Read Khiamniungan Naga Luk 8 Bible Online

Luk 8 - Khiamniungan Naga bible

Luk 8

¹Atao intso noiküta Yisu Goa nokshing thaiutha Ngem Amei chimkü noksong naiuso nok nouso ai khukü tsakei.

²Nyiuhai ajantso sauhai ainou angei onthso komankiu naiuso akia nou lomei kiu: (Magdalin ta jontsün Mari) sau ainou angei onthso chinyat koman kiu.

³Herod tsamki asongting Chuza tsammongnyiu nian nou Yoana, naiuso Susana, naiuso amao piakü apako noiha, naiuso ngüsoüh jengtsaiu tsangkü ngüso tü hachu.

⁴Tilai hoi asong tsak aikü kamshin nungai noksong pungkü ainou ngüso apa dongai shinai, apaüh athatlu ngio chete:

⁵“Lelu shiutsün tsak apa lelu shiuao khu; naiuso apaüh shiu nai, lelu ajantso yamkuk nai tha, naiuso nung hok nou ngamkei, naiuso waiohoi nou hean.

⁶Lelu ajantso lungkap nai tha, naiuso goh saiukü tsünoiphe, nung samsan lüko thunkü wonan.

⁷Lelu ajantso sang ongko tha, naiuso sang nou nung thongat.

⁸Lelu ajantso goh amei nai tha, naiuso nung songkü tsom pungkü eiu eiu.” Naiuso ngio nung thonkü Yisuüh ngiom, “Sau noukhan pokü noin apaüh lüang!”

⁹Apa sahoi nou athatlu ngio alat nou ti in ta apa tü sang.

¹⁰Nai apaüh thalan, “Goa nokshing akaongio asam hao kiutaim, lüko amaohai hao to athatlu nai kiuji, tititenai ngüsoüh athap to thappe lüko tsüeppe, naiuso ang to ange lüko tsüngela-e.

¹¹“Lo athatlu ngio alat nung noin: Lelu nou Goa ngio.

¹²Lelu sübao yamkuk nai tha, nung athatluao, ngüso mongpem ai biya nou shikü Goa ngio tsümonglam-iao naiuso tsükipsan-iao kaulükhunji.

¹³Lelu sübao lungkap nai tha, nung ngüsoüh tilai lulaji amongling nou ngio nou louji, naiuso eiu tsünoiphe atao letletkülu noiji, küta alilu taoko salianji.

¹⁴Lelu sübao sang ongko tha, nung ngüsoüh ngio nou lula, naiuso ngüso yamai khunai, mongyang pia nou naiuso jengtsaiu naiuso nung aa amongling nou thongat, naiuso eiu saiukü tsü-eiuji.

¹⁵Lelu sübao goh amei nai tha, nung ngüso mongpem amei naiuso ngiotsüo nai ngüsoüh ngio nou lulakü nung mongkü thalou, naiuso athaplu nung da eiu eiuji.

¹⁶“Khaiunia sauüh tson sonlutküta kim nou tsükapokji, tsüdekünai then khemai tsütaiuji, lüko tsamai shitsünsoüh awon epao thaiutha tson taiutsün nai taiuji.

¹⁷“Tititenai achiai tsüsungkü hao titso tsangkü tsünoi; tsüdekünai tsüngelakü hao naiuso awon nai tsüshikü hao titso tsangkü tsünoi.

¹⁸“Nungtiphe asamüh titi angji mong nou lükiu, tititenai sauhaiüh taim, apa hao kiu-e, naiuso sauhaiüh tsütaiu, apaüh ti taim ta yangji nung lüko apa ainou kanlükhunane.”

¹⁹Yisu nyiu si nioso apa dongai shin, naiuso khaiuniahoi pia nou ngüso shimkü shiao tsüshio.

²⁰Apa tü nung ngiom, “Anyiu si aniosoüh kengchiai tsakü ni ko pheteao yamji.”

²¹Lüko apaüh thalakü ngüso apem tü ngiom, “Sau haiüh Goa ngio lulakü kankeiji, ngüso jü nyiu naiuso jü nioso.”

²²Nyitso Yisu naiuso apa sahoiso kheng tsak ai napnai apaüh ngüso tü ngiom, “Samüh she nou thsatkü etsai khuko,” naiuso ngüso tsaloukü khu.

²³Lüko ngüso kheng nai khunai, apa saila-an, naiuso she nai ah-ou-asheih shin, naiuso ngüso kheng khiam nou mianao iula naiuso angja nai noiküla.

²⁴Ngüso apa dongai shiküta apa jonchukü ngiom, “Atsandetsün, Atsandetsün! sam eanao noin!” Naiuso apa chukü ahsheih naiuso khiampek tü thut. Nai nung laokü tsamkü iula.

²⁵Nai apaüh ngüso tü ngiom, “Asam amonglam nou tiai noin?” Nai ngüso hatat naiuso ngakü chitekü ngiom, “Asheih si khiampek nou lüko angio angao nung sau?”

²⁶Galil goumchi shimkü Gerasa hai goumchiai ngüso shisaom.

²⁷Apa goh ai saonai, angei onthso suntsün khaiunia tsak noksong ainou shikü apa pheten. Naiuso atao laiukü apaüh ne tsütenkü tsamai tsüdekü etam nai noiküla.

²⁸Apaüh tilai Yisu ep; nai vekü apa dongko kaukü ngiom, “Yisu, ni Goa Thso! ni ngo ainou ti aiuji? Ngü hao angja lakiu, ta ngo ni tü kojaji!”

²⁹Apaüh nung ngiotsün tiautenai Yisuüh angei onthso apa ainou sungkhuao ngiokhem kiu. Piaküjam angei onthso nou apa thalounai apa akhou tsamai phasihok sonao nou kekü wan lüko apaüh sonao chanthatkü angei onthso nou singtso goh nai niakeiküla.

³⁰Yisuüh apa tü, “Anian sau?” ta sang. Apaüh, “Jü nian ‘keihoi.” Ta thashin, tititenai apa da angei onthso piakü napkü noiküla.

³¹Ngüso athantsüyangkün khan nai lahong ta ngüsoüh apa tü koja.

³²Nungai yahhoi asong tsak king nai achih yamhekü noiküla, naiuso ngüso nungai anapi ta apa tü koja.

³³Nai angei onthso nouso khaiunia ainou sungkü yahhoi da nap, nungai yah keihoi thum she-ekü saokü she nai thsangatan.

³⁴Tilai ajimhoi nou athawaotsün ep, ngüso khukü noksong nai si noknai nung chite.

³⁵Ti thawao nung luao ngüso khuküta ngüso Yisu dongai shin, nai sau ainou angei onthso nouso shikhuwan, nung khaiunia nou ne tenkü khaiuniatsüo iulakü Yisu dongko moknoikü epkü ngüso hatat.

³⁶Nung eptsünso angei onthso nousoüh thaloutsün khaiunia titi kipsan, nung ngüso hau chiten.

³⁷Gerasinhai lemkü khaiunia apemüh ngüso ainou pungeao apa tü koja, tititenai ngüso thatü hat. Naiuso apa kheng tsak ai napkü laokü khu.

³⁸Lüko angei onthso nouso shikhuwantsün khaiunia nou Yisu ko noiao apa tü koja. Lüko Yisuüh apa hongkü ngiom,

³⁹“Atsamai laokü lükhu, naiuso athaiutha Goa nou chhi asong titi chhin, nung lüpongpeng.” Naiuso apa khukü noksong apem ai Yisuüh apa thaiutha chhi asong titi chhin, nung pongpengkiu.

⁴⁰Yisu laokü shinai hoi nou apa monglingkü lou, tititenai ngüso chikü apa tü taiukü noiküla.

⁴¹Nungko khaiunia tsak nian nou Jairus, sau Yihuda kamthang APAOU tsak noiküla apa shi. Naiuso apaüh Yisu dongko kaukü apa shiao koja;

⁴²tititenai apa thso tsaklu nou pon chekü nime thatso noiküla; naiuso apa eanao noiküla.

⁴³Apa khunai hoi nou apa lemkü kamjikan. Nai pon chekü nime she khutsün nyiuhai tsaküh moushe thaiutha apa taiutsün apem wan, naiuso sauüh lomeikiuao tsüshio.

⁴⁴Nung nyiuhai nou Yisu phiai shiküta apa nethon nai than; naiuso nungailu apa shekhutsün lao.

⁴⁵Yisuüh ngiom, “Ngo da sauüh than?” tilai apem tsamkü iula, Peter naiuso apako noinsoüh ngiom, “Atsandetsün, ni lemkü hoi thoi-eji.”

⁴⁶Lüko Yisuüh ngiom, “Khaiunia tsaküh ngo da thaniu, tititenai ngo ainou oukong sunganiu ta ngo ngen.”

⁴⁷Tilai nyiuhai nou atsangtaiuao tsümei ta ngen, apaüh ngaongaokü shikü Yisu khako kaukü apaüh ti thaiutha apa tü than naiuso nungailu apa titi meila nung ngiom.

⁴⁸Yisuüh apa tü ngiom, “Meso, ni amonglam nou ni lomei-iu; aalu nai lükhu.”

⁴⁹Loüh apa chitekü noinai, khaiunia tsak Yihuda kamthang APAOU tsam ainou shikü ngiom, “Athso eaniu. Atsandetsün latsonjekkiu.”

⁵⁰Lüko Yisuüh nung lulakü apa tü ngiom, “Lahat; amonglamlu lümonglam, naiuso apa mei-e.”

⁵¹Tilai apa tsamai shin, apaüh Peter, Yohan, Yakob, naiuso meso nou posinyiu apako ha-in.

⁵²Apem nou apa thaiutha miashapkü noiküla. Lüko apaüh ngiom, “Lashap; tititenai apa e tsüde, lüko sailakü noin!”

⁵³Ngüsoüh apa e ta ngephe apa lutsaokü nyaikiu.

⁵⁴Lüko Yisuüh meso pha nai helokü jonkü ngiom, “Meso, achu!”

⁵⁵Apa ahkü shinai, Yisuüh apa hao aheau tso akiu ta ngiom.

⁵⁶Apa posinyiu ngawan, lüko nung chhi nou sau hao lachite ta apaüh ngüso tü ngiom.