao lükhemlou.”

⁹Ngüsoüh apa tü sangkü ngiom, “Ni sam hao nung Sümai tiai khemlou-iao aiuji?”

¹⁰Apaüh thashin, “Athaplu, tilai asam nokai nap-e, nungai khaiunia tsak khiam meng kankü asam ko phete-e. Apa sungtsün tsamai lühoilut.

¹¹Küta asamüh tsampao tü lüngio, ‘Atsandetsün nou ni tü, Ngo jü sahoiko Aasantsün Sümai heao mesan tsampai tiai noin?’ ta ngioji.

¹²Apaüh asam hao asungthon tsampai asong nai jengtsaiu apem khemtaiukü han-e nungai lükhemlou.”

¹³Ngüso khunai apaüh ngüso tü ngiotsünli ep, naiuso ngüsoüh Aasantsün Sümai nou khemlou.

¹⁴Tilai nung Aasan Sümai heau atao shisao, apa sahoi nousoko moknoi.

¹⁵Apaüh ngüso tü ngiom, “Ngo moangjakünai nung Aasantsün Sümai asamko heao thatü aium!

¹⁶Tititenai ngo asam tü ngioko, Goa nokshing moshikün lektso ngo tilaitso nung tsühe-e.”

¹⁷Nai apaüh thengkam tsak loukü nianlom kiukü ngiom, “Nung lülou küta asam ongko lüsonshiu;

¹⁸tititenai ngo asam tü ngioko, Lo yakü Goa nokshing moshikün lektso ngo nung theng tsüshiu-e.”

¹⁹Nai apaüh themtsai nou loukü nianlomkiukü nung lopek küta ngüso hau kiukü ngiom, “Asam thaiutha kiutsün nung jü pem. Ngo yangsankü nung lükankei.”

²⁰Sümai heküta nungti apaüh thengkam loukü ngiom, “Nung thengkam jüshe ii thaolutkü taiutsün athalou-e ayan, asam thaiutha lopengtsün noin.”

²¹“Lüko athaplu! ngo shapthiotsün ngüko hakü nungko pou nai noin!

²²Tititenai Goa nou thattaiutsünli, Khaiunia Thso atsüoting ean-e, lüko sauüh apa sapthio-iji, nung khaiunia thaiutha inyate!”

²³Nai ngüso si ngüso sauüh nung chhi-e ta sang-eao yachu.

²⁴Sahoi nouso ongko sau asongting ta tsüo-ejikan.

²⁵Yisuüh ngüso tü ngiom, “Goa tsüngekünso nokpaohoi nou ngüso khako APAOU iula-iji, naiuso sauhai ngüso khako oukong noin, ‘Khaiuniahoi haimei’ ta jonji.

²⁶Lüko asam to nungti tsüthe-e; lüko asam ongko sau asongting noin, apa niophi haili naiuso sau asongting noin apa ayathsüotsünli iula-ela.

²⁷Tititenai chihetsün nai kamtsün süne tsüdekünai asonkiutsün song? Chih hetsün nai moknoitsünso tsüdeso? Nungti ngo asam ongko asonkiutsünli noin.

²⁸“Lüko ngo angjatsün chikü nai asam ngoko noiha;

²⁹jü poüh ngü hao nokshingao oukong kiutsünli, ngü lüko asam hao oukong kiu-e.

³⁰Asamüh jü nokshing nai jüpo uai heshiu-e, naiuso asamüh nokpao noikham nai moknoikü Israel mele chekü nime nouso chiai nokshing shinge.

³¹“Simon, Simon! Aanglu! Amei naiuso tsümei janthatau, eiu a-khaiunia tsaküh tsothsüo naiuso tsonyak janthattsünli janthatau Satan nou asam tü theluao ngiokhem epaniu.

³²Lüko ni amonglam ashio tsüepkü tsüdekü hao, ngü misao sao-iu, naiuso ni tilai müjam mong nou phokle-e, adeisinioso ou lülokong.”

³³Peterüh Yisu tü ngiom, “APAOU, ngo niko aikü akhou tsamai khuao naiuso eao lüko khemloukü noin!”

³⁴Yisuüh ngiom, “Peter, ngo ni tü ngioko, ni ngo tsünge ta samjam mothaloukün lektso lüso waio nou tsükowe.”

³⁵Yisuüh apa sahoi tü sang, “Tilai ngü asam nekong naiuso hokkhut tsükankü hong, nungai asam tsoüh tsüsaiukü noilümo?” Ngüsoüh ngiom, “Tsünoi.”

³⁶Apaüh ngüso tü ngiom, “Lüko lo, sauüh nekong taim, nungso lükan. Naiuso sauüh titso tsütaiu, apaüh apa ne lüjan naiuso sah nou tsak lütuh.

³⁷Tiautenai asiongio nai, ‘Apa ngiokhem lothetsünhoi akuo nai vethioha’ ta ngiotsün nung jü thaiutha sattaiutsün shinapji ta ngü asam tü ngioji.

³⁸Ngüsoüh ngiom, “APAOU! athaplu! Nungko sah nime noin!” Naiuso apaüh thashin, “Nungüh saiu-e!”

³⁹Yisuüh noknio wankü apa saili Olip king ai khun; naiuso sahoiso apa phiai hoilut.

⁴⁰Tilai apa nung athangai shisaom, apaüh ngüso tü ngiom, “Asam alilu nai tsüsaliao misao lüsao.”

⁴¹Nai apa ngüso ainou intso khukü, kaukü napkü misao saokü ngiom,

⁴²“Jü po, ni mongchionai nung angja thengkam ngo ainou alouwan; nungti lüko jü mongchio tsüde amongchio lüthe.”

⁴³Aünhong tsak sungkü apa oulokongkiu.

⁴⁴Naiuso thatü angja noiphe apaüh thatü kongkü misao sao; apa lemlu goh ai she chan-itsün khekkü noiküla.

⁴⁵Tilai apa misao saotsün ainou chu, apa sahoi dongai shinai ngüso amongsaiu nou sailakü ep.

⁴⁶Apaüh ngüso tü ngiom, “Tiauta asam sailaji? Achu, naiuso asam alilu nai tsüsaliao misao lüsao.”

⁴⁷Yisu ngio chitekü noinai, hoi asong tsak Yihuda ta jontsün sahoi chekü nime ongko tsak nou ngüso heikü shin. Nai apa Yisu shimkü shikü sonai chep.

⁴⁸Lüko Yisuüh apa tü ngiom, “Yihuda, ni son nai cheptsün nou Khaiunia Thso shapthio-iji süne?”

⁴⁹Yisuko hakü noitsün sahoi nousoüh ti thawaoao noin nung ep, nai ngüsoüh sang, “APAOU, samüh sah nou kankeiko sai?”

⁵⁰Ngüso ongko tsaküh Akhengting Meson tsamki da sah nou hekü apa noukhan uai nou heankiu.

⁵¹Lüko Yisuüh thalakü ngiom, “Nungtitso athean!” Nai Yisuüh tsamki noukhan nai thankü lomeikiu.

⁵²Nai Yisuüh apa thako shitsün atengting mesonhoi Yihudahai ashehoi naiuso petchehoi tü ngiom, “Asam ngiokhem lothetsün thako shitsünli sah naiuso paiyan kankü shijiso?

⁵³Tilai ngo asamko amkham tsamai ajekhaiu pungkü noiküla, asamüh ngo da pha tsüpou; lüko nung asam atao naiuso anyakhem oukong nou shingtsün atao.”

⁵⁴Ngüsoüh Yisu thalouküta nialoukü khukü Akhengting Meson tsamai kankü shin. Lüko Peterüh apa phiai kumaikü hoilut.

⁵⁵Tilai ngüsoüh kewem nai in nou ja naiuso aikü kam, Peter ngüso ongko moknoi.

⁵⁶Meson tsamki tsaküh apa nungai moknoikü epkü Peter tü thapkü ngiom, “Nung khaiunia nou Yisuko noiküla!”

⁵⁷Lüko Peterüh tsüthaloukü ngiom, “Nyiuhai ngü apa angetso tsünge!”

⁵⁸Entso noiküta, amaohai tsaküh Peter epkü ngiom, “Ni lüko ngüso ongko tsak!” Lüko Peterüh ngiom, “Khaiunia, ngo tsüde!”

⁵⁹Naiuso ghontao tsak thatso noiküta, amaohai tsaküh tsangsheikü ngekü ngiom, “Atsüoting nung khaiunia nou Yisuko noiküla, tititenai apa lüko Galil hai!”

⁶⁰Lüko Peterüh ngiom, “Khaiunia, ni ti ngioji, ngü tsünge!” Nungko apa chitekü noi taoko waio nou ko.

⁶¹APAOU nou lapkü shikü Peter tü thap. Nai Peterüh apa tü titi APAOU nou “lüso waio nou mokokünai ni ngo samjam tsüthalou-e” ta ngiotsün yangsan.

⁶²Apa soikü khuküta thatü thsüokü shap.

⁶³Yisu thaloutsün hoi nou apa lochi naiuso shiuh.

⁶⁴Ngüsoüh apa niovei kepokkiu, naiuso apa tü sangkü ngiom, “Ni tü shiutsün sau? Angesan!”

⁶⁵Naiuso amao ngio piakü ngüsoüh apa lochikü ngiom.

⁶⁶Tilai ahom shin petche nouso ajeiai nou atengting mesonhoi si ngiokhem tsandetsünso kamshi. Ngüsoüh apa ngüso ngiokam nai nialoukü shikü ngiom,

⁶⁷“Ni Khrista süne? sam tü angio.” Lüko apaüh ngüso tü ngiom, “Ngo asam tü ngionai asamüh mong tsülam-e.

⁶⁸Naiuso ngo asam tü sangnai asamüh tsüthala-e.

⁶⁹Lüko lo yakü Khaiunia Thso Goa oukong uai moknoi-e.”

⁷⁰Ngüso apem nou ngiom, “Naito ni Goa Thso süne?” apaüh ngüso tü ngiom, “Asamüh ngo apa ta ngioji.”

⁷¹Ngüsoüh ngiom, “Samüh amao mitha ti yamshiao tsünoi! Tititenai samüh sam chija apa son ainou lula-iu!”