Read Khiamniungan Naga Ngiokhem 2 Bible Online

Ngiokhem 2 - Khiamniungan Naga bible

Ngiokhem 2

¹“Sam athun nai laplokü APAOU nou thoiluttsünli Agaba Haiujet ai khutsün yam tü thaiukü liutsa nai nap, naiuso samüh king goumchi Edom lemkü tsakeitsün nai atao laiukü wanan.

²Nungai APAOU nou ngü tü ngiom,

³“Asam nung king goumchi nai atao laiukü tsakei lowaniu ajenapki dongai lüphokle.

⁴APAOU nou ngütü asam hau ayamhan ajantso kiuao chitekü ngiom, asamüh lo Edom hai king goumchi nouso yankü khuau atao saokü noin, nungh asam tü than nou deisinio Esau thsaosithsoso goumchi noin. Ngüso asam lün hatkü noi-e;

⁵lüko asam ngüsoko lali-e, tiautenai ngo asam hau ngüso goum- chi hokngamthang tsaktso tsükiu-e. Tititenai ngo Esau thsaosithsoso hau Edom hai goumchi kiuwaniu.

⁶Asamüh asam chaiüh ngüso ainou eheau chih naiuso ashiuao khiam atuh atuhe.”

⁷Asamüh chhisiyakü shitsün alum ko APAOU asam Goaüh asam titi ouk kiukü noiküla lüyangsan. Apaüh asam nung liutsa lang asongting yan- kü tsakeitsün nai asam paotsangkü shin. Apa asam ko pon aopüle chiküko haküshin naiuso asamüh potsün alum asamüh ep.

⁸“Nungtiphe asamüh Elat noksong nouso ainou khutsün yam naiuso Eziongeber ainou Ee Khiamnok ai khutsün yam wanküta laokü khukü ajepekki dongai phoklekü Moab dongai khuau atsalo.

⁹APAOU nou ngü tü ngiom, ‘Asamüh Lot thsaosithsoso Moab hai tü ti angja lakiu, tsüdekünai ngüso thako ehli nou lalosan. Ngo ngüso hau Ar noknio kiuwaniu, naiuso ngo asam hau ngüso goumchi haoson tsaktso tsükiu-e.’”

¹⁰(Nung Ar noknio nouko akong- hoi Emim ta jontsün, pem songkü, Anakim haili konsitheng laiukü kihküla.

¹¹Anakimli ngüso tü Refaim ta lüko jonji, lüko Moab haiüh to ngüso tü Emim ta jonji.

¹²Hor hai Edom nai kihkü noiküla, lüko Esau thsaosithsosoüh ngüso koman, ngüso shingkhan lothean, küta nungko kihlokü shin, nung Israel haiüh phikü APAOU nou ngüso hau kiutaiutsün goumchi ainou ngüso ehoi komanlotsün khekkü noiküla.)

¹³“Nungai APAOU nou sam tü ngiotsünli samüh Zered Haiu yankü khu.

¹⁴Samüh Kades Barnea ainou tsalokü shitsün tao ainou Zered Haiu yantsün tao saokü nai pon aosamkü petjei wankü noiküla.Nung APAOU nou ngüso tü ngiotsünli nung vetaoko ehliao montsün khaiunia apem ean- khem.

¹⁵APAOU nou nung khaiunia nouso mothamokhemkün lektso ngüso thako mongmatkü noiküla.

¹⁶“Ngüso chikü ekhemkütün phiai,

¹⁷APAOU nou sam tü ngiom,

¹⁸‘Lonyi asamüh Moab goumchi Ar yam tsangkü yankü khuau noin.

¹⁹Nungai asam Lot thsaosithsoso Amon hai goumchi shimkü shi-e. Ngüso tü atsonjek lakiu, tsüdekünai ngüso thako ehli latsalo, tiautenai ngo ngüso hau kiukü taiutsün goumchi haoson tsaktso asam hau tsükiu-e.’”

²⁰(Nungtü Refaim goumchi ta lüko jonkü noiküla, nungko kihtsün khaiuniahoi tü Amon haiüh Zam Zumim ta jonkü noiküla.

²¹Ngüso Anakim haili konsitheng laiukü noitsün hoi noiküla, nungko ngüso piakü naiuso akongle noiküla. Lüko APAOU nou ngüso lomowan, küta Amon haiüh ngüso goumchi thalokü kihlo.

²²Edom king goumchi nai kihtsün Esau thsaosithsoso hau chhikiu tsün khekkü APAOU nou Edomhai hau lüko chhikium. APAOU nou Hor hai lomoküta Edom haiüh ngüso goumchi thalo naiuso lonyi saokü ngüso nungko kihkü noin.

²³Mediteranean Shekok goumchi nou Kret khiamjet nai noitsün khaiuniahoi tsangkü kihlo, ngüsoüh Avvim hai gohpao nou lomo küta ngüso goumchi Gaza noknio ajenapki saokü apem lowan.)

²⁴“Samüh Moab goumchi yanlükhunkütün phiai, APAOU nou sam tü ngiom, ‘Lo, atsalo, küta Arnon Haiu yankü lükhu. Ngo Amor hai nou Hesbon nokpao Sihon, apa goumchi hakü aoukong nai taiukiuji. Apa lükoman küta apa goumchi thaloau lütsalo.

²⁵Lonyi nai yakü ngo athang apemai khaiuniahoi nou asam lün hatkü iula-i-e. Asam nian jonsantsün taoko khaiunia pungkü asam lün ahat nou ngaongaokü noi-e.’”

²⁶“Nai ngo Hesbon nokpao Sihon dongai nokmei paopei kankü Kedemot liutsa ainou ngiongem kan- tsünso hong:

²⁷‘Sam hau agoumchi yankü akhu-i. Samüh yam tsangkü saitha yankü khu-e.

²⁸Samüh sam heshiutsün chih thaiutha amai naiuso samüh shiutsün khiam thaiutha amai kiu-e.

²⁹APAOU sam Goaüh sam hau kiutaiutsün goumchi nai napao samüh Yordan Haiu moyankün lektso agoumchi yankü khuau mongchiotsün noin. Edom nai kihtsün Esau thsaosithsoso, naiuso Ar nai kihtsün Moab haiüh sam hau ngüso goumchi yankü khuau ayam sopkiu.’”

³⁰“Lüko Sihon nokpaoüh sam hau apa goumchi yankü tsükhu-i. Sam lo noitsün apa goumchi samüh apa shioloküta lo-iau APAOU nou apa mong kongkü naiuso khengshikü iula-in.”

³¹“Nungai APAOU nou ngü tü ngiom, ‘Athaplu, Ngo nokpao Sihon naiuso apa goumchi asam khako thumkü taiukiuji, apa goumchi lülo naiuso nungko lükihlo.’

³²Sihon, apa khaiunia apem samko ehliao Jahaz noksong shimkü shin,

³³lüko APAOU sam Goaüh apa sam oukong nai kiuwan, naiuso samüh apa thsoso, naiuso apa khaiuniaso apem loatkü wan.

³⁴Nungko aikü samüh noksong nouso thaloküta lothean, naiuso khaiuniahoi melo, menyiu, naiuso methsoso apem loatkü wan. Nungko samüh tsaktso tsüjashikü apem loatkü wan.

³⁵Samüh thainian apem loküta noksong nouso kamhean.

³⁶APAOU sam Goaüh noksong nouso Aroer ainou Arnon Tsamei thun saokü, naiuso nung tsamei awemko noitsün noknio Gilead yam thathunkü thalowan. Sam khako noksong tsaktso be kongkü tsakü tsünoiküla.

³⁷Lüko sam Amon hai goumchi tsüdekünai, Jabbok Haiusai nouso, king goumchi nai noksong nouso, naiuso amao athang tilüsongai APAOU sam Goaüh sam tü khuau tsüthoilut nung goumchi nouso shimkü tsükhu.”