Read Khiamniungan Naga Ngiokhem 13 Bible Online

Ngiokhem 13 - Khiamniungan Naga bible

Ngiokhem 13

¹“E-po tsaküh tsüdekünai meamean ngio thunshitsün tsaküh

²nung khako asamüh tsüamkhamkün goa nouso am- khamkü yathsüoau asam hau ii tsüdekünai athanga tsak chhikü hanau thaloküta asam nialokü khuwanao shiom. Apaüh thalotsün tso tsak thawao lüko,

³apa tü tilaitso lahoilut. APAOU asam Goaüh apa asamüh asam Goa mongpem apem nou tsüojinji süne tsütsüojin nung theluao apa kankeiji.

⁴APAOU tü lühoilut naiuso apa lülomsan; apa ngio angkü lüthe naiuso apa athoilut nouso lükankei; apa lü amkham naiuso apa tü mong kiukü lünoi.

⁵Lüko asam Ijip goumchi nai sua aküo nai noi taoko asam sauüh niasan, nung APAOU thako kheng- shikü meamean ngio thunshitsün naiuso e-pohoi loatkü lüwan. Nung- tin khaiunia nou asam aakih APAOU nou mongchiotsün ainou tsümeikün yamai nialükhunau kowetsün tsümeikün khaiunia noin. Nung tsümeikü ainou asam jija thakhuau thaiutha apa to loatkü wanao noin.

⁶“Goa nouso asam paosiposoüh tilaitso tsüamkham, nungtü amkhamao adeiüh lüko, athsosoüh lüko, athso menyiuthso nou lüko, atsammongnyiuüh lüko, tsüdekünai ahaimeitingüh lüko kausaikü asam tü shilotsüo kiunai nungtü la amkham.

⁷Asam shimkü tsüdekünai shitsaikü noitsün khaiuniahoi nou nung goa nouso tü amkhamao asam lotsüokiuau shiom.

⁸Lüko apa hau asam lashiolo-i, apatü anglüko la anglu. Apa hau atsüojinyang tsüde- künai atsüojin lahan, naiuso apa lakiplo.

⁹Apa loatkü lüwan! Ni chong lung nou apa tü lüyak, küta khaiunia pungkü nou apa tü lüyak.

¹⁰Apa lung nou yakkatkü lüwan! Apaüh asam APAOU asam Goa sauüh asam Ijip sua aküo ainou niasan, apa ainou asam nialükhunao koweji.

¹¹Nungaito Israel khaiuniahoi apem nou nung athawaotsün lula-e, küta ngüso hat-e, naiuso sauüh lünou nungphiai nungtin chhisiya tsüchhi shi-e.

¹²“Tilai asam APAOU asam Goaüh kiutsün noksong nouso ko kihlo-e, asamüh nung khako tilaitso

¹³tsü amkhamkü nou goa nouso tü amkhamao asam mele khaiunia ajantsoüh asam nung noksong ainou ayam tsüthakünai nialükhune.

¹⁴Asamüh nungtin ngem lula naito, tsangsheikü naiuso thapekkü lüyam- lu, küta nung tsümeikün chhisiya nou atsüo thawaokü epsan naito,

¹⁵nung noksong nouko noitsün khaiunia apem, naiuso ngüso thainianso lüko apem loatkü lüwan. Küta nung noksong nou moisemkü lülomowan.

¹⁶Nung noksong nouko kihtsün khaiuniahoi jengtsaiu nouso apem kankü shiküta nungso noksong kingpun nai akhaikam, küta noksong nou naiuso nungko noitsün alum sunkü APAOU asam Goa hau chaithio tsakli in nai lüjahthiowan. Loto nung noksong tilaitso tsülashikü hau athon tsüyang thaiutha lothekü lüwan.

¹⁷Nung alotheao noitsün jengtsaiu nouso asamüh meshen thaiutha titso lataiushi, asamüh nungti chhi naito, APAOU apa amongmat ainou phoklekü asam hau atsüojinyang hane, apa asam ko atsüojinyang noi-e.

¹⁸Ngo lonyi asam hau kiutsün apa athoilut nouso apem asamüh angio angkü naiuso apaüh mongchiotsün ti noin nung chhi naito, apaüh asam paosiposo tü tha- lotaiutsünli asam khaiunia awe- khemau tsüshiokü shingkü khu-i-e.”