Read Khiamniungan Naga Luk 24 Bible Online

Luk 24 - Khiamniungan Naga bible

Luk 24

¹Anoujet nouko ayanyap ahom ngüsoüh khemloutsün angannyam amei nyamtsün khaiutsom kankü etam nai shin.

²Naiuso ngüsoüh etam kiapjeitsün lung nou lekkankü ephe

⁴Ngüso nung thaiutha soisoileklekkü noinai, athaplu khaiunia nime ne ajin oukü tenkü ngüso shimkü tsa.

⁵Nungai ngüso ahat nou kha goh ai thaothio, nai nung ne ajin oukü tentsün khaiunia nime nou ngüso tü ngiom, “Asamüh tiau aa nou tü eanhai ongko yamji?

⁶Apa nungko tsünoi; apa ahkü shianiu. Apa Galil ai noitaoko asam tü titi chite, nung lüyangsan.

⁷‘Khaiunia Thso angeihoi phamongai thumkü kiukü hao noin, naiuso samnyi nouko ahkü shi-e.’”

⁸Nai apaüh ngiotaiutsün ngio nouso ngüsoüh yangsan.

⁹Nungai ngüso etam ainou laokü shikü nung sahoi chekü tsak nouso hau naiuso amaohai chikü hau chiten.

¹⁰Ngüso, Mary Magdalin, Yoana naiuso Yakob nyiu Mary noiküla; naiuso ngüso ko noitsün amao nyiuhai nousoüh sahoi hau nung chiten.

¹¹Nung ngio nouso yaang chitetsünli ngüsoüh yang, naiuso ngüso da mong tsülam.

¹²Lüko Peter tsaloukü etam ai khu, nai apaüh etamkhan mongai kaothiokü thaplunai ne ashethop noulu ep. Nai nung athawaotsün ti ta ngakü apa tsamai laokü khuwan.

¹³Nungnyilu Yisu tü hoiluttsün khaiunia nime Yirusalem ainou kilometer chekü tsak thatso nok tsak nian nou Emmaus ai

¹⁴khutsün yamko thawaokü shitsün apem thaiutha chitekü noiküla.

¹⁵Ngüne chitekü sang-enai, Yisu ngüne shimkü shi, naiuso ngüneko khuha;

¹⁶Lüko ngüne niovei tsütsüokü nou ngüneüh apa sau tsünge.

¹⁷Yisuüh ngüne tü ngiom, “Aje yamai akhunai chitetsün ngio nou ti?” Naiuso ngüne kha thaothiokü tsülemlemkü tsa-an.

¹⁸Ngüne ongko tsak nian nou Cleopaüh thalakü apa tü ngiom, “Yirusalem nai shamnoiküta ni nungko nung ajekhaiu nai ti thawao loüh tsüngeso?”

¹⁹Apaüh ngüne tü, “Ti in?” ta sang. Ngüneüh apa tü, “Nung Nazaret hai nou Yisu tü thawaokü noin,” ta thashin. “Nung khaiunia nou E-po tsak noiküla ta Goa nou naiuso khaiunia chikü nou apaüh ngiotsün naiuso chhitsün alum ko oukong nai noin ta tsangsheikü vesanji.

²⁰Atengting mesonhoi naiuso nokpao nokshinghoi nou apa e-iao phio-ikü thumkü kiukü paiphu nai lalut.

²¹Lüko apa Israel Aasantsün noin ta samüh yangkü noiküla! Ah, nung apem thawaoküta nai lonyi nou samnyi nou noin.

²²Loüh sam haiso ajantso ahom etam nai khukü sam lekkati-iu;

²³tilai ngüsoüh Yisu miapem tsüep, aünhong nousoüh apa aa noin ta ngiom.

²⁴Sam hoiso ajantso etam nai khunai nyiuhaihoi nousoüh ngiotsünli samüh lüko apa tsüep.”

²⁵Nai Yisuüh ngüne tü ngiom, “Asam titengkü mainga, E-po nousoüh ngiotaiu nou da monglamao outsükong!

²⁶Khrista nung angja omhe lüko apa ajinka nai napao tsünoi süne?”

²⁷Mosa naiuso E-po nouso ainou yakü asiongio apem apa thaiutha sattsün apaüh ngüne tü sasakü chim.

²⁸Naiuso ngüso khutsün nok shimkü shisaonai loüh Yisu khaai khushiaoli han,

²⁹lüko ngüneüh apa lulaokü ngiom, “Sam ko anoi-anha, tititenai aje saowanji.” Naiuso apa ngüneko shamanao khu.

³⁰Tilai Yisu ngüneko heshiuao moknoi, apaüh themtsai loukü oukkiu naiuso nung lopekkü ngüne hao kiu.

³¹Nungai ngüne niovei sopsat, küta ngüneüh apa ngekü iula. Lüko ngüneüh apa tsüepshikü mowan.

³²Ngüne chitekü ngiom, “Yamai apaüh jeko chitekü asiongio sasakü chimnai je mongai injekli tsükia süne?”

³³Nung taokolu ngüne tsaloukü Yirusalem ai khu, küta sahoi chekü tsak nouso naiuso ngüsoko noinso aikü kamkü,

³⁴“APAOU atsüoting ahshikü noin! Apa Simon dongai tsangsheikü sung!” ta chitekü ep.

³⁵Khaiunia nime nou ngüne tü yamai ti thawaokü noiküla, naiuso apaüh themtsai lopek nai ngüneüh APAOU titi ngela nung thaiutha ngüso hau chite.

³⁶Ngüneüh nung ngio chitekü noitaonai, alekta Yisu ngüso ongko tsakü ngiom, “Asam ko aalu lünoi.”

³⁷Ngüsoüh nung mia-on tsak epji ta yangkü lekkü hattat.

³⁸Lüko apaüh ngüso tü ngiom, “Asam tiauta lekkatji? Asam ongko nung ahenyitsün tiauta sungji?

³⁹Jü phanaiuso jü hok nai athaplu, nung atsüoting Ngo, ngü da athantan naiuso athaplu, tititenai asamüh ngo eptsünli, mia on tsak da nyih naiuso ou nou tsünoi.”

⁴⁰Apaüh nung ngioküta apa phasihok ngüso hau han.

⁴¹Ngüsoüh loüh amongling nou mong tsülamkü ngawan nai apaüh ngüso tü ngiom, “Asamüh nungko eheau tso taiumo?”

⁴²Ngüsoüh apa hau ngou asashio tsak kiu.

⁴³Apaüh nung lou, küta ngüso khako he.

⁴⁴Apaüh ngüso tü ngiom, “Mosa Ngiokhem nai E-pohoi khapiam ngio nai, naiuso Nianlom Jih nai ti jü thaiutha sat, nung shinapao noin ta jü ngio nung ngo asamko noihanai chiten.”

⁴⁵Nai Yisuüh Asiongio ngelaao thaiutha ngüso mong losiokiu.

⁴⁶Apaüh ngüso tü ngiom, “Khrista omhean-e naiuso samnyi nouko e ainou ahkü shi-e.

⁴⁷Yirusalem ai yakü shingkhan apem tü mong phoklekü apa nianko angei wankiuao chimkü hao noin ta nungti asiongio nai sattaim.

⁴⁸Nung thaiutha mitha kiuao asam noin.

⁴⁹Naiuso athaplu, Jü poüh thaloutsün ngü asam dongai hong-e, lüko koi ainou oukong asam dongai moshikün lektso asamüh noknio nai taiukü anoi.”

⁵⁰Nai Yisuüh ngüso Bethani dongai nialükhun, küta apa pha loksankü, ngüso oukkiu.

⁵¹Apaüh ngüso oukkiu nai apa ngüso ainou pung-e, naiuso aün nai niakü sung.

⁵²Ngüsoüh apa amkham, küta amongling asong nai Yirusalem ai laokü shin,

⁵³naiuso Goa nian lomkü ngüso Amkham tsam ainou tsükhukü taiukü noi.