Read Khiamniungan Naga Luk 5 Bible Online

Luk 5 - Khiamniungan Naga bible

Luk 5

¹Nyitso Yisu Genesaret she shimkü noitsün taoko khaiuniahoi Goa ngio angau kamjikan.

²Apaüh khiamnok shimkü kheng nime ep; nungko ngouphek hoi sungküta ngüso nyao tsaowankü noiküla.

³Kheng tsak sübao Simon ün noiküla, Yisu nungko napkü, Peter tü kheng haiukou ainou intso nialükhunao sang. Naiuso Yisu kheng nai moknoikü hoi nouso tü tsande.

⁴Tilai Yisuüh chitekhem, apaüh Simon tü ngiom, “Khiam aokü nai kheng anialükhun, naiuso asam nyao nouso ngou thalouao khiamkheiai aokü lüsokthio.”

⁵Simonüh thalakü ngiom, “Atsandetsün,” “samüh ahsoh chikü soklüko tsaktso tsütha: lüko ni ngiotsünli ngü nyao nou soke.”

⁶Tilai ngüsoüh angiotsünli chhin ngüso nyao chipekkauli ngou nou piakü thalou.

⁷Ngüsoüh ahachuao kheng amao nouso tü jon. Ngüso kheng nime nung ngou nou mian, nungtiphe kheng nouso khiam kheiai napao yachu.

⁸Nungai Simon Peterüh nung epkü Yisu khako kaukü ngiom, “Jü dong ainou asoian, Oh APAOU, tititenai ngo angei khaiunia noin!”

⁹Tititenai ngou piakü thalou phe apa naiuso apa haiso ngawan.

¹⁰Zebedi thso Yakob naiuso Yohan sauhai Simon ko hachu-ekü noila ngüso lüko ngawan. Nai Yisuüh Simon tü ngiom, “Lahat, loyakü ni khaiunia thalou-e.”

¹¹Ngüso kheng haiukuk shisaokü kankü shinai, ngüsoüh apem wankü Yisu phiai hoilut.

¹²Apa nok tsakko noinai, pem nai je nou sungkü nungko khaiunia tsak noiküla. Apaüh Yisu epkü, kaukü napkü apa tü kojakü ngiom, “APAOU, ni mongchio nai ngo lomeikiuao shio-e!”

¹³Yisuüh apa tü thankü ngiom, “Ni lomeikiuao Ngo mongchioji.” Nungailu je nou apa ainou khuwan.

¹⁴Yisuüh apa tü ngiom, “Sau hau lachite, lüko saitha meson dongai lükhu küta apa hau lüthaisan-i; naiuso ni lomei-iu ta mitha au Mosaüh thoiluttaiutsün chaithio nouso lükiu.”

¹⁵Lüko apa thaiutha ngiongem nou nok miankü khukü, hoi piakü apa ngio angao naiuso akia lomeiao aikü kamshin.

¹⁶Lüko apaüh aodangkü nai khukü misao sao.

¹⁷Nyitso Yisuüh chimkü noinai, Galil naiuso Yihuda nok pungkü ainou naiuso Yirusalem ainou Farisihoi naiuso ngiokhem tsandetsünso apa shimkü shikü moknoi. Naiuso APAOU alomeitsün oukong nou apa da noiküla.

¹⁸Khaiuniahoi nou akela kiatsün khaiunia tsak thenshim nai cheplokü kankü shin, naiuso ngüsoüh apa kankü napküta Yisu dongko taiuao kowe.

¹⁹Hoi pia nou shioko ngüso napao tsüshio, nungtiphe ngüsoüh tsamkhaiu nai sungkü tsam nou losatkü apa thenshim hakü Yisu dongai lethio.

²⁰Yisuüh ngüso amonglam ngekü ngiom, “Haimei, ni nou angei wankiu-iu.”

²¹Küta ngiokhem tsandetsünso naiuso Farisihoi nou nungti yangkü ngiom, “Goa lotsaokü chitetsün khaiunia nung sau? Goa tü simkü sauüh angei wankiuao shiom?”

²²Lüko Yisuüh ngüso mongyang ngekü thalakü ngiom, “Asamüh tiau asam mongai yangluji?

²³‘Ni ün angei wankiu-iu,’ ta ngioao shio süne, tsüdekünai ‘achu küta lütsakei’ ta ngioao shiotso?

²⁴Lüko asamüh nung nge-e, goumchi ko Khaiunia Thso da angei wankiuao oukong noin.” (apaüh akela kiatsün tü ngiom) “Ngo ni tü ngioji, ‘Achu, naiuso athen kankü ashi, küta atsamai lükhu!’”

²⁵Nungailu apa ngüso khako chuküta apa saitsün thenshim kankü Goa nian lomkü tsamai khuwan.

²⁶Ngüso apem ngawan! naiuso Goa nian lomsan. Naiuso ngüsoüh thatü hatkü ngiom, “Lonyi samüh athanga epiu!”

²⁷Nungphiai apa kamai khunai Levi ta niankü liukim shitsün khaiunia tsak moknoikü epkü, apa tü ngiom, “Jü phiai ohoilut.”

²⁸Naiuso apa apem wanküta tsaloukü apa phiai hoilut.

²⁹Yisu thaiutha Leviüh apa tsamai sümai asong shan, naiuso liukim shitsün naiuso amao piakü ngüso heshiutsün nai moknoiküla.

³⁰Farisihoi naiuso ngiokhem tsandetsünsoüh apa sahoi thako namnamkü ngiom, “Asamüh tiau liukim shitsün naiuso angei hoiko heshiuji?”

³¹Yisuüh thalakü ngüso tü ngiom, “Ameili nouso thaiutha moushe nge-po poukü tsünoi, lüko akia nouso thaiutha poukü noin.

³²Asiohoi tsüde lüko angeihoi nouso mong phokle-iao ngo shin.”

³³Ngüsoüh Yisu tü ngiom, “Yohan sahoi naiuso Farisihoi nousoüh piaküjam keithonkü misao saoji; lüko asahoi nou heshiuji.”

³⁴Yisuüh ngüso tü thalan, “Tsamsigoh shanpaou ngüsoko noinai apa hai nouso keithonkü noi-i-ao asamüh shio süne?

³⁵Lüko ajekhaiu saojikane, tilai tsamsigoh shantsün ngüso ainou nialükhunane, nungai ngüsoüh keithone.”

³⁶Loüh apaüh ngüso tü athatlu ngio tsak chite: “Sauüh ne ayan ainou chisanküta ne akeng nai tsüchiolutji. Nungti naito ne ayan nou lotheane naiuso ayan nai chisan nou akeng ko tsüjei-ai-e.

³⁷Theng ayan nyikhun nekong akeng nai sauüh tsülothioji.Nungti naito theng ayan nou nyikhun nekong paiyan-i-e, naiuso theng nou hongpengan-e, naiuso nyikhun nekong nou lotheane.

³⁸Lüko theng ayan nyikhun nekong ayan nai thioao noin!

³⁹Sauüh theng akeng shiuküta ayan nou tsüshiuji; tititenai ‘Akeng nou meithso!’ ta apaüh ngio-e.”