Read Khiamniungan Naga Luk 4 Bible Online

Luk 4 - Khiamniungan Naga bible

Luk 4

¹Yisu Asio Onthso nou miankü Yordan ainou phokle, naiuso Onthso nou apa liutsa nai aopülenyi, aopüleso ta niakeikü biya nou lilu.

²Nungso ajekhaiu ko apaüh ti tsühe, naiuso tilai nungso ajekhaiu pungjikan, apa naiukü iula.

³Biya nou apa tü ngiom, “Ni Goa Thso naito, lung nungüh themtsai iulaao lüngio,”

⁴Yisuüh apa tü thala, Nung asiongio nai satkü taim, “Khaiunia nou themtsai noulu aa tsükih-e.”

⁵Nai Yisu king nai niakü sungkü biya nou goumchi nokshing apem niohap nouko apa hau han.

⁶Biya nou Yisu tü ngiom, “Ngü ni hao nung nokshing ajinka naiuso nung alengmei apem kiu-e, tititenai nungso apem ngü hao kiuwaniu, naiuso ngü sau hao kiuao aiuji nung ngü kiuji.

⁷Nungtiphe ni jü khako kaukü am naito, nungso apem ni ün noi-e.”

⁸Yisuüh thalakü ngiom, “Asiongio nou ngioji, ‘Ni APAOU Goa tü lü am, naiuso ni apalu lüyathsüo!’”

⁹Nai apaüh Yisu Yirusalemai niakü khuküta apa amkham tsamson nai noi-i, küta apa tü ngiom, “Ni Goa Thso naito, achija nung ainou lühami.

¹⁰Tititenai nung asiongio nai satkü taim, ‘Goa nou meshen aünhonghoi tü ni hachuao thaiutha ngio-e.’

¹¹Loüh nungti ngioji, ‘Ahok nai lung nou tsüthekkao thaiutha, ni ngüso phamongai laiulo-e.’”

¹²Lüko Yisuüh thalan, “Asiongio nai ngioji, ‘Ni APAOU a Goa lalilu.’”

¹³Tilai Biya nou Yisu yam pungkünai lilutsün thapungjikan, apaüh Yisu ainou atao letletkü thaiutha punge.

¹⁴Tilai Yisu Galil ai laokü shin, Asio Onthso oukong apa ko noiküla. Apa thaiutha ngiongem nung shingtap apemai pengkü khun.

¹⁵Apaüh Yihuda kamthang nai tsande nai khaiunia pungkü nou apa lomsankiu.

¹⁶Yisu, apa songjikantsün Nazaret nokai shinai Yihuda Anounyi apa saili Yihuda kamthang nai khu. Apa Asiongio veao tsakü,

¹⁷E-po Isaia thsam apa hao kiu. Nai apaüh thsamlai nou sopankü nung sattaiukü ep,

¹⁸“APAOU Onthso ngo da noin, tititenai tsosiluhai tü ngem amei chimao apaüh ngo tsomkiukü chosan. Khokü taiutsünso tü asokthamtsün ngio kiuao, niopek nouso niovei lusat kiuao; kiapjeikü noitsünso khaiuniatsüo iulakü hongao.

¹⁹Tilai APAOU nou apa khaiuniaso kipsane, nung ngiopengao atao nou shi-iu.”

²⁰Yisuüh thsam nou laishiküta nungko yathsüotsünso hao kiuwankü moknoi. Yihuda kamthang nai noitsün chikü nou apa tü langlutkü thap,

²¹“Nung asiongio asamüh vekü lulatsün lonyi shithawaokü noin, ta apaüh ngüso tü ngiom.

²²Apaüh chitetsün ngio luküta hoi nou ngakü ngiom, “Apa nung Yosep thso tsüdeso?”

²³Apaüh ngüso tü ngiom, “Atsüoting asamüh nung ngiopung ngiothi ngio nou ngü tü ngio-e, ‘Moshe ngepo, achija lülomeilu.’ Tilüsong ni Capernaum ai chhin ta samüh lula, nungti meshen goumchi ko lüko lüchhi.

²⁴Yisuüh ngiom, ngo asam tü ngio-e, “E-po tsak meshen nokkomko tilaitso monglingkü loutsün tsünoi.”

²⁵“Lüko atsüoting ngo asam tü ngio-e, Elija taoko Israel nai tilai pon süme alei louk ah tsü-oukü noiküla, nai goumchi apemai naiusile asong shin, nungko jihi piakü iula.

²⁶Elija ngüso ongko sau dongai lüko tsühong, lüko Sidon goh ai Zarephat jihi tsak dongailu hong.

²⁷Naiuso E-po Elisha taoko Israel nai je sungtsün khaiunia piakü noiküla, lüko Syria hai Naman tü simkü ngüso sau tsülosio.”

²⁸Ngüsoüh nung ngio lunai Yihuda kamthang nai noinso chikü amongmat nou mian.

²⁹Ngüsoüh apa nok ainou koman, naiuso ngüso nok kingthon nai apa kha phokleshikü thoi-i-ao nialükhun.

³⁰Lüko apa ngüso jetko laikü khuwan.

³¹Nungai apa Galil ai noitsün Capernaum ai saokü Yihuda Anounyi ngüso tü Yihuda kamthang nai tsande.

³²Apaüh tsandetsünko ngüso ngawan, tititenai apa ngio oukong nai noiküla.

³³Angei onthso nou thaloutsün khaiunia tsak Yihuda kamthang nai noiküla.

³⁴Apaüh sang asong nou, “Whai! Nazaret hai Yisu sam niko chhiao ti noin? ta vekü ngiom. Ni sam mowan-iao shin süne? Ni sau noin ngü ngeji. Ni Goa ün Asio hongthon.”

³⁵Yisuüh apa tü, “Lasingio, naiuso apa ainou ashikhuwan!” ta thut. Nai angei onthso nou nung khaiunia, hoi khako thoiloian küta apa da tsümeikü ti tsüchhikü apa ainou shikhuwan.

³⁶Nungko khaiunia chikü ngawan, küta ngüso chitekü ngiom, “Nungso ti ngio? Tititenai oukong nai apaüh angei onthso nouso hao ngiokhem kiuji, naiuso ngüso shikhuwanji!”

³⁷Naiuso Yisu thaiutha nung ngiongem shingtap apemai ngempengkü khu.

³⁸Yisuüh Yihuda kamthang wankü Simon tsamai khu, nungko Simon tsammongnyiu nou nyiu kiyashi kia nou thsüokü jenkü noin thaiutha chite.

³⁹Yisuüh apa then dongai shikü kiyashi kia tü thut. Nungai akia nou apa lean, naiuso chukü apaüh ngüso hao khemkhu wao.

⁴⁰Tilai asham shin, akia in amomo nou kiatsünso apem apa dongai nialoukü shin. Nungko khaiunia pungkü da apaüh pha nou thankü lomeikiu.

⁴¹Angei onthso nouso piakü khaiunia piakü ainou sungkü wekü ngiom, “Ni Goa Thso!” apaüh ngüso hao tsüchite-iao ngio tiautenai ngüsoüh apa Khrista ta ngen.

⁴²Ahom apa aodangkün athang tsak ai khu. Nungko hoi nou apa tü yam, naiuso apa dongai shikü ngüso ainou tsükhu-iao lulao.

⁴³Lüko apaüh ngüso tü ngiom, “Nok amao ai lüko Goa nokshing ngem amei nou chimao noin, tititenai nung thaiutha ngo hong.”

⁴⁴Nungti Galil goumchi apemai naiuso Yihuda kamthang nouso ai apaüh chimkü noiküla.