Read Khiamniungan Naga Ngiokhem 17 Bible Online

Ngiokhem 17 - Khiamniungan Naga bible

Ngiokhem 17

¹“APAOU asam Goa hau jang tsüdekünai onnemokthso alothe suntsün aloat chaithio lakiu; APAOU nou nung chinyanji.

²“Noksong ajantso ongko melo tsü- dekünai menyiu ajantsoüh,

³APAOU athalou-etsünko tsüjeiaikü amao goa nouso tsüdekünai aje, alei, kianthsüo nouso amkhamtsün naiuso yathsüotsün tsangkü apa athalou- etsün lothekü APAOU thako angei suntsün asamüh lula nai,

⁴asamüh nungtin ngiongem lula nai, nungaito nung tü meikü thathaiukü lükautha. Nung tsümeikü nou Israel nai atsüoting thawao-iu tünaito,

⁵nung khaiunia nou noksong bechiai nia- lokü shiküta apa lung nou lüyakkat.

⁶Titilünou apa thako mitha kiutsün nime khengai epnaito, apa loatau noin, lüko mitha tsaklu naito apa tsüloate.

⁷Mitha kiutsünsoüh chong lung nou yakke, küta apoi nousoüh nung khaiunia tü yakke, nungli asamüh tsümeikü nou wanao noin.

⁸“Mi ajantso asam thaiutha ajanthat kiuao chekkü sungnai, she loshitsün thaiutha tsüdekünai mea- womekü ngemtsün thaiutha, asam ongko ngemattsün noi nai, nungai asam APAOU asam Goa tsangkü chosantsün amkhamthang tsak nai lüsung,

⁹küta nungtaoko noitsün Levi mesonhoi naiuso mikhemhoi dongai ami kankü shiküta lükiu.

¹⁰Nungai ngüsoüh ami khemkiu-e, naiuso ngüsoüh ni hau chitetsün tongtü chhiao noin.

¹¹Ngüsoüh khemkiutsün lülo küta ngüso ayam- han alumko thathaiukü lühoilut.

¹²Khaiunia sauüh mikhem kiutsün tsüdekünai meson chhisiya taoko angio tsü ange, apa to loatkü wanao noin, nungli asamüh Israel nai tsümeikün wanao noin.

¹³Nungai khaiunia pungkü nou nung lula küta hatte, naiuso khaiunia sauüh nungli chhishiao tsüsome.

¹⁴“APAOU asam Goaüh asam hau kiuao noitsün goumchi asamüh thalokü kihlokütün phiai nungai asam lemkü noitsün amao mele nousoli nokpao tsak taiuao yangsane.

¹⁵Khaiunia sau asamüh nokpao theau chosanji nung khaiunia APAOU nou chosantsün tsak ta tsangsheikü athe. Apato asam khaiunia ongko noulu tsak theao noin, asam nokpao au melemao hai lathe-i.

¹⁶Nokpao nouto apa süpaihoi thaiutha mokthso piakü taiuao tsünoi, naiuso apaüh Ijip nai mokthso nouso tuh ao khaiunia tsühongau noin, tiautenai APAOU nou apa khaiuniaso nungai tilaitso laokü tsükhu-ishi-e ta ngio- waniu.

¹⁷Nokpao nou tsammongnyiu piakü taiuao tsünoi, tiautenai nungüh apa mong APAOU ainou phoklekü khuwan-i-e, naiuso apato tangkason naiuso chaiou lakkeng piakü tsükam taiuao noin.

¹⁸Tilai apa nokpao theji apaüh Goa ün ngiokhem naiuso atsandetsün Levi mesonhoi nou taiutsün atengh ainou satsantsün thsamsat tsak taiuao noin.

¹⁹Apaüh nung thsam nou apa aakihlaiu thathonkü apa dongko taiuküta nungko nou wekü theau noin, nungaito apaüh nung thsam nouko noitsün alum mongkiukü angio angkü APAOU lomsanau ngelo-e.

²⁰Nung tsangkü apa meshen khaiunia Israel haitü intso meithso naiuso APAOU nou thoiluttsün nou ngio tsüangkün mongyang ainou thakhu-e. Nungaito apaüh pon piakü nokshing shinge, naiuso apa thsao- sithsosoüh Israel nai vetao piakü nokshing shinge.”