Read Khiamniungan Naga Luk 9 Bible Online

Luk 9 - Khiamniungan Naga bible

Luk 9

¹Yisuüh sahoi chekü nime jonküta ngüso hao akia lomeikiuao naiuso angei onthso apem khako oukong kiu,

²küta ngüso Goa nokshing thaiutha chimao naiuso akia nouso lomeikiuao hong.

³Apaüh ngüso tü ngiom, “Yam thaiutha pailai, nekong, themtsai, tangka tsüdekünai nekhut apoisan ti lakan.

⁴Asam sau tsamai nappe, nung ainou mopungekün lektso nungko lünoi.

⁵Tiai asam tsülou-e, asam tilai nung nok ainou soianji, ngüso thako atsangsheiao thaiutha asam hok ainou pu lüpattan.”

⁶Ngüso nok apemai khukü akia lomeikiu naiuso ngem amei chim.

⁷Nokpao Herodüh nung chhi apem thaiutha lulanai apa thatü lekkat, tititenai Yohan e ainou ahshikü noin ta ajantsoüh chitekü noiküla.

⁸Ajantsoüh Elija ahshikü noin ta ngiom loüh amaohai ajantsoüh pe ainou Goa E-po tsak müjam ahshikü noin ta ngiom.

⁹Herodüh ngiom, “Yohan to ngo khaiu tapsankü loatkü wan, lüko nung ngio sau thaiutha ngo luji, apa sau?” Naiuso apaüh Yisu luao yam.

¹⁰Sahoi nou laokü shinnai, ngüsoüh apa hau ngüso chhi thaiutha chiten. Naiuso apaüh ngüso niakü Betsaida nokai khu.

¹¹Nai hoi nou nung epkü apa phiai hoilut. Naiuso apaüh ngüso tü Goa nokshing thaiutha chite, küta alomeiao noitsünso lomeikiu.

¹²Tilai ahsham shin, sahoi chekü nime nouso shikü apa tü ngiom, “Hoi nou nok ashimai nai khukü saiao naiuso tso eheshiu epao lümeikü ngüso lühongan, tiautenai sam nungai aodangkünai noin.”

¹³Lüko apaüh ngüso tü ngiom, “Asamüh ngüso hao eheshiu lükiu.” Ngüsoüh thalan, “Sam khukü nungso chikü thaiutha eheshiu tuh ao ni mongchioji süne? Tititenai samko themtsai pungo naiuso ngou nime chiai ti tsütaiu.”

¹⁴(Nungko ngüso pohailu nai heng pungo thatso noiküla.) Yisuüh apa sahoi tü ngiom, “ngüso aopungongo hoi yangkü anoi-i.”

¹⁵Ngüsoüh angiotsünli ngüso chikü noi-in.

¹⁶Apaüh themtsai püngo naiuso ngou nime nou semkü, aün ai thapkü oukkiu, küta lopekkü hoi hao kiu-au sahoi hao kiu.

¹⁷Ngüso apemüh heküta tsamlu, naiuso apoi anelang nou kim chekü nime kamsanshin.

¹⁸Nyitso Yisu pemsa khukü misaokü noinai apa sahoi shin. Nai Apaüh ngüso tü, “Hoi nou ngo sau ta ngioji?” ta sang.

¹⁹Ngüsoüh ajantsoüh, “Yohan Alimkiutsün ta,” “loüh ajantsoüh Elija ta, naiuso ajantsoüh pe nai kihkü shitsün E-po tsak ahshikü noin ta ngioji?” ta thala.

²⁰Nai Apaüh ngüso tü, “naito asamüh ngo sau ta ngioji?” ta sang. Peterüh, “Ni Goa ün Khrista” ta thala.

²¹Küta apaüh ngüso tü nung sau hao lachite ta ngiokhem mongkü kiukü ngiom,

²²“Khaiunia Thso thatü angjakü hao noin, naiuso petchehoi, atengteng mesonhoi naiuso ngiokhem tsandetsünsoüh apa lukhappe naiuso luat-e, lüko samnyi nouko ahshikü shi-e.”

²³Naiuso apaüh chikü tü ngiom, “Ajantsoüh jü phiai shiao aiunai, apaüh meshen pem tsüyangkü ajekhaiu tsütukü paiphu pikü jü phiai ohoilut.

²⁴Tititenai sauüh meshen aa kipsanao aiuji nung mowane, naiuso sauüh jü thaiutha meshen aa mowane, nung epshi-e.

²⁵Tititenai khaiunia nou goumchi apem lesan lüko meshen onthso mowan nai tsüdekünai shiohean-inai apaüh ti lesanshi-e?

²⁶Tititenai sau ngo naiuso jü ngio thaiutha miamsimo-e Khaiunia Thso nou tilai meshen ajinka naiuso asio aünhonghoi ajinka nai shi-e apa thaiutha miamsimo-e.

²⁷Lüko atsüoting ngo asam tü ngio-e, nungko tsakü noinso ongko ajantsoto Goa nokshing moepkün lektso tsü-e-e.”

²⁸Apaüh nung ngio chiteküta anoujet tsak thatso phiai, Peter, Yohan naiuso Yakob apako niakü kingai misao saoao sung.

²⁹Apaüh misaonai apa kha shisileng li-e-an naiuso apa nesi-e ajin oukü thaiukü iulan.

³⁰Alekta khaiunia nime, Mosa naiuso Elija ne apako chiten.

³¹Yirusalem yamai khukü eao thaiutha ajinka nai sungkü Yisuko ngüso chite.

³²Peter naiuso apako noinso thatü ngaongaokü noiküla, lüko tilai ngüso thsümonkü iulan, ngüsoüh Yisu ajinka naiuso apako tsakü noitsün khaiunia nime nou epshi.

³³Ngüsoüh apa wankü khunai, Peterüh Yisu tü ngiom, “Atsandetsün, sam nungko noiao titi amei. Samüh kamnoi süme; athaiutha tsak, Mosa thaiutha tsak, naiuso Elija thaiutha tsak ta lahko.(Lüko apaüh ti ngiom nung tsünge.)

³⁴Apaüh nung ngio chitenai thengmia tsak shikü ngüso sojei, naiuso thengmia nou ngüso sojei nai ngüso hatatkü noiküla.

³⁵Nungai thengmia ainou sang tsak sungkü ngiom, “Nung Ngü chosantsün Jü Thso Asamüh apa tü lü-ang!”

³⁶Nung ngio thonnai ngüsoüh Yisulu ep. Naiuso nung ajekhaiu nai ngüsoüh tilüsong ep nung sau hau tsüchite.

³⁷Nenyi nouko ngüso king ainou saonai, hoi piakü apako pheten.

³⁸Hoi ongko khaiunia tsaküh vekü ngiom, “Atsandetsün, jü thso da thapao ngo ni tü thatü kojaji, tititenai jü thso apalu noin!

³⁹Angei onthso tsaküh apa thalounai apaüh lekkü veji. Naiuso apa she lungkü mo-iulakün lektso apa ainou tsükhuji.

⁴⁰Ngo asahoi tü nung komanao koja, lüko ngüsoüh tsüshio.”

⁴¹Yisuüh thalakü ngiom, “Oh amonglam tsünoikün naiuso tsüthakünso! Ngo asamko tilektso noi-e? naiuso asam ko tilektso jeilo-e?” “Athso nungai nialoukü ashi.” Ta khaiunia nou tü ngiom.

⁴²Apa shinai, angei onthso nou apa khia-ikü juolakü iula-in. Lüko Yisuüh angei onthso tü thutkü koman küta methso nou lomeikiu.

⁴³Ngüso apemüh Goa oukong asongting epkü ngawan. Apaüh sahoi nouso tü,

⁴⁴“Ngü asam hau ti chiteao noin nung labean! Khaiunia Thso khaiuniahoi oukong nai thumkü lethiowanao noin,” ta ngiotsün ko khaiuniahoi ngawankü noküla.

⁴⁵Lüko sahoi nou nung ngio tsüngela. Nung ngüsoüh tsüngelakü hao ngüso ainou tsangankü noiküla, naiuso nung ngiotsün thaiutha ngüsoüh apa tü sangao hat.

⁴⁶Sahoi nouso ongko sau asongting ta angem tsak sung.

⁴⁷Lüko tilai ngüso mongyang Yisuüh ngen, apaüh methso tsak nialoukü shikü, apa shimkü taiuküta,

⁴⁸apaüh ngüso tü ngiom, “Jü nian thaiutha ko sauüh nungtin methso nou lou-e apaüh ngo louji naiuso sauüh ngo louji apaüh ngo hongtsün louji. Tititenai sau asam chikü ongko ehenting noin apa asongting noin.”

⁴⁹Yohanüh ngiom, “Atsandetsün, khaiunia tsaküh anian ko angei onthso nouso komantsün samüh ep, küta samüh apa lulao, tiautenai apa sam hoi tsüde.”

⁵⁰Yisuüh ngüso tü ngiom, “Apa lalulao,” “tiautenai sau asam ko tsükhengeji apa asam dongai noin.”

⁵¹Tilai apa aün nai sunganao ajekhaiu saojikan, apaüh Yirusalemai khuao mongchiokü apa kha nungai phokle.

⁵²Apaüh apa khako ngio kantsünso hong, naiuso ngüso khukü apa thaiutha khemkiuao Samariahai nok tsakai nap.

⁵³Apaüh Yirusalemai khu-eli apa kha phoklephe ngüsoüh apa tsülou.

⁵⁴Tilai apa sahoi Yakob naiuso Yohan neüh nung ep, ngüsoüh ngiom, “APAOU, ngüso jawanao thaiutha samüh aün ainou in sao-i-ao ni mongchio-emo?”

⁵⁵Yisuüh lapkü shikü ngüso tü thut.

⁵⁶Nai Yisu naiuso apa sahoiso amao nokai khu.

⁵⁷Ngüso nung yamai khunai, khaiunia tsaküh apa tü ngiom, “Ni tai khulünou ngo aphiai hoilute.”

⁵⁸Yisuüh apa tü ngiom, “Chiuhoi thaiutha lungken noin, naiuso koiyai waio nouso a-ap noin, lüko Khaiunia Thso thaiutha khaiu taiuthang tsünoi.”

⁵⁹Apaüh amaohai tsak tü ngiom, “Jü phiai ohoilut.” Lüko apaüh ngiom, “APAOU, ngo khukü jüpo chong akhanan-i.”

⁶⁰Yisuüh thala, “E nouso ngüso eanau nousoüh khananao lütaiukiu: lüko nito khuküta Goa nokshing achiai sungkü lüchim.

⁶¹Amaohai tsaküh Yisu tü ngiom, “APAOU ngo aphiai hoilute, lüko aya jü tsammongso tü apunge ngio ngioao akhu-i.”

⁶²Yisuüh apa tü ngiom, “Khaiunia sauüh apa pha eiu ahtsün nai taiukü phiai thapshiji apa Goa nokshing thaiutha tsüpou.”