Read Khiamniungan Naga Ngiokhem 20 Bible Online

Ngiokhem 20 - Khiamniungan Naga bible

Ngiokhem 20

¹“Tilai asam, asam ehso thako liao khu-e, asamüh mokthso nou kankeitsün tsamkei, mokthso nouso, naiuso asam ehoi süpai asam haove chiai phopkü eppe, nungai ngüso lün hatkü lanoi. APAOU asam Goa, sauüh asam Ijip ainou niasan, apa asamko hakü noi-e.

²Asam ehli motsalokü khako, meson tsak kha ai shikü süpaihoi nouso tü nung ngioau noin:

³‘Israel khaiuniaso, anglu! Lonyi asam ehli au khuji, asam ehso lün hatkü lanoi, lamonghen, naiuso lalekkat.

⁴APAOU asam Goa asamko hakü khuji, naiuso apaüh asam hau ashiolo nou kiu-e.’

⁵“Nungai asonghoi nousoüh khaiuniahoi nouso tü lotsüokü ngio-e, ‘Nungko khaiunia ajantso tsam loting lahkü, loüh nung molosiokü noimo? Noikü thanaito, apato tsamai laokü shianau noin. Tsüdekünaito, apa ehli taoko ean nai, amao ajantsoüh apa tsam losiolo- wane.

⁶Nungko khaiunia ajantso sainaoshep pai loting thomkü, loüh nung shep be-eiuyamao atao tsüepkü noimo? Noikü thanaito, apato tsamai laokü shianau noin. Tsüdekünaito, apa ehli taoko ean nai, amaohai ajantso nung shep nouko thaimeiate.

⁷Nungko khaiunia ajantso tsamsigoh yangau ngemtaiukü noimo? Noikü thanaito, apato tsamai laokü shianau noin. Tsüdekünaito apa ehli taoko ean nai, khaiunia ajantso nou apaüh tsamsigoh yangau ngemtaiutsün menyiu nou tsamsigoh yangane.’

⁸“Asonghoi nousoüh loüh khaiunia nouso tü ngio-e, ‘Nungko khaiunia ajantso hatkü naiuso monghenkü noimo? Noikü thanaito, apato tsamai laokü shianau noin. Tsüdekünaito, apaüh amaohai amongchio oukong lotheankiu-e.’

⁹Tilai asonghoi nousoüh süpaihoi tü chitetsün kheme, hoi pungkü thaiutha ngüsoüh ahei chosankü taiuao noin.

¹⁰“Tilai asam noknio tsak komheau khu-e, chongting nai, nung khaiunia nouso ko nokmei thaiutha lüchite.

¹¹Ngüsoüh nokmei aiukü bekhan mongchiokü sopan naito, ngüso apem asam sua iula-e, naiuso asam hau chhisiya kongkü chhikiu-e.

¹²Lüko nung noknio khaiuniahoi nousoüh nokmei shanau tsümong- chiokü ehliaulu yang naito, nung noknio asam süpaihoi nousoüh lülemlo.

¹³Nungaih tilai APAOU asam Goaüh asam hau nung noknio thalo-i-e, nungko noitsün pohai apem lüloat.

¹⁴Asamüh menyiuhoi, methsohoi, tsam thainian nouso, naiuso nung noknio ko noitsün jengtsaiu nouso loau shio-e. APAOU nou nung asam hau kiuwaniu.

¹⁵Asam kihlo- tsün goumchi ainou laiukü jetekü noitsün noknio nouso tü nungti chhiao noin.

¹⁶“Lüko tilai APAOU asam Goaüh kiutsün goumchi nai asamüh noknio nouso thalo-e, khaiunia apem loatkü lüwan.

¹⁷APAOU nou asam hau ngiokhem kiutsünli, Hit hai, Amor hai, Kanan hai, Periz hai, Hiv hai, naiuso Jebus hai, asamüh nungso khaiunia apem moisemkü lülomowan.

¹⁸Ngüso loatkü lüwan, nungailu ngüsoüh ngüso sotsom goa amkham achinyan chhisiya tsandekü asam Goa thako angei sunlo-iau tsüshio-e.

¹⁹“Ehli atao laiukü likü noi lüko, tilai asamüh noknio tsak thaloau koweji, nungko noitsün shep pai nouso lasahongan. Shep nouso lühe, lüko pai nouso lalothean, nung pai nouso to asam ehoi tsüde.

²⁰Shep pai tsüdekü amao pai nouso to lüsahongan, küta nung noknio nou moloikün lektso asam li-etsün thako asam lemkü asojei au phansankü shanao noin.”