Read Khiamniungan Naga Ngiokhem 22 Bible Online

Ngiokhem 22 - Khiamniungan Naga bible

Ngiokhem 22

¹“Ni meshen khaiunia Israel hai ün jangtso tsüdekünai onnemok tsak khuwankü epnai, nung yaang thapkü lawanan; lüko APAOU dongai kankü lükhu.

²Lüko nung thainian paou nou yam laiukü khukü noi naito, tsüdekünai ni nung sau thainian ta tsüngekü naito atsamai kankü lükhu. Tilai nung thainian paou nou yamkü shi-e, nungai apa hau lükiu.

³Ni gado tsak khuwankü epnaiüh, nepat tsak sa-ankü epnaiüh, tsüdekünai tso tsak meshen Israel khaiunia ün sa-ankü epnai nunglilu lüchhi.

⁴“Ni meshen khaiunia Israel hai ün gado tsak tsüdekünai jangtso tsak wi-ankü epnai, nung yaang thapkü lawanan, nung thainian nou tentsakü lütaiukiu.

⁵“Menyiu haiüh melohai neshe tsüthoau noin, naiuso melo haiüh menyiu hai neshe tsüthoau noin, sau- haiüh nungti chhiji, nung khaiunia nouso tü APAOU asam Goa chinyanji.

⁶“Ni pai tsak nai tsüdekünai goh nai waio ap tsak anyiu nou alei nou da tsüdekünai athso nouso pokjeikü epnai, ni nung anyiu nou lowanao tsünoi.

⁷Ni athso nouso loau shio-e, lüko ni anyiu nouto khu-iau noin, nungai ni aakih laiukü naiuso tsüomeikü kih-e.

⁸“Tilai ni tsam ayan lah-e, jithun nai ji-ekü pe au labean. Ni nung shantaiukü nouko khaiunia ajantso salikü ean nai nung athsale tsünoi.

⁹“Ni sainaoshep kihtaiutsün ko amao lelo tsüthio-ela, nung thio naito, ni nung sainaoshep naiuso amao pai eiu sungtsün asiothang nai kiuwanao noin.

¹⁰“Ni jangtsopong tsak naiuso gado tsak nou da khe aikü kelutkü eiu tsü a-iau noin.

¹¹“Ni emok si paipun nou lahtsün ne kamkü tsütenau noin.

¹²“Ane ta athon püle nai nepeng chanlutao noin.”

¹³“Khaiunia tsaküh menyiuthso tsak tsamsigoh yangkütün phiai nung melo nou menyiu tsüaiukü komanau thatsan nai,

¹⁴apaüh nung menyiu thako tsüthakün mitha nouso shanlokü, ngüne tsamsigoh yang taoko nung menyiu asangting tsüde ta ngo epsan ta ngiokü,

¹⁵“Nungtin aküo thawao nai, menyiuthso posinyiu nou tsamsigoh yang taoko menyiuthso nou asangting ta mitha ao she chanlut taiutsün thenshem ne lo-e, naiuso ngüsoüh nung noksong aheihoi khako mikhem thang nai hane,

¹⁶nungko menyiuthso nou poüh ngüso tü ngio-e, ‘Ngo jüthso nung khaiunia hau tsamsigoh yangau kiukü noiküla, naiuso lo apaüh nung menyiu tsüaiu,

¹⁷Apaüh, ngüne tsamsigoh yang taoko nung menyiu asangting tsüde ta menyiu thako tsüthakün aphio mitha nouso kiukü ngioji, jüthso asangting noiküla ta nungko mitha noin, tsamsigoh yang taoko she chanlut nou tü lüthaplu!’

¹⁸Nungai noksong aheihoi nou tsammongpo nou nialoküta apa tü woiau noin.

¹⁹Ngüsoüh loüh nung melo nou tü chai tangkason tsom tsak jaküta nung menyiuthso po hau kiuao noin, tiautenai nung khaiunia nou Israel hai menyiuthso khütha nai amiam lolutkiu. Loüh nung menyiuthso nou nung khaiunia tsammongnyiu lu tsülaokü theshi-e, naiuso loto apa aakihlaiu chikü nung menyiu laitso tsükomane.

²⁰“Lüko tsammongpo nou ngio- tsün thanaito, naiuso asangting meso ta apa tü ti ii tsüep naito,

²¹nungai ngüsoüh meso nou apa po tsam koukhan nai tenkü shi-e, naiuso nung noksong khaiunia nousoüh apa lung nou yakkatau noin, tiautenai apaüh Israel hai khaiunia hau amiam kiukü tsamsigoh moyangkün khako ajisiwop chhin, nungti asam ong ainou tsümeikün wanao noin.

²²“Khaiunia tsaküh amao khaiunia tsak ün tsammongnyiu ko ajisiwop chhisiya chhikü thalonai, ngüne nemthso loatkü wanao noin. Nungti asam ong ainou tsümeikün wanao noin.

²³“Khaiunia tsaküh noksong tsak ko amao tsaküh tsamsigoh yangau ngemtaiutsün menyiuthso ko ajisiwop chhisiya chhikü thalo nai,

²⁴asamüh ngüne noksong bechiai nialokü shiküta lung nou yakkatao noin. Menyiuthso nou aah loau eh tsüpungphe apa lüko eao noin, tiautenai apaüh wetünto noksong nai noitsünsoüh lula ao noiküla. Nung melo nou amaohai tsaküh tsamsigoh yangau ngemtaiutsün ko ajisiwop chhitsün shioko eane. Nungti asam ong ainou tsümeikün wanao noin.

²⁵“Khaiunia tsaküh amao khaiunia tsaküh tsamsigoh yangau ngemtaiutsün menyiuthso tsak tü aodangkü nai mongdem ajisiwop chhi nai, nungaito melo noulu eao noin.

²⁶Menyiuthso nou ta ti chhiao tsünoi, tiautenai apaüh eao maikü angei tsüsunhe. Nung mi ngem nou khaiunia tsaküh amao hai tsak thalokü loattsün ko wekü noin.

²⁷Nung khaiunia nou aodangkü nai nung menyiuthso nou da mongdem ajisiwop chhi nai, nung menyiuthso nou ahalo au epong, lüko nungko apa haloau sau tsünoiküla.

²⁸“Khaiunia tsaküh tsamsigoh yangau tsüngem taiukün menyiuthso tsak tü mongdem ajisiwop chhikü thalo nai,

²⁹apaüh nung menyiuthso nou po hau amai nou tangkason aopungo kiuao noin, küta nung menyiuthso nou apa tsammongnyiu iula-e, tiautenai apaüh nung menyiuthso nou tü ajisiwop chhiao koja. Apaüh nung menyiu apa aakihlaiu chikü tilaitso komanao tsüshio-e.

³⁰“Khaiunia sauüh lüko meshen po tsammongnyiu ko ajisiwop chhi- siya chhikü meshen po tsülomiamao noin.”