Read Khiamniungan Naga Ngiokhem 24 Bible Online

Ngiokhem 24 - Khiamniungan Naga bible

Ngiokhem 24

¹“Melo tsaküh menyiu tsak tsamsigoh yangküta phikü apaüh menyiu nou da tso tsak epsan nou shioko tsümongchiokü iula nai, apaüh menyiu hau apunge thsamsat satkiukü nung menyiu apa tsam ainou hongane.

²Nungai menyiu nou loüh amao khaiunia ko tsamsigoh yangshi nai,

³loüh nung melo nou lüko nung menyiu nou tsüaiukü yangsan nai, apaüh lüko apunge thsamsat satküta menyiu hau kiukü apa tsam ainou hongane. Tsüdekünai nung menyiu müjam tsammongpo nou ean nai,

⁴nung nemthso yamko nai, aya tsammongpo nou apa müjam tsamsigoh tsüyangshi-e, apaüh nung menyiu lochinyaniu ta wanao noin. Apaüh nung menyiu tsamsigoh yangshi naito, nung APAOU mong- matitsün tsak noi-e. APAOU asam Goaüh asam hau kiutsün goumchi nai asamüh nungtin atsaoting angei nou tsüsunheao noin.

⁵“Khaiunia tsak tsamsigoh yangkü thunkü apa süpai chhisiya nai tsükhuau noin; tsüdekünai amao apin chhisiya nai tsükhuau noin, apa to pon tsak chhisiya ainou aaloau noin, nungailu apa meshen tsamai noikü apa tsammongnyiu monglingi- kü noiau shio-e.

⁶“Tilai samüh khaiunia tsak hau tso laiukiu nai, asamüh nung khaiunia nou tsüthakiushikü nai hau thaiutha apa thamthao mai tsüloau noin. Nungüh tsammongpin aakih heshiu khemsantsün kankü khuwan kiuji.

⁷“Israel hai meshen khaiunia sauüh tenlükhun küta apa sua ao iula-ikü tsüdekünai apa sua tsakli jan nai apa to loatkü wanao noin. Nungti asamüh tsümeikün asam ong ainou wanao noin.

⁸“Tilai asam pem nai jee sungkü kia-e, Levi mesonhoi nou asam tü ti ngioji nung tongtü chhiao noin; ngo ngüso hau kiutaiutsün ayamhan nouso lükankei.

⁹Asam Ijip ainou shitsün taoko APAOU asam Goaüh Miriam tü ti chhin nung lüyangsan.

¹⁰“Tilai asamüh khaiunia tsak hau tso tsak laiukiu-e, apaüh asam hau mitha liko neshe kiuao noitsün loau apa tsamai lanap.

¹¹Kingchiai taiukü noiküta, apa hau adongai kankü ashi-i.

¹²Apa tsosilu khaiunia tsak naito, nung neshe a thangekü lataiu;

¹³apa hau asham pungkü laokü lükiu, nungaito apaüh nung ne tenkü saiao shio-e. Nungai apa monglingkü noi-e, naiuso APAOU asam Goa asamko monglingkü noi-e.

¹⁴“Meshen Israel khaiunia tsak lüko, tsüdekünai melemaohai tsak asam noksong nouso tsak ko kihakü noitsün tsosilu tsak tsüdekünai amai kiukü taiutsün tsamki tsak lüko lasapthio-i.

¹⁵Ajekhaiu pungkü aje monapkün khako apa hau nung ajekhaiu mephaiu mai lükiuwan; apaüh chai nou pokü noin, naiuso nung eptsün ta welukü noiji. Asamüh apa hau tsükiuwan künaito, apaüh asam thako APAOU dongai wekü sang songkü ngio-e, naiuso asam angei aphio nai noi-e.

¹⁶“Posinyiu hai ngüso thsosoüh mi lemtsün thaiutha tsüloat ao noin, naiuso thsohai lüko ngüso posinyiu- soüh tsüloat ao noin. Khaiunia tsak loat au apa pemüh mi lemtsün thaiuthalu noi-e.

¹⁷“Melemao hai naiuso mejetthso nouso ngüso thakü noitsün ainou tsüphio-iau noin; naiuso chailaiu kiu nai lüko amonglameao jihinyiu hai neshe tsüloau noin.

¹⁸Asam Ijip nai sua noi tao APAOU asam Goaüh asam niasantsün nung lüyangsan, nung- shioko ngo nung athoilut asam hau kiuji.

¹⁹“Tilai asamüh asam be-eiuyame, naiuso chihpung ajantso poian nai, nung loau thaiutha laokü lakhushi, nungto melemao hai, mejetthso hai, naiuso jihinyiu hai thaiutha poikü wanao noin, nungai APAOU asam Goaüh asamüh chhitsün alum nai asam hau ouk kiu-e.

²⁰Asamüh asam Olip shep jam panlokü poiantsün nung apoi nou loau laokü lakhushi, nungso melemao hai naiuso mejetthso hai naiuso jihinyiu nouso thaiutha noin.

²¹Tilai asamüh asam sainaoshep jam panlowane, nung shep poi nou loau müjam lakhushi, nung melemao hai, mejetthso hai, naiuso jihinyiu hai thaiutha noin.

²²Asam Ijip nai sua noiküla, ta tilaitso labean, nung shioko ngo asam hau nung athoilut nou kiuji.