Read Khiamniungan Naga Luk 3 Bible Online

Luk 3 - Khiamniungan Naga bible

Luk 3

¹Nung Tiberia nokpao thekü pon chekü pungo nouko Pontia Pailat Yihuda nai nokshingpaou, Galil nai Herodüh shingtsün tao, naiuso apa nio Philipüh Iturea naiuso Trakhoniti nai shingtsün taoko; Abelen nai Lusaniaüh shingtsün naiuso Anna naiuso Caiaphas akhengteng meson thetsün tao noiküla. Nung singtso goh nai noitsün taoko Zekaria thso Yohan dongai Goa ngio shin.

³Nungtiphe Yohanüh Yordan haiusai goumchi thapekkü khukü, “Asam angei ainou lüphokle naiuso khiamai lülim, nai Goa nou asam angei wankiu-e ta chimkü tsakei.”

⁴E-po Isaia thsam nai satkü noitsünli; “Liutsa nai tsaküh veji: ‘Asamüh APAOU yam lükhemlou; apa saihe lukü lühe!

⁵Tsongkhan chikü lomiane, king naiuso choi chikü lo ai-e. Yam akiyang chikü lukü iula-e, yam khepkhengkhengkü nou tülinglingkü shan-e.

⁶Khaiunia le chikü nou Goa Aasan eppe!’”

⁷Nungtiphe Yohanüh apa hao limkiu-iao thaiutha khutsünhoi tü ngiom, “Pao thsoso!” “Ashiao noitsün Goa amongmat ainou thakhuao asam tü sauüh ngiom?

⁸Asam angei ainou mong phokle-iu ta ngengeao nung chhi nouso lüchhi. Naiuso asam ongko Abraham asam paosipo ta ngio ao layachushi. Ngü asam tü ngio-e, Goa nou nung lung nouso louküta Abraham thaiutha thsaosithso shanao shio!

⁹Lo lüko paidong nai ou nou asha-anao khemkü taim. Nungtiphe sübao pai nai eiu amei tsü-eiu-e nung heloküta in nai thiowan-e.”

¹⁰Hoi nou apa tü sang, “Naito samüh ti in chhiao noin?”

¹¹Apaüh ngüso tü thalan, “Sauüh nepat nime taim apaüh tsütaiukün hao tsak lükiu, naiuso sauüh eheshiu taim apaüh nungtilu lüchhi.”

¹²Liukim shitsünso ajantso khiamlimiao thaiutha apa dongai shin, naiuso ngüsoüh apa tü sang, “Atsandetsün, samüh ti chhiao noin?”

¹³Apaüh ngüso tü ngiom, “Liukim shitsün tangka nou asamüh ngiokhem chiai lashi.”

¹⁴Süpaihoi nou lüko apa tü sang, “küta samüh lüko ti chhiao noin?” Apaüh ngüso tü ngiom, “Tangka epao thaiutha sau laangja-i, loüh atsüotsüdekü nou sau lasapthio-i. Meshen amai nou ta mongtsamkü lünoi.”

¹⁵Naiuso khaiunia chikü nou meshen mongai Yohan thaiutha apa Khrista süne tsüde ta yangao yachu.

¹⁶Yohanüh thalakü ngüso chikü tü ngiom, “Ngü atsüoting asam khiamai limkiuji, lüko ngo tü songkü tsak, sau hokkhut auo sokaotso ngo tsümai, apa shiji. Apüh asam Asio Onthso naiuso in nai limkiu-e.

¹⁷Meshen shamtang meikü losioao naiuso meshen khülam bei-ai kamshiao thaiutha apa pha nai en nou semkü noin, lüko apaüh athsüo nou inheeng nai jah ane.”

¹⁸Amao ngio piakü nou apaüh khaiuniahoi lutsüokü ngem amei chim.

¹⁹Lüko nokshingpaou Herodüh apa nio tsammongnyiu Herodia jonloutsün naiuso amao tsümeikün chhi piakü chhitsün thaiutha Yohanüh alotha kiu.

²⁰Nungphiai Herodüh Yohan akhou tsamai thiokü tekkü tsaoshikü chhin.

²¹Khaiunia chikü limkiukütün phiai, Yisu lüko limkiu. Apaüh misaonai,

²²aün sop, nai chongmükhamli Asio Onthso apa da saokü hü. Naiuso aün ainou sang tsaküh ngiom, “Ni ngo tsüojintsün Thso. Ni da ngo monglingji.”

²³Yisuüh tilai apa achimtsün chhi nou yalo, apa chetküta pon aosam thatso noiküla; ayangtsünli apa Yosep thso noiküla; Heli thso Yosep, Matat thso Heli,

²⁴Levi thso Matat, Melkhi thso Levi, Janai thso Melkhi, Yosep thso Janai, Matatia thso Yosep,

²⁵Amos thso Matatia, Nahum thso Amos, Esli thso Nahum, Nagai thso Isli, Maat thso Nagai,

²⁶Matatia thso Maat, Semein thso Matatia, Josek thso Semein, Joda thso Josek, Joanna thso Joda,

²⁷Resa thso Joanna, Zerobabel thso Resa, Shealtiel thso Zerobabel, Neri thso Shealtiel, Melkhi thso Neri,

²⁸Adi thso Melkhi, Kosam thso Adi, Elmadam thso Kosam, Er thso Elmadam, Yihusua thso Er,

²⁹Eliezer thso Yihusua, Jorim thso Eliezer, Matat thso Jorim, Levi thso Matat, Simeon thso Levi,

³⁰Yihuda thso Simeon, Yosep thso Yihuda, Jonam thso Yosep, Eliakim thso Jonam, Melea thso Eliakim,

³¹Mena thso Melea, Matata thso Mena, Natan thso Matata, David thso Natan, Jese thso David.

³²Obed thso Jese, Boaz thso Obed, Salmon thso Boaz, Nashon thso Salmon, Aminadab thso Nashon,

³³Arni thso Aminadab, Hezron thso Arni, Perez thso Hezron, Yihuda thso Perez, Yakoba thso Yihuda,

³⁴Isak thso Yakob, Abraham thso Isak, Tera thso Abraham, Nahor thso Tera, Seruk thso Nahor,

³⁵Reu thso Seruk, Pelek thso Reu, Eber thso Pelek, Shela thso Eber, Kenan thso Shela,

³⁶Arpakshad thso Kenan, Shem thso Arpakshad, Noa thso Shem, Lamek thso Noa, Methusela thso Lamek,

³⁷Enok thso Methusela, Jared thso Enok, Mahalalel thso Jared, Kenan thso Mahalalel, Enosh thso Kenan,

³⁸Set thso Enosh, Adam thso Set, Goa thso Adam.