Read Khiamniungan Naga Ngiokhem 11 Bible Online

Ngiokhem 11 - Khiamniungan Naga bible

Ngiokhem 11

¹“APAOU asam Goa lütsüojin naiuso apa ngiokhem nouso apem angio angkü lüthe.

²Apako tsakeitsün tsangkü asamüh APAOU thaiutha lonyi ti ngelo nung lüyangsan. Nung ngetsün asam thsoso tsüdekü, asam pem noin. Asamüh APAOU ün asong, apa oukong si akong nou,

³naiuso apa ii chhisiya nouso epiu. Asamüh Ijip nokpao naiuso apa goumchi athum tü ti chhin nung epiu.

⁴APAOU nou Ijip hai süpai hoi tilai ngüsoüh asam tü kom- kü noiküla, nungai Aseng Khiamnok nai ngüso mokthso naiuso tsamkei nouso hakü moisemkü mowanitsün asamüh epiu.

⁵Asam nungai moshingoikü nou khako liutsa nai APAOU nou asam thaiutha ti chhikü noiküla nung asamüh ngeji.

⁶Reuben kau ko Eliab thsoso Dathan si Abiram tü apaüh ti chhikü noiküla nung asamüh lüyanglu. Khaiunia apem nou epkü ngüso si ngüso tsammong, ngüso nejenkhio, ngüso tsamkei, naiuso thainian nouso apem hakü goum nou paiküta mowan.

⁷Nung APAOU nou chhitsün chhisiya asong nouso apem epkü shitsün asam noin.

⁸“Ngo asam hau lonyi kiutsün ngiokhem nouso apem angkü lüthe. Nungaito asamüh haiu nou yanao shio-e, naiuso asam napao noitsün goumchi nou thalo-e.

⁹Nungai APAOU nou asam paosiposo naiuso ngüso thsaosithsoso tü thalotaiutsün memei naiuso atsüomei goumchi nai aakih atao laiukü kih-e.

¹⁰Goumchi sübao asamüh thaloau noin nungto asam nung khako kihkü shitsün Ijip goumchi li tsüde. Ijip goumchi aito, asamüh lelo nou tilai lethio-e, asamüh khiam nou tsatsakü kongkü chhiau noiküla,

¹¹lüko asam napkü thaloau noitsün goumchi to king naiuso tsamei saokü ah ou nou penkü gohthan aakü noitsün goumchi tsak noin.

¹²APAOU asam Goaüh nung goumchi tü paotsangji naiuso nung goumchi khütha nai asaita apaüh jimkü noiji.

¹³“Nungtiphe ngo asam hau lonyi kiutsün athoiluttsünso angio angkü lüthe; APAOU asam Goa lütsüojin naiuso amongpem apem nou lüyathsüo.

¹⁴Asamüh nung angkü chhi naito, apaüh asam goumchi nai thsanyan nyim si thsamthuk taoko pokü sungnai ah ou nou honge, nungaito asam hau chih nou, theng nou, naiuso Olip khiam nou,

¹⁵naiuso asam thainianso thaiutha khengliu nou sunge. Asamüh aiutsün chihsikhiam asamüh eppe.

¹⁶Asam APAOU Goa ainou amao goa amkhamao naiuso yathsüo au lanialükhun-i.

¹⁷Asam nialükhuni naito, APAOU nou asam ko mong- mate.Apaüh ah ou nou lolaokü wan naito, asam goumchi chihle khiamle sungao tsüshiokü goh thatü waikü noi-e. Nungai asam goumchi sübao apaüh asam hau kiuji nungto amei tsak noilüko nungai asam eane.

¹⁸“Nung athoiluttsünso yangsan- kü asam mongai tsübeantingkü lütaiu. Nungso ayangsanau thaiutha asam pha tü kelutkü naiuso asam khakheng nai leplutkü lütaiu.

¹⁹Nungso asam thsoso hau lütsande, asam tsamai noi taoko, yamai tsakei taoko, aalo taoko naiuso chhisiya taoko nungso thaiutha lüchite.

²⁰Nungso asam tsam koukhan nouso naiuso bekhan nouso tü satlutkü lütaiu.

²¹Naito asam naiuso asam thsoso asam paosiposo tü APAOU asam Goaüh kiu-e ta thalotaiutsün goumchi nai aakih tao laiukü kih-e. Goum khütha nai maou nou noitsün lektso asam nungai kih-e.

²²“Ngo asam hau kiutsün ngiokhem nouso apem mong kiukü angio angkü lüthe: APAOU asam Goa tü lütsüojin, apaüh thoiluttsünso alum lüchhi, naiuso apa tü mong kiukü lünoi.

²³Naito asam khutsün ko asam chiai mele asong naiuso oukong asong mele nouso apem ko- mane, naiuso nung goumchi asamüh thalo-e.

²⁴Asamüh yanlükhuntsün goumchi apem asam ün noi-e. Asam elung ajepekki nai singtso goh nou tü yalo nou ajenapki nai Lebanon king saokü noi-e, naiuso ajepek nai Eufrates Haiu tü yalo nou ajenap nai Mediteranian khiamnok tü thalutkü noi-e.

²⁵Apaüh thalokü taiutsünli, asam nung goumchi tilüsongai khu-e, APAOU asam Goaüh asam lün khaiu- niahoi nouso hatkü iula-i-e, naiuso asam sauüh thayangau tsüshio-e.

²⁶“Lonyi ngo asam hau ouk tsüdekünai athesan tsak cholo-iau kiuji:

²⁷Ouk nou: Lonyi ngo asam hau kiutsün nung APAOU asam Goaüh thoiluttsün asamüh angio ang naito,

²⁸lüko athesan nou: asamüh nung athoiluttsünso angio tsüangkü nung khako tilaitso tsüamkhamkün amao goa nouso amkhamao laokü khu naito.

²⁹Tilai APAOU nou asamüh thaloau noitsün goumchi nai niathiokü shi-e, asamüh Girizim King ainou ouk welutao noin, naiuso Ebal King ainou athesan welutao noin.

³⁰(Nung king nime nou ne Yordan Tsamei nai kihtsün Kanan hai goumchi nai Yordan Haiu ajepek nai noin. Nungso ajenap dongai nai, More ün asio pai nouso ainou laiukü tsükhukü Gilgal noksong shimkü noin.)

³¹Asam lo Yordan Haiu yankü khuau noin küta APAOU asam Goaüh asam hau kiutsün goumchi nou thalou-e. Tilai asamüh nung goumchi thalou-e, küta nungko kihlo-e,

³²ngo lonyi asam hau kiutsün ngiokhem nouso apem angkü kankei-e ta asamüh lüyang.”