Read Khiamniungan Naga Ngiokhem 14 Bible Online

Ngiokhem 14 - Khiamniungan Naga bible

Ngiokhem 14

¹“Asam APAOU Goa ün khaiuniaso noin. Nungtiphe asamüh eanhai thaiutha meashap tsüshape, amao khaiuniahoi nou chhitsünli asamüh chija lahelo, tsüdekünai tsüokan nou tsükane.

²Asam APAOU asam Goa ün noin, apaüh asam nung goumchi khaiunia apem ong ainou apa khaiuniahoi theau chosan.

³“APAOU nou tsüsio ta ngio- wantsün titso lahe.

⁴Asamüh nung thainian nouso heau shio-e: Jang, won nouso, Onnemok,

⁵Jinchai, liu ai noitsün onnemok, liu ai noitsün wonhoi,

⁶thainian sübao achanjung jungkü naiuso achihli likü noitsün nungso thainian heau shio-e.

⁷Lüko thainian sübao nou tü achanjung tsüjung naiuso achihli tsüliji nungso tsüheau noin. Asamüh Ut naiuso rabit sao, tsüdekünai khan ai kihkü achi asoh yamhetsün thainian nyih tsüheao noin.Nung thainian nousoüh achihli nou liji, lüko achanjung tsüjung, nungso tsüyanchükün thainian ta wesanji.

⁸Yah nou lahe, ngüso tsüyan- thsüokün thainian ta wesanao noin, ngüso achanjung jungkü noin, lüko achihli tsüliji. Nungtin thainian nyih titso lahe, tsüdekünai yaang eetsün thainian mea nou tü athan lüko lathantan.

⁹“Asamüh ngoh akoi si alap potsün in apem heao shio-e,

¹⁰lüko khiam khei ai noitsün thainian tisü- bao tü akoi tsüdekünai alap tsüpoh, nungso tsüheau noin, nungso tsüyan- thsüokün thainian ta wanao noin.

¹¹“Asamüh waio ayanthsüo nouso apem heau shio-e.

¹²Lüko asamüh tsühekü hau waio nouso nungso noin: Letche, anya waio, ngouhe letche, me on letche, yahe letche, mea he letche, mükho, Ostrich waio, khiam waio, Stork waio, Heron waio, Pelikan waio, Kormoran waio, Hoopoes waio, naiuso biah nouso.

¹⁹“Akoi potsün paosung saosung apem tsüyanthsüokü noin, nungso lahe.

²⁰Lüko ayanthsüo paosung saosung tilünou asamüh heau shio-e.

²¹“Yaangkü eantsün thainian nyih lahe. Asamüh nung melemaohai sau- hai asam ongko kihkü noin, nungso hau kiuwanao noin, tsüdekünai asamüh amao mele nouso hau nung jananau noin. Lüko asam to APAOU asam Goa ün nou noin. Asam apa khaiuniaso noin. “Onnemokthso tsüdekünai wonthso nyih asamüh anyao nouko latheng.

²²“Pon pungkü asam eiu ai sungtsün apem nouko che haoson nou mothikü ataiu.

²³Naiuso APAOU asam Goaüh chosantsün amkham- thang tsak nai khukü ta nungai apa khako nung khülam, theng, naiuso Olip khiam, naiuso asam thainian jang naiuso onnemok chongting puntsün athso nouso ekve nou lühe. Asamüh asam Goa APAOU asaichi lomsantsün ngeloau nung lüchhi.

²⁴APAOU nou asam hau ouk kiutsün asam eiu ai sungtsün asam ekve tsam ainou amkhamthang nai kankü khuau laiukü jetekü noi naito nungti lüchhi:

²⁵Asam pai eiu ao eiu chai he lüjan, küta nung chai nou amkham- thang nai ni kankü ashi.

²⁶Asamüh tilüsong aiuji nung he lüjan- jangnyih lüko, onnemok nyih lüko, theng lüko, jem he lüko lüjan- küta nung APAOU asam Goa khako ni naiuso atsammongso heshiuküta lümongling.

²⁷“Asam noksong nouso ko noitsün Levi hai tsülusankü lawan; ngüsoüh ngüso tengkhaiu tengkam tsünoi.

²⁸Sampon thontsün pungkü asam khülam apem ainou ekve kankü shikü ta asam noksong nouso ai akamtaiu.

²⁹Nung chih nou Levi hai thaiutha noi-e, tiautenai ngüso tengkhaiu tengkam tsütaiu, naiuso nung melemao hoi, mejetthso hoi, naiuso jihinyiu hoi sauhai asam noksong nouko kihakü noin- ngüso thaiutha noi-e. Ngüso shikü ngüsoüh potsün likü ngüsoüh epe. Nung lüchhi, naiuso APAOU asam Goaüh asam chhisiya alumko asam hau ouk kiu-e.”