Read Khiamniungan Naga Ngiokhem 25 Bible Online

Ngiokhem 25 - Khiamniungan Naga bible

Ngiokhem 25

¹“Israel hai khaiunia nime jetko angem sung nai, nung misingem lothat ao mikhem kiutsünso dongai khunai tsak penkiu-e, naiuso amao hai tsak nou phio-i-e.

²Nung aphio khaiunia nou tü ashiuh au khemsan nai, mikhemhoi nousoüh apa goh ai kha thaothiokü noi-i küta apa tü shiuh au noin. Ashiuhtsün haove nou apaüh phiotsün likü noi-e.

³Apa tü aopüle jam ngoikü shiuh au shio-e, lüko nungh chiai tsüshiuh-e, nungh chiai shiuh naito apa nyong khako lomiamji.

⁴“Tsonyak nya-itsün taoko asamüh jangtsopong son lakiapjei.

⁵“Deisinio nime tengkam mojane- kün tao ngüne ongko tsak thso melo tsüchetlu taiukü ean nai, nungai nung khaiunia tsammongnyiu jihinyiu nou tsamkhaiu nou yankü amao haiko tsamsigoh tsüyange nung eantsün deisinio nou tsamsigoh yangau ayam noin.

⁶Ngüne thso melo thso yamchong chettsün nung ean nou thso au the-e, nungti apa tsammongling nou Israel nai tsülaokü noi-e.

⁷Lüko ean nou deisiniosoüh nung menyiu tsamsigoh yangau tsüaiu künaito, nung menyiu nou noksong aheihoi dongai khuküta ngio-e, ‘Jü tsammongpo deisinioso nou apaüh chhiao noitsün chhi nou tsüchhi-e ta ngioji, apaüh apa dei thsaosithso Israel khaiunia ongko taiukiuao tsümongchio.’

⁸Nungai noksong aheihoi nou apa tü jonkü sangnai, lüko loüh apaüh nung menyiu tsamsigoh yangau tsümong- chio ta thashi nai,

⁹nungai apa dei ün jihi noksong aheihoi khako shiküta, nung deisinio hokkhut tsak losan küta, apa kha nai lei thuplutkü ngio-e, ‘Khaiunia sauüh meshen deisinio thsaosithso taiuao tsümongchioji, nung khaiunia nou tü nungti thawaoji.’

¹⁰Israel nai apa tsamkhaiu tü ‘hokkhut ngiosantsün khaiunia tsamkhaiu ta jone.’

¹¹“Khaiunia nime jetko ali-e sungkü khaiunia tsak tsammong- nyiuüh apa tsammongpo halokü amao khaiunia tsak nou tsashe nai thip nai,

¹²nung menyiu hau atsüo- jinyang ti tsühankü apa pha lütapan.

¹³“Asamüh tsoi nou that nai akausai lashan.

¹⁵Ngiotsüo nai tsoithat nou lüthat, nungaito APAOU asam Goaüh kiutsün goumchi nai asam aakih laiukü kih-e.

¹⁶APAOU nou akausai khaiunia tü chinyanji.

¹⁷“Asam Ijip ainou shitsün taoko asam tü Amalek haiüh ti chhin nung lüyangsan.

¹⁸Ngüso Goa lün tsühat- kü, naiuso asam outsükongkü tankü noi taoko asheting nouso naiuso phiai chanthiowantsünso ngüsoüh loatkü wan.

¹⁹Nungtiphe tilai APAOU asam Goaüh asam hau goumchi nou kiukü asam ehoi apem ainou kipsankü taiukiu-e, asamüh Amalek hai apem loatkü lüwan, nungaito ngüso tsüyangsanshi-e. Nung labean!”