Read Khiamniungan Naga Luk 7 Bible Online

Luk 7 - Khiamniungan Naga bible

Luk 7

¹Tilai Yisuüh khaiuniahoi hao ngio apem chitekhem, apa Capernaumai nap.

²Nungai thatü tsüojinkü noitsün Romhai asong tsamki tsak eaoli kiakü noiküla.

³Tilai apaüh Yisu thaiutha lula, Yihuda petchehoi apa dongai hongkü apa tsamki kipsanao ashi ta koja.

⁴Ngüso Yisu dongai shikü kojakü ngiom, “Apa thaiutha nung chhi nou ni chhiao tin,

⁵tititenai apaüh sam khaiunia tsüojinji, naiuso apaühlu sam Yihuda kamthang shan.”

⁶Yisu ngüso ko apa tsam ainou laiukü mokhukünai, tsom khako APAOU nou hai nouso hongkü ngiom, “APAOU, achija la-angja, tititenai ni jü tsamso khemai napao ngo tsütin;

⁷tsüdekünai loüh adongai shiao ngo jü chija tsütin ta yangji. Lüko ngio tsaklu lüngio, nungai jü tsamki meila-e.

⁸Tititenai jü khemai ngü lüko süpaihoi taiuji naiuso ngo lüko ngiokhem khemai noitsün khaiunia tsak noin; naiuso ngü tsak tü, ‘Lükhu!’ ta ngionai apa khuji; naiuso amaohai tsak tü, ‘Ashi!’ ta ngionai apa shiji; naiuso tsamki nou tü, ‘nung lüchhi!’ ta ngionai apaüh nung chhiji.”

⁹Yisuüh nung ngio lulanai ngawan, naiuso lapkü shikü apa phiai hoiluttsünso tü ngiom, Ngo asam tü ngio-e, “Nungli amonglam asong noitsün Israel ongko ngo tiai tsüepka!”

¹⁰Nai ahongtsünso tsamai shikü, ngüsoüh tsamki nou meilakü ep.

¹¹Nung ainou thunkü Yisu Nain noksong ai apa sahoi naiuso hoi asong tsak hakü nap.

¹²Tilai apa nok bekhan shimkü shin, nungko jihi thso oum tsaklu nou e mia kankü shin.

¹³Tilai APAOU nou jihi nou ep, apaüh tsüojinkü yangkü apa tü ngiom, “Lashapsai.”

¹⁴Nai apaüh shimkü shiküta miatsan da thantan, naiuso miapi-antsünso tsülemlemkü tsa. Naiuso apaüh ngiom, “Oum! ngo ni tü ngioji, Achu!”

¹⁵Nai e nou chukü moknoi küta ngio singiojikan. Naiuso Yisuüh nung oum nou apa nyiu hao laokü kiu.

¹⁶Ngüso chikü ahat nou mian naiuso Goa nian lomsankü ngiom, “Sam ongko Goa E-po asong sungkü noin!” naiuso “Goa nou meshenhoi tü sailu-iu!”

¹⁷Yisu thaiutha nung ngiongem nou Yihuda goumchi naiuso lemkü noitsün shingkhannio apemai pengkü khu.

¹⁸Tilai Yohan sahoiüh apa tü nung thaiutha apem ngiom.

¹⁹Yohanüh apa dongai sahoi nime jonshikü, “Ashiao noitsün tsak ta Yohanüh ngiotsün ni süne, amao tsak ta taiushi-e?” ta sangau ngüne APAOU dongai hong.

²⁰Tilai sahoi nime nou Yisu dongai shikü ngiom, “Alimkiutsün Yohan nou, Ashiao noitsün tsak nou ni süne, tsüdekünai samüh amao tsak ta taiu-e?” ta ni tü sangau sam hong.

²¹Nung taoko apaüh akia naiuso angei onthso nou angja-itsün piakü lomeikiu, naiuso niopek piakü hao epi.

²²Apaüh ngüso tü thalakü ngiom, “Lükhu naiuso asamüh ti ep naiuso lula nung Yohan tü lüngio: Niopek hoi nou epji, hokngek hoi tsakeiji, je suntsünso lomeikiuji, naiuso noukek nou luji, e nouso ahkü shi-iji, tsosiluhoi nouso tü ngem amei chimji.

²³Sauüh ngo tü athekatao ti tsüeppe, apa thaiumei!”

²⁴Tilai Yohan hongthonhoi nouso tsalokü khu, apaüh hoi nou tü Yohan thaiutha chiteao yachu, “Asam singtso goh nai Yohan dongai khunai ti epau yangküla?” Asheih nou ketkeitsün paithsam sotsom süne?

²⁵Lüko asam ti ta thapao khun? Ne amei tholutsün khaiunia tsak ta thapao süne? Alengmei nese tholutsün naiuso tsüomeikü kihtsünso to nokpao tsamai noin!

²⁶Lüko asamüh ti ta thapao khun? Goa E-po tsak süne? Ah, ngü asam tü ngio-e, Goa E-po tü simkü.

²⁷Satkü taiutsün nung apa thaiutha noin, ‘jü hongthon ayam khemluao, ngo Apa akhako hongji.’

²⁸Ngü asam tü ngioji, “Nyiuhaiüh chettsün ongko Yohan tü songkü tsünoi. Nungti lüko sau Goa nokshing nai ehenting noin apa, apa tü songthso.”

²⁹Nungai apemüh apa ngio ang: Ngüso naiuso tekkü liukim shitsünsoüh Goa athoilut ngio nouso angio ang naiuso Yohanüh limkiukü noiküla.

³⁰Lüko Farisihoi naiuso ngiokhem tsandetsünsoüh ngüso chija Goa nou chimtsün tsüangkü Yohanüh limkiutsün tsülou.

³¹“Naito ngo nung vetao tiko thalu-e, naiuso ngüso tisübao khekkü?

³²Methso sauhai chaikam nai moknoikü, ngüso haiso jonkamkü ngioji, ‘Samüh asam tü poipoi mat, lüko asamüh tsühang! Samüh miashap shap, lüko asamüh tsüshap; ngüso nung methsohoi khek!

³³Tititenai Alimkiutsün Yohan themtsai hekü tsüdekünai theng shiukü tsüshi, naiuso asamüh ngioji, ‘Apa da angei onthso noin!’

³⁴Khaiunia Thso hekü shiukü shin, naiuso asamüh ngioji, ‘Nung khaiunia tü athaplu! nungto ehethaikhan, naiuso thengshiu, liukim shitsün naiuso angeihoi nouso haimei!’

³⁵Goa mongthat nouto sauhaiüh nung luji, ngüsoüh atsüoting hanji.”

³⁶Farisihai tsaküh Yisu tü apako heshiuao sang. Naiuso Apa nung Farisihai nou tsamai sungkü heshiuao moknoi.

³⁷Nung noknai noitsün nyiuhai tsak angei kihnai noiküla, naiuso tilai apaüh Yisu Farisihai nou tsamai chihetsün nai noin ta ngen, apaüh anganyam khaiutsom meng tsak ko kankü shin.

³⁸Naiuso apa Yisu hok dongko shapkü tsa, naiuso apa niochekhiam nou Yisu hok lupaiao yachu, naiuso apa khaiuou nou Yisu hok beiyankiu, naiuso Yisu hokai chepkü apaüh khaiutsom nou tsomkiu.

³⁹Tilai Yisu thaisam jontsün Farisi nou nung ep, apaüh yang, “Nung Khaiunia E-po tsak naito, apa da thantantsün nung sau, naiuso apa titi in khaiunia, naiuso apa angei nyiuhai tsak ta, apaüh ngekülela!”

⁴⁰Yisuüh thalakü apa tü ngiom, “Simon, ngo ni tü tso tsak ngio-e.” Apaüh thalan, “Atsandetsün, achite.”

⁴¹“Khaiunia tsak tü tangka laiutsün khaiunia nime noiküla.” “Tsaküh tangka tsom pungo naiuso amao nou tangka aopungo laiulo.

⁴²Tilai ngüneüh athamshiao ti tsütaiu, apaüh ngüne nemthso hau chailaiu wankiu. Nungai ngüne ongko sauüh apa tü tekkü tsüojine?”

⁴³Simonüh thalakü ngiom, “Sau tü apaüh apia wankiu nungüh apa tü tekkü tsüojine ta ngü yangji.” Yisuüh apa tü ngiom, “Ni yangtsün nung atsüo.”

⁴⁴Nai apaüh nyiuhai dongai lapkü Simon tü ngiom, “Nung nyiuhai ni epjimo? Ngo atsamai sung lüko, hok tsaowanao ni ngü hao khiam tsükiu. Lüko apaüh apa niochekhiam nou jü hok lupaikü apa khaiuou nou beiyankiu.

⁴⁵Ni ngo da son nai tsüchep, lüko apa to ngo shinai yanou jü hok nai cheptsün tsülao.

⁴⁶Ni jü khaiu nai khaiutsom nou tsütsomkiu, lüko apaüh to jü hok nai khaiutsom nou tsomkiu.

⁴⁷Nungtiphe ngo ni tü ngio-e, apa angei piakü noilüko wankiuji, tititenai apaüh thatü tsüojin, lüko sau tü angei intsolu wankiuji nungüh intsolu tsüojinji.”

⁴⁸Nai apaüh nyiuhai tü ngiom, “Ni ün angei wankiuji.”

⁴⁹Apako chihetsün nai moknoitsünsoüh yangao yachu, “Angei lüko wankiuau nung sau?”

⁵⁰Lüko apaüh nyiuhai nou tü ngiom, “Amonglam tsangkü ni kipsaniu, aalu nai lükhu.”