Read Khiamniungan Naga Luk 6 Bible Online

Luk 6 - Khiamniungan Naga bible

Luk 6

¹Yihuda Anounyi Yisu eiu tsak thsatkü khukü noiküla. Nungai apa sahoi nou tsonyakpong thaklu, küta ngüso pha nai noisankü he.

²Farisihoi ajantsoüh ngiom, “Yihuda Anounyi ti chhiao tsünoi nungti tiau asamüh chhiji?”

³Yisuüh thalakü ngüso tü ngiom, “David naiuso apako hanso naiunai apaüh ti chhin?

⁴Tititenai apa Goa tsamai nap, naiuso Goa amthang nai taiutsün themtsai sübao ngiokhem nou mesonhoi chiai amao haiüh heao tsünoi nung loukü he, naiuso apako hanso hao kiu, nung asamüh tsüvelu süne?”

⁵Apaüh ngüso tü ngiom, “Khaiunia Thso Yihuda Anounyi APAOU.”

⁶Amao Yihuda Anounyi Yisuüh Yihuda kamthang nai napkü tsande, naiuso nungai pha uai jebkü khaiunia tsak noiküla.

⁷Ngiokhem tsandetsünso si Farisihoi nou Yisuüh Yihuda Anounyi lomei kiu-e süne tsülomei kiu-e ta aphio thalouao apa tü jiokü noi.

⁸Lüko apaüh ngüso mongyang ngeankü, phajeb khaiunia tü ngiom, “Atsa, küta awem nai ashi.” Nai apa tsakü shin.

⁹Yisuüh ngüso tü ngiom, “Ngo asam tü sange! Yihuda Anounyi amei chhi-e süne tsümeikü chhi-e; aa nou kipsane süne, mowan-i-e?”

¹⁰Yisuüh ngüso chikü tü thapkü phajeb khaiunia tü ngiom, “Apha alolu.” Naiuso apaüh lolunai apa pha meila.

¹¹Lüko ngüso thatü mongmatkü, Yisu tü ti chhi-e ta ngemlou.

¹²Nung ajekhaiuko apa misaoao kingnai sung, naiuso asoh chikü Goa tü mi sao.

¹³Tilai ah nou ngesan apaüh sahoi nouso jon naiuso ngüso ongko chekü nime chosankü ngüso tü honghoi ta jon.

¹⁴Simon (sau tü apaüh Peter ta jon) naiuso anio nou Andria, Yakob, Yohan, Philip, Bartholomai,

¹⁵Mathi, Thoma, naiuso Alfia thso Yakob, naiuso Simon, (sau tü Zebedi ta jon).

¹⁶Yakob thso Yihuda, naiuso apa janhetsün Yihuda Iskariot.

¹⁷Tilai apaüh ngüso ko saokü tsami tsakko tsa, nai apa sahoi nouso hoi asong, Yihuda goumchi naiuso Yirusalem apem ainou, Tair naiuso Sidon

¹⁸khiam kou ainou apa ngio angao, ngüso akela lomeiao apa dongai shin. Ngüso angei onthso nou angja-itsün lomeikiu.

¹⁹Hoi apem nou apa da thanao yam, tititenai apa ainou oukong shikü ngüso chikü lomeikiu.

²⁰Yisuüh apa sahoiso tü thapkü ngiom, “Asam tsosilu hoi thaiumei, tititenai Goa nokshing asam ün nou!

²¹Asam lo naiukü noinso thaiumei, tititenai asam tsamlu-e! Asam lo shaptsünso thaiumei, tititenai asam nyai-e!

²²“Tilai Khaiunia Thso thaiutha khaiuniahoi nou asam lon chinyane, naiuso tilai ngüsoüh ngüso ainou asam komane, naiuso asam lutsaokü thute, naiuso asam nian tsümeikü wane, asam thaiumei!

²³Nung ajekhaiu nai lümongtsam, naiuso amongling nou lühamkei, tititenai aün nai asam thaiutha amai asong noin, tititenai ngüso paosiposoüh E-po nouso tü nungtilu kankei.

²⁴“Lüko lo memei nouso thaiutha inyate, tititenai asam tsüomeiao nou atao yananiu!

²⁵“Lo saiukü taimso thaiutha inyate, tititenai asam naiu-e! “Asam lo nyaitsünso thaiutha inyate, tititenai asam meashap shappe!

²⁶“Tilai asam thaiutha khaiunia apem nou amei chite-e inyate! tititenai nungti ngüso paosiposoüh atsüotsüdekün E-po nouso tü kankei.

²⁷“Lüko ngü asam jü ngio angtsünso tü ngio-e, asam ehso tü lütsüojin; asam chinyantsünso tü amei lüchhi.

²⁸Asam hao athesan kiutsünso tü ouk lükiu, asam tü tsümeikü kankeitsünso thaiutha misao lüsao kiu.

²⁹Asam onthong nai lahtsünso tü tsakai nou lüthoshi, naiuso ane lowantsünso tü ne nou lolaokü lataiu.

³⁰Sauüh ni tü kojaji apa hao lükiu, naiuso sauüh ajengtsaiu kanlükhune laokü lasaoshi.

³¹Khaiuniahoi nou asam hao tilüsong chhi-iao aiuji, nungti asamüh ngüso tü lüchhi.

³²Asam tsüojintsünsolu asamüh tsüojin naito, asamüh ti nianlom eppe? Tititenai angeihoi nou lüko ngüso tü tsüojintsünso tülu tsüojinshiji!

³³Sauhaiüh asam tü amei chhiji, asamüh ngüso tülu amei chhi nai asamüh ti nianlom eppe? Tititenai angeihoi nou lüko nungti chhiji!

³⁴Naiuso sauhai ainou asamüh müjam epshiao yangji, ngüso hao laiukiunai, asamüh ti nianlom eppe? Müjam nung wekülu epao thaiutha angeihoi nou lüko angeihoi hao laiukiuji.

³⁵Lüko asam eh nouso lütsüojin, naiuso ngüso tü amei lüchhi, naiuso tilaitso tsümonghenkü lülaiukiu, naiuso asam alesan asong noi-e, naiuso asam thatü Asongting thsoso iula-e, tititenai nianlom tsükiukünso naiuso tsümeikün khaiunia dongai apa atsüojin noin.

³⁶Tititenai Po nou atsüojinyang titi noin, nungti asam lüko atsüojinyang lünoi.

³⁷“Asamüh amaohai mi layam naito asam mi lüko tsüyame: naiuso asamüh tsütsüokü mitha lakiu, naito asam hao aphio tsükiu-e; Amaohai hao aphio nou awankiu, naito asam aphio lüko wankiu-e.

³⁸Lükiu naiuso asam hao kiu-e; ngüsoüh asamhao athat nouko tekkü thangthiokü, saiushikü, ngeshikü thatkü kiu-e. Tititenai ti athat nou asamüh thatkiu-e, nung asam hao lüko thatkiu-e.”

³⁹Naiuso apaüh athatlu ngio tsak ngüso tü chite: “Niopek haiüh niopek nia-ao shio-e süne? Ngüne nemthso khannai tsüsali-e süne?

⁴⁰Atsandetsün ko sahoi asong tsüde, lüko tilai sahoi pungkü nou saiukü iula-e, meshen tü tsandetsünli noi-e.

⁴¹“Tiauta ni meshen niovei nai noitsün thsünyup thaiutha tsüyangkü, ahai niovei ainou thsünyup tü thapji?

⁴²Tsüdekünai tilai ni achija meshen niovei nai noitsün thsünyup tsüepkü taiukü, jü hai ngü aniovei nai thsünyup nou lowankiu-e ta ni ahai tü titi ngioao shio-e? Akaosai nouso! ni meshen niovei nai aya thsünyup nou lülowan, naiuso nungai ahai niovei nai noitsün thsünyup nou wanao ni tsangsheikü eppe.

⁴³“Pai amei da eiu tsümeikü tsü-eiuji, tsüdekünai pai tsümeikün da eiu amei tsü-eiuji.

⁴⁴Tititenai pai pungkü eiu nou ngeji. Sang ainou khaiunia nou latshep tsüpanji, tsüdekünai chongkaiu pai ainou sainaoshep tsüpanji.

⁴⁵Khaiunia amei nou meshen mongyang amei singtaiukü noitsün ainou amei lousanji; naiuso khaiunia tsümeikü nou meshen mongyang tsümeikü singtaiukü noitsün ainou tsümeikü nou lousanji; tititenai ti in nou mongpem miankü noin nung son nai shikhuji.

⁴⁶“Tiauta asamüh ngo tü ‘APAOU,’ ‘APAOU,’ ta jonji, naiuso ngü ngiotsünso tsükankei?

⁴⁷Sauhai jü dongai shiji, naiuso jü ngioso lulakü kankeiji, apa ti khekkü noin nung ngo asam tü chite-e.

⁴⁸Apato lung nou chiai khan aokü thaiukü tsamlahtsün khaiuniali, naiuso tilai shelei shikü, nung tsam nou da thoikei, lüko tsülemlem, tititenai nung thatü mongkü lahkü noiküla.

⁴⁹Sauüh jü ngio luji lüko tsükankeiji, apaüh tsamthang tsüpaotsang taiukü tsamlahtsün khaiuniali, naiuso nung tsam nou ta shelei nou thoikei nai jamaolu loian, naiuso nung tsam lotheantsün thatü thsüokü noiküla!”