Read Khiamniungan Naga Ngiokhem 21 Bible Online

Ngiokhem 21 - Khiamniungan Naga bible

Ngiokhem 21

¹“APAOU asam Goaüh asam hau kiuao noitsün goumchi nai kingpun nouko khaiunia ajantso sauüh loat ta tsüngekü asamüh epsan nai,

²asam aheihoi naiuso mikhemhoi khuküta nung meadum thangko nou ashimtso noksong nouso jetko ajete nou ta thatluao noin.

³Nungai nung mea dongko ashimting noksong aheihoi nousoüh jangtso thso tsak tilaitso chhisiya ao mokankeikü noitsün choloau noin.

⁴Nung noksong aheihoi nou tilaitso eiu tsü atsün naiuso chihle khiamle tsülethiotingkün khiam tsangkü noitsün tsamei nai nialokü sao-e, naiuso tsamei nouko jang sang nou longek-e.

⁵Levi meson nouso lüko nungai khuau noin, tiautenai angem si ngem apem ngüsoüh janthate. APAOU asam Goaüh ngüso apa yathsüokü naiuso apa nianko ouk welut au chosan.

⁶Nungai athioat khaiunia meathang shimkü noitsün noksong aheihoi apem nou ngüso pha jangtso chiai tsaowan

⁷küta ngio-e, ‘Nung khaiunia nou samüh tsüloat, naiuso nung sauüh loat samüh tsünge.

⁸APAOU ni Ijip ainou nia- santsün akhaiuniaso Israel hai hau awankiu. Sam hau awankiu naiuso aphio tsünoikün khaiunia tsak thioattsün thaiutha thsale sam khütha nai lanoi-i.’

⁹APAOU nou ti saoji, nung chhitsün tsangko, asam nung khaiunia loattsün thaiutha thsale tsünoi-e.

¹⁰“Tilai APAOU asam Goaüh ehli nai asam hau ashiolotsün kiu-e, naiuso asamüh aa nou tenlo-e,

¹¹asamüh ngüso ongko mongchiokü naiuso tsamsigoh lüko shanao lümeikü meso meikü noitsün eppe,

¹²apa atsamai nialokü lükhu, küta nungai apa khaiu lü-iuwan, naiuso sasan lütipan,

¹³naiuso apa neshe lülian. Nung menyiu nou atsamai noikü apa posinyiuso thaiutha alei tsak mongsaiu-e, nungphiai ni apa tsamsigoh yangau shio-e,

¹⁴phikü ni apa tsümongchio shikü iula nai, ni apa sokthamkü siutekü khu-iao shio-e. Ni nung menyiu lothekiuphe, ni apa sua tsakli tsükankei-e naiuso tsüjane.

¹⁵“Khaiunia tsaküh menyiu nime tsamsigoh yang, naiuso ngüne nem- thsoüh apa hau melothso chetkiu; lüko melothso yamchong nou apaüh mongchiotsün tsammongnyiu da chettsün tsüde.

¹⁶Tilai nung khaiunia nou apa tengkam apa thsoso mongko janeau yangsane apaüh meshenüh mongchiotsün menyiu nou thso hau melothso yamchong tengkam haoson kiukü apaüh phaphi phamong tsüshanao noin.

¹⁷Melothso yamchong nou apaüh mongchiotsün tsammongnyiu nou da tsüchet lüko, melothso yamchong hauto apaüh tengkam haoson nime kiuao noin. Khaiunia tsaküh apa melothso yamchong nou apa hau apaüh epao noitsün haoson kiukü apa tsangsheikü taiuao noin.

¹⁸“Khaiunia ajantso melothso mongkong naiuso angio tsüangkü noi nai, posinyiuüh alohat kiu lüko ngüso tü tsüangkü noi nai,

¹⁹apa posinyiu soüh apa nung noksong nouko kihtsün aheihoi khako kankü khukü aliluao lütsa-i.

²⁰Posinyiu nousoüh petchehoi nouso tü nung ngioau noin: ‘Sam thso mongkong naiuso khengshikü sam tü angio tsüangji; apaüh chai yaang nai kappanji naiuso thengtok khaiunia noin.’

²¹Nungai nung noksong nouko kihtsün khaiuniahoi nou apa lung nou yakkatao noin, naiuso asamüh nungli tsümeikün wananao noin. Israel nai khaiunia pungkü nou nung lula-e, küta ti shithawao nung lün hat-e.

²²“Khaiunia ajantso apa aphio thaiutha loat nai, naiuso apa mea pai tsak khaiu nai phantaiu nai;

²³nung mea paikhaiu nai a thangekü tsütaiu-ela- lüko nung ajekhaiuko lu khananau noin, tiautenai e mea tsak pai tsak tü phantaiutsün nou goumchi nai Goa athesan kanjikanji. Nung mea lükhanan, nungaito asamüh APAOU asam Goaüh asam hau kiutsün goumchi nou tsülochinyane.