Read Khiamniungan Naga Ngiokhem 26 Bible Online

Ngiokhem 26 - Khiamniungan Naga bible

Ngiokhem 26

¹“APAOU asam Goaüh asam hau kiutsün goumchi nou asamüh thalokü kihlokütün phiai,

²asam khaiunia pungkü nou thsa tsak taiuküta ayating eiusantsün pai-eiu ao-eiu ainou panlokü nung amkhamthang nai kankü khuau noin.

³Nung taoko meson sau noikü tha-e apa tü lüngio, ‘Ngo lo APAOU jü Goaüh sam paosiposo tü kiu-e ta thalotaiutsün goumchi nai ngo napiu ta mitha kiuji.’

⁴“Meson nou asam ainou thsa nou loküta APAOU asam Goa amthang khako nung taiu-e.

⁵Nungai asamüh APAOU khako nungti ngioau noin: Atsakei ‘lükhunantsün Aramea hai nou jü paosipo tsak noiküla, apa meshen tsammongso nialokü Ijip nai kih ao saom. Ngüso nungai khutsün taoko mepem thsaothsaokü noiküla, lüko ngüso mele asong naiuso akong tsak iulan.

⁶Nungai Ijip haiüh sam tü tsaokü kankei naiuso chhisiya nai sua haili kongkü thoikeikü noiküla.

⁷Nungai samüh APAOU sam paosi- poso Goa tü ahachuau wekü ngiom, Apaüh sam ngio lulakü sam angja jeiatkü chhisiyatsün, naiuso sam omhe angjatsün ep.

⁸Apa akong naiuso oukong asong tsangkü sam Ijip ainou kipsan. Apaüh alohat thawao-iau ii naiuso athanga chhisiya nouso chhin.

⁹Apaüh sam nungai niakü shikü nung memei naiuso atsüomei goumchi nou sam hau kium.

¹⁰Nungtiphe lo, ngo APAOU dongai apaüh ngü hau ouk kiutsün ko chongting be-eiuyam- santsün ainou haoson kankü shiji.’ “Nungtiphe APAOU khako thsa nou ataiu küta nungko lüamkham.

¹¹APAOU asam Goaüh ni hau naiuso atsamkhaiu hau kiutsün amei apem thaiutha lümongling, naiuso Levi hai si asam ongko kihatsün melemao hai apem hakü lümonglinge.

¹²“Pon süme pungkü- Levi hai naiuso melemao hai, naiuso mejetthso hai, naiuso jihi hoi nouso hau asam ekve lükiu, nungaito ngüso hoikam pungkü nai ngüsoüh potsün eheshiu taiu-e. Tilai asamüh nung chhisiya chhikheme,

¹³APAOU tü lüngio, ‘Asio ekve jü tsamai titso tsüpoitaiu, ngo nungso ni thoiluttsünli, Levi hai, melemao nouso, mejetthso nouso, naiuso jihi hoi nouso hau kiuwaniu. Ngo ekve yamko ni thoiluttsünso titso tsüangkü tsüdekünai beankü tsünoi.

¹⁴Ngo tilai mongsaiukü noiküla, nungko nou ngo titso tsühean, ngo amkham yamko tsüsiokü noi taoko ngo jü tsamai taiutsün nung haoson titso kankü tsükhu, naiuso a-eanhai thaiutha ngo nungko nou chaithio titso tsükiuwan. Oh APAOU, ngo angio angkü ekve yamko ni thoiluttsün alum chhianiu.

¹⁵Ni noitsün aün nok asiothang ainou sam tü athapi naiuso akhaiuniaso Israel hai ouk akiu; ni sam paosiposo tü thalotaiutsünli, ni sam hau kiutsün memei naiuso atsüomei goumchi nou ouk akiu.’

¹⁶“Lonyi APAOU asam Goaüh asam tü apa ngiokhem nouso apem angio angkü theau thoilutji; nungtiphe asam mongpem apem nou nung ngiokhem nouso mongkiukü lükan- kei.

¹⁷APAOU asam Goa iula-au, asamüh apa ngio angkü theao, naiuso ngiokhem apem kankeiau, naiuso apaüh thoiluttsün apem chhiao lonyi asamüh mitha kiuji.

¹⁸Apaüh thalotsünli, lonyi APAOU nou asam meshen ün khaiuniahoi ta lo-iu, naiuso apaüh asam tü apa ngiokhem nouso apem kankeiao thoilutji.

¹⁹Apaüh shantaiutsün mele nouso khaiuko apaüh asam songthsokü shane, naiuso asamüh apa hau nianlom naiuso asuhat nou kankü shi-e. Apaüh thalotsünli, asam apa ün khaiuniahoi noi-e.”